தென் ஆப்பிரிக்காவுக்கு எதிரான டெஸ்ட் தொடரில் 25 ஆண்டுகள் கழித்து இந்தியா சொந்த மண்ணிலேயே தோல்வியை சந்தித்தது. கடந்த ஆண்டு நியூசிலாந்து இந்தியாவை ஒயிட்வாஷ் செய்த வேதனை முழுமையாக மறையாமலேயே, மீண்டும் சொந்த தரைப்பகுதியில் ஏற்பட்ட இந்த தோல்வி இந்திய கிரிக்கெட் ரசிகர்களுக்கு பெரிய அதிர்ச்சியை ஏற்படுத்தியுள்ளது.

இந்த தோல்விக்குப் பிறகு இந்தியா ஒருநாள் மற்றும் டி20 தொடர்களில் தென்னாப்பிரிக்காவை எதிர்கொள்ள உள்ளது. இதில் ஜஸ்ப்ரித் பும்ரா ஒருநாள் தொடரில் ஓய்வு எடுக்கிறார்; ஆனால் டி20 தொடரில் விளையாட உள்ளார்.

இந்த சூழலில், இந்தியாவின் முக்கிய ஸ்பின்னரான ரவிச்சந்திரன் அஷ்வின், பும்ராவை “இந்தியாவின் புதையல்” என்று புகழ்ந்ததோடு, அவரை எப்படி பயன்படுத்த வேண்டும் என்பதிலும் தனது வலுவான கருத்தை தெரிவித்துள்ளார்.

அஷ்வின் கூறியதாவது:பும்ரா நீண்ட காலம் விளையாட வேண்டுமெனில், சொந்த மண்ணில் நடைபெறும் டெஸ்ட் மற்றும் அர்த்தமற்ற இருதரப்பு ஒருநாள் தொடர்களில் அவரை விளையாடச் செய்யக் கூடாது.

பும்ரா வெளிநாட்டு டெஸ்ட்களில் மற்றும் டி20 சர்வதேச போட்டிகளிலேயே கவனம் செலுத்த வேண்டும்; அங்கேயே அவர் இந்தியாவுக்கு பல வரலாற்றுச் சாதனைகளை உருவாக்க முடியும்.பும்ராவின் தனித்துவமான ஆக்சன் காரணமாக உடலுக்கு வரும் கூடுதல் சுமையை குறைப்பதற்கும் இந்த முடிவு உதவும்.

சொந்த மண்ணில் டெஸ்ட் விளையாடாமல் இருக்கும்போது மற்ற புதிய வேகப் பந்து வீச்சாளர்களுக்கு வாய்ப்பு வழங்க முடியும், அது இந்தியாவின் எதிர்காலத்தையும் வலுப்படுத்தும் என்று அஷ்வின் வலியுறுத்தினார்.

“பும்ரா சமீப காலத்தில் இந்தியா பெற்ற முக்கிய வெற்றிகளுக்கான முதன்மை காரணிகளில் ஒருவர். அவரை சரியாக பாதுகாக்க வேண்டியது இப்போது மிக முக்கியம்,” என்று அஷ்வின் தனது யூடியூப் சேனலில் தெரிவித்தார்.இந்த கருத்து தற்போது இந்திய கிரிக்கெட் வட்டாரத்தில் பெரிய விவாதமாக மாறியுள்ளது.