தமிழக அரசியல் சூழல் நாளுக்கு நாள் பரபரப்பாக மாறிக் கொண்டிருக்கும் வேளையில், தேர்தல் வெப்பம் ஏற்கனவே உச்சத்தை எட்டியுள்ளது. இன்னும் சில மாதங்களில் சட்டமன்றத் தேர்தல் நடைபெறவுள்ளதால், கூட்டணிகள் மாறும் அரசியல் கணக்குகள் ஒருபுறம் நகர, மறுபுறம் கட்சிகள் தங்கள் தரப்பை வலுப்படுத்த களப்பணிகளில் தீவிரமாக இறங்கியுள்ளன.

இந்தச் சூழலில், விஜய் தலைமையிலான தமிழக வெற்றிக் கழகம் புதிய செயல் திட்டத்தை அறிவித்துள்ளது. மேலும், கட்சியின் வேர்களை வலுப்படுத்தும் நோக்கில், மாநிலம் முழுவதும் உள்ள அனைத்து சட்டமன்றத் தொகுதிகளிலும் செயல்வீரர்கள் கூட்டங்களை கட்டாயமாக நடத்த வேண்டும் என அவர் தெளிவான உத்தரவு பிறப்பித்துள்ளார்.

வருகிற 1-ம் தேதி முதல் இந்த கூட்டங்கள் தொடங்கப்பட வேண்டும் என்றும், அடிப்படை அமைப்புகளை பலப்படுத்தி, தேர்தல் பணிகளை வேகப்படுத்த வேண்டும் என்றும் அறிவுறுத்தப்பட்டுள்ளது.

மேலும், தேர்தல் தயாரிப்புகள், பிரச்சாரத் திட்டங்கள் மற்றும் களப்பணிகளை ஒழுங்குபடுத்த மாவட்ட செயலாளர்கள் நேரடியாக நிர்வாகிகளை வழிநடத்த வேண்டும் எனவும் கட்சி தலைமையகம் உத்தரவிட்டுள்ளதாக தகவல்கள் வெளியாகியுள்ளன.

இதன் மூலம் தேர்தலை முன்னிட்டு தமிழக வெற்றிக் கழகம் முழு வீச்சில் களமிறங்கியிருப்பது அரசியல் வட்டாரங்களில் கவனம் ஈர்த்துள்ளது.