கண் மருத்துவத் துறையில் புதிய பரிணாமத்தை உருவாக்கும் வகையில், ஸ்பெயின் நாட்டில் விஞ்ஞானிகள் ஒரு ஆச்சரியமான கண்டுபிடிப்பை வெளிக்கொணர்ந்துள்ளனர். University of Granada ஆராய்ச்சியாளர்கள், மீன் செதில்களை பயன்படுத்தி செயற்கை கருவிழி (cornea) உருவாக்கியுள்ளனர் என்பது மருத்துவ உலகையே ஆச்சரியத்தில் ஆழ்த்தியுள்ளது.

பொதுவாக கருவிழி மிகவும் நுணுக்கமான பகுதி. இதில் ரத்த நாளங்கள் இல்லாததால், சேதம் ஏற்பட்டால் இயற்கையாக குணமடைவது கடினம். இதனால், கருவிழி மாற்று அறுவை சிகிச்சைக்கு கண் தானம் செய்யப்பட்ட கருவிழிகள் அவசியமாகின்றன. ஆனால், தானம் செய்யப்படும் கண்களின் பற்றாக்குறை, பொருத்தமான கருவிழிக்காக நீண்டகால காத்திருப்பு, அதிக செலவு போன்றவை நோயாளிகளுக்கு பெரிய சவாலாக இருந்து வருகின்றன.

இந்த பிரச்சினைக்கு மாற்றுத் தீர்வாக, மீன் செதில்களில் உள்ள கொலாஜன் மற்றும் உயிரியல் அமைப்புகளை அடிப்படையாகக் கொண்டு புதிய செயற்கை கருவிழி உருவாக்கப்பட்டுள்ளது.

குறிப்பாக எளிதில் கிடைக்கும் மீன் வகைகளின் செதில்கள் பயன்படுத்தப்பட்டுள்ளதால், இது குறைந்த செலவில் தயாரிக்கக்கூடியதாகவும் உள்ளது. மேலும், மனித உடலுடன் ஒத்திசைவாக (biocompatible) செயல்படும் தன்மை கொண்டதால், எதிர்மறை விளைவுகள் ஏற்படும் அபாயம் குறைவாக இருக்கும் என விஞ்ஞானிகள் தெரிவிக்கின்றனர்.

தற்போது இந்த செயற்கை கருவிழி விலங்குகளில் பரிசோதனை கட்டத்தில் உள்ளது. ஆரம்ப சோதனைகளில், அது கண்களில் சிறப்பாக பொருந்தி, குணமடைதல் வேகத்தையும் பார்வை மீட்பையும் மேம்படுத்தியுள்ளதாக அறிக்கைகள் கூறுகின்றன.

இதனால், எதிர்காலத்தில் மனிதர்களுக்கும் பாதுகாப்பாக பயன்படுத்தப்படும் நாள் அருகில் இருப்பதாக நம்பப்படுகிறது.இன்னும் மருத்துவ பரிசோதனைகள் மற்றும் பல கட்ட ஆய்வுகள் நடைபெற வேண்டியிருந்தாலும், இந்த கண்டுபிடிப்பு கண் சிகிச்சை துறையில் ஒரு முக்கிய மைல்கல்லாக பார்க்கப்படுகிறது.

கண் தானம் பற்றாக்குறைக்கு மாற்று வழி காணும் இந்த முயற்சி, உலகம் முழுவதும் உள்ள ஆயிரக்கணக்கான நோயாளிகளுக்கு புதிய நம்பிக்கையை அளிக்கக்கூடியதாக உள்ளது.