ஸ்காட்லாந்தின் கிளாஸ்கோ நகரில் விறுவிறுப்பாக நடைபெற்று வரும் 23-வது காமன்வெல்த் விளையாட்டுப் போட்டியில், உலகின் 74 நாடுகளைச் சேர்ந்த சுமார் 3 ஆயிரம் வீரர், வீராங்கனைகள் பல்வேறு பிரிவுகளில் திறமையை வெளிப்படுத்தி வருகின்றனர். இந்திய வீரர்கள் தொடர்ந்து பதக்கங்களை குவித்து வரும் நிலையில், தமிழகத்தைச் சேர்ந்த பளுதூக்குதல் வீரர் ராஜா முத்துப்பாண்டியும் வெள்ளிப்பதக்கம் வென்று நாட்டுக்கு பெருமை சேர்த்துள்ளார்.

போட்டியின் தொடக்க நாள்களில் இந்தியாவின் நட்சத்திர பளுதூக்குதல் வீராங்கனை மீராபாய் சானு தங்கப் பதக்கத்தையும், ரிஷிகாந்தா சிங் வெள்ளிப் பதக்கத்தையும் கைப்பற்றி இந்தியாவின் பதக்க எண்ணிக்கையை உயர்த்தினர். அதனைத் தொடர்ந்து நடைபெற்ற ஆண்களுக்கான பளுதூக்குதல் போட்டியில் தமிழக வீரர் ராஜா முத்துப்பாண்டி அபாரமான ஆட்டத்தை வெளிப்படுத்தி கவனத்தை ஈர்த்தார்.

தூத்துக்குடி மாவட்டம் கோவில்பட்டியைச் சேர்ந்த ராஜா முத்துப்பாண்டி, ஆண்களுக்கான 65 கிலோ எடைப்பிரிவில் களமிறங்கி, ஸ்னாட்ச் முறையில் 126 கிலோவும், கிளீன் அண்ட் ஜெர்க் முறையில் 160 கிலோவும் தூக்கி, மொத்தம் 286 கிலோ எடையை வெற்றிகரமாக உயர்த்தினார். இந்த அசத்தலான செயல்திறன் அவருக்கு இரண்டாவது இடத்தையும், வெள்ளிப் பதக்கத்தையும் பெற்றுத் தந்தது.

இந்த சாதனையைத் தொடர்ந்து, குடியரசுத் தலைவர் திரவுபதி முர்மு, பிரதமர் நரேந்திர மோடி உள்ளிட்ட பல்வேறு அரசியல் தலைவர்கள், விளையாட்டுத் துறை பிரபலங்கள் மற்றும் பொதுமக்கள் ராஜா முத்துப்பாண்டிக்கு வாழ்த்துகளைத் தெரிவித்து வருகின்றனர்.அந்த வரிசையில், நடிகரும் மக்கள் நீதி மய்யத்தின் தலைவருமான கமல்ஹாசனும் தனது வாழ்த்துச் செய்தியை பகிர்ந்துள்ளார்.

அதில், "காமன்வெல்த் விளையாட்டுப் போட்டியின் பளுதூக்குதல் பிரிவில் இந்தியாவுக்கு வெள்ளிப் பதக்கம் வென்று பெருமை சேர்த்த இளம் வீரர் ராஜா முத்துப்பாண்டிக்கு மனமார்ந்த வாழ்த்துகள். சிறிய நகரங்கள் மற்றும் கிராமங்களில் இருந்து வரும் திறமையான விளையாட்டு வீரர்களுக்கும் உயர்ந்த இலக்கை அடைய முடியும் என்பதற்கு இவரது சாதனை ஊக்கமளிக்கும் எடுத்துக்காட்டாக திகழ்கிறது.

மேலும் பல சர்வதேச போட்டிகளில் இந்தியாவுக்காக வெற்றிகளைப் பெற்றுத் தர வாழ்த்துகள்" என்று தெரிவித்துள்ளார்.தமிழகத்தின் மண்ணில் இருந்து சர்வதேச அரங்கில் மிளிர்ந்துள்ள ராஜா முத்துப்பாண்டியின் வெற்றி, இளம் விளையாட்டு வீரர்களுக்கு புதிய நம்பிக்கையையும், உத்வேகத்தையும் அளித்துள்ளதாக விளையாட்டு ஆர்வலர்கள் கருத்து தெரிவித்து வருகின்றனர்.