மதுராந்தகம், தாராபுரம் தொகுதிகளுக்காக முதல்வர் விஜய் வெளியிட்டுள்ள அதிரடி அறிவிப்புகள், காலியாக உள்ள திருச்சி கிழக்கு உள்ளிட்ட ஐந்து தொகுதிகளுக்கான இடைத்தேர்தல் எதிர்பார்ப்பை அதிகரித்துள்ளன. இடைத்தேர்தலில் வெற்றி பெற்று சட்டமன்றத்தில் தமிழக வெற்றிக் கழகத்தின் பலத்தை உயர்த்துவதுடன், மக்களின் நம்பிக்கையையும் பெற ஆளுங்கட்சி திட்டமிட்டு வருவதாக அரசியல் வட்டாரங்களில் பேசப்படுகிறது.

தமிழக சட்டமன்றத் தேர்தல் முடிவுகளில் தனிப்பெரும் கட்சியாக உருவெடுத்த தமிழக வெற்றிக் கழகம், கூட்டணிக் கட்சிகளின் ஆதரவுடன் ஆட்சி அமைத்தது. இதையடுத்து, முதல்வர் விஜய் வெற்றி பெற்ற திருச்சி கிழக்கு தொகுதியை ராஜினாமா செய்ததுடன், அதிமுக சார்பில் வெற்றி பெற்ற ஆறு பேரும் தங்களது சட்டமன்ற உறுப்பினர் பதவிகளை ராஜினாமா செய்ததாகக் கூறப்படுகிறது. இதனால் மாநிலத்தில் மொத்தம் ஏழு தொகுதிகள் காலியானதாக அறிவிக்கப்பட்டன.

அவற்றில் மதுராந்தகம், தாராபுரம் ஆகிய இரண்டு தொகுதிகளுக்கு இடைத்தேர்தல் நடைபெற்றது. தங்களது சட்டமன்ற உறுப்பினர் பதவியை ராஜினாமா செய்துவிட்டு தவெகவில் இணைந்த மரகதம் குமரவேல், சத்தியபாமா ஆகியோர் மீண்டும் அதே தொகுதிகளில் போட்டியிட்டு வெற்றி பெற்றனர். இதையடுத்து, இன்னும் காலியாக உள்ள ஐந்து தொகுதிகளுக்கான இடைத்தேர்தலிலும் வெற்றி பெற்று, சட்டமன்றத்தில் தற்போது 109 ஆக உள்ள தங்களது பலத்தை 114 ஆக உயர்த்த தவெக தலைமை ஆர்வம் காட்டுவதாகத் தகவல்கள் தெரிவிக்கின்றன.

மதுராந்தகம், தாராபுரம் இடைத்தேர்தல் முடிவுகள் ஆளுங்கட்சிக்குச் சாதகமாக அமைந்தாலும், எதிர்பார்த்த அளவிலான மிகப்பெரிய வெற்றியாக அது அமையவில்லை என தவெக தரப்பில் கருதப்படுவதாகக் கூறப்படுகிறது. குறிப்பாக, திமுக மற்றும் அதிமுக ஆகிய இரு கட்சிகளும் இடைத்தேர்தலில் குறிப்பிடத்தக்க வாக்குகளைப் பெறாமல் இருக்க வேண்டும் என்று ஆளுங்கட்சி விரும்பியதாகவும், ஆனால் களநிலைமை அதற்கு மாறாக அமைந்ததாகவும் அரசியல் வட்டாரங்களில் பேசப்படுகிறது.

பொதுத்தேர்தலில் அதிமுக வெற்றி பெற்றிருந்த இரண்டு தொகுதிகளிலும் இடைத்தேர்தலின்போது திமுக இரண்டாம் இடத்தைப் பிடித்தது ஆளுங்கட்சி தரப்புக்கு அதிர்ச்சியை ஏற்படுத்தியதாகக் கூறப்படுகிறது. இதனால், அடுத்ததாக நடைபெற உள்ள ஐந்து தொகுதிகளுக்கான இடைத்தேர்தலில் எதிர்க்கட்சிகளுக்குக் கடுமையான போட்டியை அளித்து வெற்றி பெறுவதற்கான வியூகங்களைத் தவெக வகுத்து வருவதாகத் தகவல்கள் வெளியாகியுள்ளன.

இதன் ஒரு பகுதியாகவே மதுராந்தகம், தாராபுரம் தொகுதிகளுக்குப் பல்வேறு வளர்ச்சித் திட்டங்கள் அறிவிக்கப்பட்டுள்ளதாகக் கூறப்படுகிறது. மதுராந்தகம் தொகுதியில் ரூ.5 கோடி செலவில் தடுப்பணை அமைப்பது, ரூ.4.5 கோடி செலவில் ஏரி மதகுகளைச் சீரமைப்பது, ரூ.1.80 கோடி செலவில் ஆறு கொள்முதல் நிலையங்களை அமைப்பது உள்ளிட்ட திட்டங்கள் அறிவிக்கப்பட்டுள்ளன. அச்சரப்பாக்கத்தில் ரூ.20 கோடி செலவில் அரசு மகளிர் கலை மற்றும் அறிவியல் கல்லூரி அமைப்பது, மதுராந்தகம் அரசு மருத்துவமனையை விரிவாக்கம் செய்வது, ரூ.4 கோடி செலவில் வாரச்சந்தை அமைப்பது போன்ற திட்டங்களும் அறிவிக்கப்பட்டுள்ளதாகத் தெரிவிக்கப்படுகிறது.

இதேபோல், தாராபுரம் தொகுதியில் காவிரி நீரை ஆதாரமாகக் கொண்டு ரூ.1,439 கோடி செலவில் புதிய கூட்டுக் குடிநீர்த் திட்டத்தைச் செயல்படுத்தத் திட்டமிடப்பட்டுள்ளதாகக் கூறப்படுகிறது. மேலும், 2,700 பேருக்கு இலவச வீட்டுமனைப் பட்டா வழங்குவது, ரூ.10 கோடி செலவில் நீர்நிலைகளைத் தூர்வாருவது, ரூ.6 கோடி செலவில் குடிநீர் மேல்நிலைத் தொட்டிகள் அமைப்பது உள்ளிட்ட திட்டங்களும் அறிவிக்கப்பட்டுள்ளன. இந்த இரண்டு தொகுதிகளுக்கும் சேர்த்து சுமார் ரூ.1,500 கோடி மதிப்பிலான வளர்ச்சித் திட்டங்கள் அறிவிக்கப்பட்டிருப்பது அரசியல் வட்டாரத்தில் கவனத்தை ஈர்த்துள்ளது.

தங்களை நம்பி வாக்களித்த மக்களைக் கைவிடமாட்டோம் என்பதை இந்த அறிவிப்புகள் மூலம் வெளிப்படுத்த தவெக விரும்புவதாகக் கூறப்படுகிறது. மேலும், அடுத்தகட்ட இடைத்தேர்தல்களில் வெற்றி பெற்றால், அந்தந்தப் பகுதிகளில் நீண்டகாலமாக நிலவி வரும் அடிப்படைப் பிரச்சினைகளுக்கும் தீர்வு காணப்படும் என்ற நம்பிக்கையை மக்களிடம் ஏற்படுத்த ஆளுங்கட்சி முயற்சி செய்வதாகத் தெரிகிறது.

இதுதவிர, வடகிழக்குப் பருவமழையைச் சிறப்பாகக் கையாள்வதிலும் அரசு கவனம் செலுத்தி வருவதாகத் தகவல்கள் தெரிவிக்கின்றன. தேர்தல் வாக்குறுதிகளான ‘அண்ணன் சீர்’ திட்டம், 150 நாள் வேலைவாய்ப்புத் திட்டம் உள்ளிட்டவற்றை அடுத்தடுத்து நடைமுறைப்படுத்தவும் அரசு முனைப்பு காட்டி வருவதாகக் கூறப்படுகிறது. தேர்தல் வாக்குறுதிகளை வெறும் அறிவிப்புகளாக வைத்திருக்காமல், அவற்றைச் செயல்படுத்துவதன் மூலம் மக்களிடம் நற்பெயரைப் பெற வேண்டும் என்பதில் தவெக அரசு உறுதியாக இருப்பதாக ஆளுங்கட்சி வட்டாரங்கள் தெரிவிக்கின்றன.

இருப்பினும், மதுராந்தகம், தாராபுரம் தொகுதிகளுக்கான திட்ட அறிவிப்புகள் இடைத்தேர்தல் வெற்றியை எந்த அளவுக்குப் பாதிக்கும் என்பதும், மீதமுள்ள ஐந்து தொகுதிகளில் தவெக தனது பலத்தை அதிகரிக்க முடியுமா என்பதும் இனிவரும் அரசியல் நகர்வுகளையும் தேர்தல் முடிவுகளையும் பொறுத்தே அமையும்.