சென்னை அருகே பரந்தூரில் அமைக்க திட்டமிடப்பட்டிருந்த புதிய விமான நிலைய திட்டத்தை தமிழக வெற்றிக் கழக அரசு ரத்து செய்வதாக முதலமைச்சர் விஜய் சட்டப்பேரவையில் அறிவித்துள்ள நிலையில், சென்னையின் 2வது விமான நிலையம் குறித்த விவாதம் மீண்டும் சூடுபிடித்துள்ளது. பரந்தூர் திட்டம் ரத்து செய்யப்பட்டதால் தமிழகத்தின் பொருளாதார வளர்ச்சி பாதிக்கப்படும் என ஒரு தரப்பினர் விமர்சித்து வரும் நிலையில், புதிய விமான நிலையம் அமைக்கும் திட்டத்தை அரசு கைவிடவில்லை என்பதும் தற்போது தெரியவந்துள்ளது.

சென்னையின் 2வது விமான நிலையத்தை அமைப்பதற்கான சாத்தியக்கூறுகளை ஆய்வு செய்ய திருவள்ளூர் மாவட்டம் கும்மிடிப்பூண்டி மற்றும் செங்கல்பட்டு மாவட்டம் செய்யூர் ஆகிய இரு பகுதிகளை தமிழக அரசு பரிசீலித்து வருவதாக தகவல்கள் வெளியாகியுள்ளன. இந்த இரு இடங்களிலும் சாத்தியக்கூறு ஆய்வு நடத்த விமான நிலைய ஆணையத்திடம் தமிழக அரசு கேட்டுக்கொண்டுள்ளதாக கூறப்படுகிறது.

இதனால், பரந்தூரில் விவசாய நிலங்கள் மற்றும் நீர்நிலைகள் பாதிக்கப்படும் என்பதால் திட்டத்தை ரத்து செய்ததாக கூறிய தமிழக அரசு, தற்போது அதேபோன்ற விவசாய நிலங்கள் மற்றும் நீர்நிலைகள் அதிகம் உள்ள பகுதிகளை விமான நிலையத்திற்காக பரிசீலிப்பது ஏன் என்ற கேள்வி எழுந்துள்ளது.

சென்னையின் தற்போதைய சர்வதேச விமான நிலையம் மீனம்பாக்கத்தில் செயல்பட்டு வருகிறது. பயணிகள் எண்ணிக்கை தொடர்ந்து அதிகரித்து வருவதால், எதிர்கால தேவையை கருத்தில் கொண்டு சென்னைக்கு 2வது விமான நிலையம் அமைக்க வேண்டும் என்ற கோரிக்கை நீண்ட காலமாக இருந்து வருகிறது.

இதையடுத்து காஞ்சிபுரம் மாவட்டம் பரந்தூரில் புதிய விமான நிலையம் அமைக்க முந்தைய தமிழக அரசு நடவடிக்கைகளை மேற்கொண்டது. இதற்காக நிலம் கையகப்படுத்தும் பணிகளும் தொடங்கப்பட்டன. ஆனால், விவசாய நிலங்கள் கையகப்படுத்தப்படுவதற்கும் தங்கள் பகுதியில் விமான நிலையம் அமைப்பதற்கும் எதிர்ப்பு தெரிவித்து பரந்தூர் மற்றும் சுற்றுவட்டார கிராம மக்கள் தொடர்ந்து போராட்டங்களில் ஈடுபட்டு வந்தனர்.

இந்த நிலையில் நடிகராக இருந்து அரசியலுக்கு வந்த விஜய், தவெக அரசியல் பயணத்தின் தொடக்க கட்டத்திலேயே பரந்தூர் மக்களை நேரில் சந்தித்து அவர்களது பிரச்னைகளை கேட்டறிந்தார். அப்போது தவெக ஆட்சிக்கு வந்தால் பரந்தூர் விமான நிலைய திட்டம் ரத்து செய்யப்படும் என அவர் தெரிவித்திருந்தார்.

தற்போது தமிழகத்தில் தவெக அரசு அமைந்துள்ள நிலையில், சட்டப்பேரவையில் பரந்தூர் விமான நிலைய திட்டம் ரத்து செய்யப்படுவதாக முதலமைச்சர் விஜய் அறிவித்தார். இதற்கு பரந்தூர் பகுதி மக்கள் வரவேற்பு தெரிவித்தனர். அதே நேரத்தில், சென்னையின் எதிர்கால வளர்ச்சி மற்றும் தமிழகத்தின் பொருளாதார தேவையை கருத்தில் கொண்டு விமான நிலைய திட்டம் தொடர வேண்டும் என திமுக உள்ளிட்ட எதிர்க்கட்சிகள் வலியுறுத்தி வருகின்றன.

ஒருபுறம் பரந்தூர் விமான நிலையம் அமைந்திருந்தால் சென்னைக்கும் தமிழகத்திற்கும் கிடைத்திருக்கக்கூடிய பொருளாதார நன்மைகள் குறித்து விவாதம் நடைபெற்று வரும் நிலையில், மறுபுறம் விவசாய நிலங்களையும் நீர்நிலைகளையும் அழித்து விமான நிலையம் அமைக்கக் கூடாது என்பதே தவெக அரசின் நிலைப்பாடு என அக்கட்சியினர் கூறி வருகின்றனர்.

இந்த சூழலில்தான் செய்யூர் மற்றும் கும்மிடிப்பூண்டி ஆகிய இரண்டு பகுதிகள் விமான நிலையத்திற்கான சாத்தியக்கூறு ஆய்வுக்கு பரிசீலிக்கப்படுவதாக வெளியாகியுள்ள தகவல் புதிய சர்ச்சையை ஏற்படுத்தியுள்ளது.

செங்கல்பட்டு மாவட்டத்தில் உள்ள செய்யூர் மற்றும் அதன் சுற்றுவட்டார பகுதிகளான இலத்தூர், சூனாம்பேடு, ஒடுக்கத்தூர் உள்ளிட்ட பகுதிகள் முக்கியமான விவசாய மண்டலங்களாக உள்ளன. அரசு தரவுகளை அடிப்படையாகக் கொண்ட தகவல்களின் படி, செய்யூர் வட்டாரத்தில் மொத்த நிலப்பரப்பில் சுமார் 65 சதவீதத்துக்கும் அதிகமான பகுதி விவசாய பயன்பாட்டில் இருப்பதாக கூறப்படுகிறது.

இப்பகுதிகளில் ஆண்டுதோறும் ஆயிரக்கணக்கான ஏக்கர் பரப்பில் நெல், நிலக்கடலை, உளுந்து, கரும்பு உள்ளிட்ட பயிர்கள் சாகுபடி செய்யப்படுகின்றன. இதனால் செய்யூர் பகுதி விவசாயிகளின் வாழ்வாதாரத்துடன் நேரடியாக தொடர்புடைய பகுதியாக உள்ளது.

அதேபோல், செய்யூர் மற்றும் சுற்றுவட்டாரங்களில் ஏரிகள், குளங்கள், குட்டைகள், விவசாய கிணறுகள் மற்றும் ஆழ்துளைக் கிணறுகள் என ஏராளமான நீராதாரங்கள் உள்ளன.

சுமார் 150 ஏக்கர் பரப்பளவில் உள்ளதாக கூறப்படும் செய்யூர் பெரிய ஏரி மூலம் 300 ஏக்கருக்கும் அதிகமான விவசாய நிலங்கள் பாசன வசதி பெறுவதாக தகவல்கள் தெரிவிக்கின்றன. செய்யூரின் தென்கிழக்குப் பகுதியில் அமைந்துள்ள ஓதியூர் ஏரியும் அப்பகுதியின் முக்கிய நீர்நிலைகளில் ஒன்றாகக் கருதப்படுகிறது.

செய்யூர் வட்டத்தின் கீழ் உள்ள 117 வருவாய் கிராமங்களையும் கணக்கில் எடுத்தால், பொதுப்பணித்துறை மற்றும் ஊராட்சி அமைப்புகளின் பராமரிப்பில் நூற்றுக்கணக்கான பாசன ஏரிகள் மற்றும் குளங்கள் இருப்பதாக கூறப்படுகிறது. இதுதவிர ஆயிரக்கணக்கான விவசாய கிணறுகள் மற்றும் ஆழ்துளைக் கிணறுகளும் விவசாயத்திற்கு பயன்படுத்தப்பட்டு வருகின்றன.

திருவள்ளூர் மாவட்டத்தில் உள்ள கும்மிடிப்பூண்டி வட்டாரமும் விவசாயம் சார்ந்த பகுதியாக உள்ளது. அரசு மற்றும் மக்கள் தொகை கணக்கெடுப்பு தரவுகளின் அடிப்படையில், சுமார் 80 வருவாய் கிராமங்களை உள்ளடக்கிய கும்மிடிப்பூண்டி வட்டாரத்தின் மொத்த பரப்பளவு சுமார் 38,913 ஹெக்டேர் என கூறப்படுகிறது. இது ஏக்கர் கணக்கில் சுமார் 96 ஆயிரம் ஏக்கர் பரப்பளவாகும்.

காடுகள் மற்றும் குடியிருப்பு பகுதிகளைத் தவிர்த்து, மொத்த நிலப்பரப்பில் சுமார் 45 முதல் 50 சதவீதம் வரை நஞ்சை மற்றும் புஞ்சை விவசாய நிலங்களாக இருப்பதாக தகவல்கள் தெரிவிக்கின்றன.ஆரணி ஆற்றின் பாசனத்தை பயன்படுத்தி இப்பகுதியில் மா, கரும்பு, உளுந்து, நிலக்கடலை உள்ளிட்ட பயிர்கள் சாகுபடி செய்யப்படுகின்றன.

கும்மிடிப்பூண்டி பகுதி ஆரணி ஆறு மற்றும் பழவேற்காடு ஏரியின் நீர்வரத்து பகுதிகளுக்கு அருகில் அமைந்துள்ளதால், நீரியல் ரீதியாகவும் முக்கியத்துவம் வாய்ந்ததாக பார்க்கப்படுகிறது.

கும்மிடிப்பூண்டி வட்டாரத்தில் பொதுப்பணித்துறையின் நேரடி பராமரிப்பில் 26 முக்கிய பாசன ஏரிகள் இருப்பதாக கூறப்படுகிறது. இவற்றின் மூலம் சுமார் 4,500 ஏக்கர் விவசாய நிலங்கள் நேரடியாக பாசன வசதி பெறுகின்றன. இதுதவிர 80-க்கும் மேற்பட்ட கிராமங்களில் உள்ள ஊராட்சி ஒன்றிய குளங்கள், குட்டைகள் மற்றும் ஏரிகளையும் சேர்த்தால் 150-க்கும் மேற்பட்ட நீர்நிலைகள் இருப்பதாக தகவல்கள் தெரிவிக்கின்றன.

குறிப்பாக தாமரை ஏரி உள்ளிட்ட நீர்நிலைகளும் இப்பகுதியில் உள்ளன. சத்தியமேடு மலைப்பகுதியில் இருந்து உருவாகும் சிற்றோடைகள் மற்றும் ஆரணி ஆற்றின் உபநீரும் பல்வேறு ஏரிகளுக்கு நீர்வரத்து அளிக்கும் முக்கிய ஆதாரங்களாக உள்ளன.

இதனால் சென்னையின் வடக்கு மற்றும் தெற்கு புறநகர் பகுதிகளின் மழைநீர் வடிகால் அமைப்பிலும் இந்த பகுதிகள் முக்கிய பங்கு வகிப்பதாக கூறப்படுகிறது.

இந்த பின்னணியில்தான் தமிழக அரசின் புதிய பரிசீலனை பல்வேறு கேள்விகளை எழுப்பியுள்ளது. பரந்தூர் விமான நிலைய திட்டத்தை விவசாய நிலங்கள் மற்றும் நீர்நிலைகள் பாதிக்கப்படும் என்ற காரணத்தால் எதிர்த்த தவெக அரசு, தற்போது விவசாய நிலங்கள் மற்றும் நீர்நிலைகள் அதிகம் உள்ளதாக கூறப்படும் செய்யூர், கும்மிடிப்பூண்டி பகுதிகளை ஏன் பரிசீலிக்கிறது என்ற கேள்வி எழுந்துள்ளது.

குறிப்பாக செய்யூர் பகுதியில் சுமார் 65 சதவீதத்துக்கும் அதிகமான நிலங்கள் விவசாய பயன்பாட்டில் இருப்பதாக கூறப்படும் நிலையில், கும்மிடிப்பூண்டியிலும் சுமார் 45 முதல் 50 சதவீத நிலங்கள் விவசாய நிலங்களாக வகைப்படுத்தப்பட்டுள்ளதாக தகவல்கள் தெரிவிக்கின்றன.

இதனால், “பரந்தூரில் விவசாய நிலங்கள் இருப்பதால் விமான நிலையம் வேண்டாம் என்றால், செய்யூர் மற்றும் கும்மிடிப்பூண்டியில் இருக்கும் விவசாய நிலங்களுக்கு என்ன தீர்வு?” என்ற கேள்வி முன்வைக்கப்படுகிறது.

மேலும், விமான நிலையத்திற்காக உண்மையில் அடையாளம் காணப்பட்ட நிலப்பரப்பு எவ்வளவு? அதில் எத்தனை ஏக்கர் நஞ்சை நிலம், எத்தனை ஏக்கர் புஞ்சை நிலம் உள்ளது? அரசு நிலம் மற்றும் தனியார் நிலம் எவ்வளவு? எத்தனை விவசாய குடும்பங்கள் பாதிக்கப்பட வாய்ப்புள்ளது? என்ற கேள்விகளும் எழுந்துள்ளன.

அதேபோல், திட்டத்துக்குள் ஏரிகள், குளங்கள், ஓடைகள் ஏதேனும் வருகிறதா? இயற்கையான மழைநீர் வடிகால் பாதைகள் பாதிக்கப்படுமா? விவசாய பாசன ஏரிகளுக்கும் விமான நிலையம் அமையவுள்ள பகுதிக்கும் இடையிலான தூரம் என்ன? என்பதும் விரிவாக ஆய்வு செய்ய வேண்டிய விஷயங்களாக உள்ளன.

குறிப்பாக சென்னையின் வெள்ளநீர் வடிகால் அமைப்பில் முக்கிய பங்கு வகிக்கும் பகுதிகளில் பெரிய அளவிலான கட்டுமானப் பணிகள் மேற்கொள்ளப்படும்போது, அதன் சுற்றுச்சூழல் மற்றும் நீரியல் தாக்கம் குறித்தும் கேள்விகள் எழுகின்றன.

இதனால், சென்னையின் 2வது விமான நிலையம் தேவை என்பதில் மாற்றுக்கருத்து இல்லாவிட்டாலும், அது எங்கு அமைக்கப்பட வேண்டும், எந்த அளவுக்கு விவசாய நிலங்கள் கையகப்படுத்தப்படும், நீர்நிலைகள் மற்றும் விவசாயிகளின் வாழ்வாதாரம் எவ்வாறு பாதுகாக்கப்படும் என்பதே தற்போது முக்கிய விவாதமாக மாறியுள்ளது.

பரந்தூரில் விவசாய நிலங்கள் மற்றும் நீர்நிலைகளை பாதுகாப்பதை காரணமாக முன்வைத்து விமான நிலைய திட்டம் ரத்து செய்யப்பட்ட நிலையில், செய்யூர் மற்றும் கும்மிடிப்பூண்டி ஆகிய பகுதிகள் சாத்தியக்கூறு ஆய்வுக்கு தேர்வு செய்யப்பட்டிருப்பதற்கான காரணத்தை தமிழக அரசு விரிவாக விளக்குமா என்பதே தற்போது எழுந்துள்ள முக்கிய எதிர்பார்ப்பாக உள்ளது.