ஸ்காட்லாந்து நாட்டின் கிளாஸ்கோ நகரில் நடைபெறும் 2026 காமன்வெல்த் போட்டிகளில் இந்திய மாற்றுத்திறனாளி (Para-Athletes) தடகள வீரர்கள் மற்றும் நீளம் தாண்டுதல் வீரர் தங்கம் வெள்ளி என பதக்கங்களை வென்று இந்தியாவிற்கு பெருமை சேர்த்துள்ளனர். 

இப்போட்டியில் பதக்கம் வென்றவர்களுக்கு மத்திய உள்துறை அமைச்சர் அமித் ஷா வாழ்த்துகளைத் தெரிவித்துள்ளார்.

ஆடவருக்கான T47 பிரிவு 100 மீட்டர் ஓட்டப்பந்தயத்தில் இந்திய வீரர்கள் முதல் இரண்டு இடங்களைப் பிடித்துள்ளனர்.  அதன்படி, இந்திய வீரர் திலீப் மகாது கவித் 10.71 வினாடிகளில் இலக்கை எட்டி, புதிய தொடர் சாதனைகளுடன் (Games Record) தங்கப் பதக்கத்தைக் கைப்பற்றியுள்ளார்.

மற்றொரு இந்திய வீரரான முகமது பசில்  10.83 வினாடிகளில் கடந்து தனது சீசனின் சிறந்த நேரத்தைப் பதிவு செய்து வெள்ளிப் பதக்கம் வென்று அசத்தியுள்ளார்.

ஆடவர் நீளம் தாண்டுதல் போட்டியில் இந்திய வீரர் முரளி ஸ்ரீசங்கர்  8.09 மீட்டர் தூரம் தாண்டி வெள்ளிப் பதக்கத்தைக் கைப்பற்றியுள்ளார். இதன் மூலம் காமன்வெல்த் போட்டிகளில் தொடர்ச்சியாகத் தனது இரண்டாவது வெள்ளிப் பதக்கத்தை முரளி ஸ்ரீசங்கர் வென்றுள்ளார். 

இதற்கு முன்பு கடந்த 2022 பர்மிங்ஹாம் காமன்வெல்த் போட்டிகளிலும் (8.08 மீட்டர் தூரம் தாண்டி) இவர் வெள்ளிப் பதக்கம் வென்றிருந்தார்.

இதுகுறித்து தனது எக்ஸ்  தளத்தில் பதிவிட்டுள்ள மத்திய உள்துறை அமைச்சர் அமித் ஷா குறிப்பிட்டுள்ளதாவது;

"T47 100 மீட்டர் ஓட்டத்தில் தங்கம் மற்றும் வெள்ளி வென்று இந்தியாவிற்குப் பெருமை சேர்த்துள்ள திலீப் மகாது கவித் மற்றும் முகமது பசில் ஆகியோருக்குப் பாராட்டுகள். உங்கள் அசாத்திய வேகம் மற்றும் விளையாட்டுத் திறன் ஒவ்வொரு இந்தியரின் இதயத்தையும் பெருமிதத்தால் நிரப்பியுள்ளது" என்று வாழ்த்தியுள்ளார்.