தமிழக சட்டசபைத் தேர்தல் முடிவுகள் வெளியாகியுள்ள நிலையில், நடிகர் விஜய் தலைமையிலான தமிழக வெற்றிக் கழகம் (தவெக) 108 இடங்களை கைப்பற்றி மிகப்பெரிய தனிக்கட்சியாக உருவெடுத்துள்ளது. ஆனால் ஆட்சியை அமைக்க தேவையான 118 என்ற பெரும்பான்மை எண்ணிக்கையை எட்ட இன்னும் ஆதரவு தேவைப்படும் சூழல் உருவாகியுள்ளது.

தமிழக சட்டப்பேரவையில் மொத்தம் 234 தொகுதிகள் உள்ளன. அதில் 118 இடங்கள் இருந்தாலே தனிப்பெரும்பான்மையுடன் ஆட்சி அமைக்க முடியும். தற்போதைய நிலவரப்படி தவெக 108 இடங்களில் வெற்றி பெற்றுள்ளது. விஜய் இரண்டு தொகுதிகளில் வெற்றி பெற்றிருந்தால், அரசியலமைப்பு விதிகளின்படி ஒரு தொகுதியை ராஜினாமா செய்ய வேண்டியிருக்கும். அதனால் கட்சியின் எண்ணிக்கை 107 ஆக குறையும். இதனால் குறைந்தபட்சம் 11 உறுப்பினர்களின் ஆதரவு அவசியமாகிறது.

இந்த சூழலில், யார் தவெகவுக்கு ஆதரவு தரப்போகிறார்கள் என்பதே முக்கிய அரசியல் கேள்வியாக மாறியுள்ளது.

அரசியல் கணக்குப்படி, காங்கிரஸ் (5), விசிக (2), சிபிஐ (2), சிபிஎம் (2) ஆகிய கட்சிகள் இணைந்து ஆதரவு அளித்தால் தவெக 118 என்ற எண்ணிக்கையை எட்ட முடியும். இந்த அமைப்பு சாத்தியமான ஒன்றாக பார்க்கப்படுகிறது, ஏனெனில் இக்கட்சிகள் திமுக கூட்டணியில் இருந்தாலும் தங்களுக்கான அரசியல் இடத்தை பாதுகாக்க புதிய முடிவுகளை எடுத்துக்கொள்ளலாம் என்ற மதிப்பீடு நிலவுகிறது.

மற்றொரு கணக்கில், காங்கிரஸ், பாமக, சிபிஐ, சிபிஎம் ஆகிய கட்சிகளின் ஆதரவும் தவெகவுக்கு உதவக்கூடும். ஆனால் விசிக மற்றும் பாமக ஒரே அணியில் வருவது கொள்கை ரீதியாக சாத்தியமற்றது என அரசியல் பார்வையாளர்கள் கருதுகின்றனர்.

தேமுதிக மற்றும் இந்திய யூனியன் முஸ்லிம் லீக் போன்ற சிறிய கட்சிகளும் இப்போது முக்கியமான ‘கிங் மேக்கர்’ நிலைக்கு வந்துள்ளன. குறிப்பாக குறைந்த எண்ணிக்கையிலான ஆதரவே ஆட்சியை நிர்ணயிக்கும் நிலையில், ஒவ்வொரு எம்எல்ஏவின் ஆதரவும் மிகப்பெரிய மதிப்பை பெறுகிறது.

திமுக அல்லது அதிமுக நேரடியாக வெளியில் இருந்து ஆதரவு தருவது அரசியல் ரீதியாக சாத்தியமற்றதாகவே பார்க்கப்படுகிறது. எனவே, அவர்களது கூட்டணிக் கட்சிகளுடனான பேச்சுவார்த்தைகள்தான் விஜய்க்கு முக்கியமாக இருக்கும்.

ஆட்சியை அமைக்க அழைப்பு விடுக்கும் பொழுது, ஆளுநரிடம் தவெக தனது ஆதரவு பட்டியலை சமர்ப்பிக்க வேண்டியிருக்கும். அதன் பிறகு சட்டசபையில் நடைபெறும் நம்பிக்கை வாக்கெடுப்பில்தான் இறுதி முடிவு தெரியும்.

தமிழக அரசியல் இப்போது புதிய கட்டத்துக்குள் நுழைந்துள்ளது. விஜய் தனது முதல் தேர்தலிலேயே ஆட்சிக்கருகில் வந்திருப்பது மிகப்பெரிய அரசியல் நிகழ்வாகக் கருதப்படுகிறது. ஆனால் அந்த அரியணையில் அமர, அடுத்த சில நாட்களில் நடைபெறும் கூட்டணி பேச்சுவார்த்தைகளே முடிவை தீர்மானிக்கப் போகின்றன.