''ஜெம் கிரானைட்ஸ் வழக்குகளில் சிறைக்குள் நடக்கும் ரகசிய விசாரணைகள் காவல் துறையினராலேயே ஊடகங்கள் மூலம் வெளியில் கசியவிடப்படுகின்றன. காவல் துறை அதிகாரிகள் இரு பிரிவுகளாகப் பிரிந்து செயல்படுவது நிர்வாகக் சீர்கேட்டைக் காட்டுகிறது. 'ஜெம்' நிறுவனர் வீரமணி மீதான வழக்கில் சிபிஐ விசாரணை நடத்த வேண்டும்.''என தமிழக பாஜகவின் தலைமை செய்தித் தொடர்பாளர் நாராயணன் திருப்பதி வலியுறுத்தியுள்ளார்.

இன்று சென்னை கமலாலயத்தில் செய்தியாளர்களிடம் பேசிய நாராயணன் திருப்பதி மேலும் கூறியதாவது;

தமிழகத்தில் தற்போதைய தவெக அரசிடம் நிர்வாகத் திறனோ, தொலைநோக்குப் பார்வையோ இல்லாததால் மக்கள் அன்றாடம் பெரும் அவதிக்குள்ளாகி வருகின்றனர் என்று விமர்சித்துள்ளார். அனைத்துத் துறைகளிலும் தோல்வியடைந்துள்ள இந்த தவெக அரசை பாரதிய ஜனதா கட்சி வன்மையாகக் கண்டிக்கிறதாகவும் குறிப்பிட்டுள்ளார்.

அத்துடன், போக்சோ வழக்குகளில் அலட்சியம் காட்ட கூடாது என்றும், ஜெம் கிரானைட்ஸ் வழக்குகளில் சிறைக்குள் நடக்கும் ரகசிய விசாரணைகள் காவல் துறையினராலேயே ஊடகங்கள் மூலம் வெளியில் கசியவிடப்படுகின்றன. காவல் துறை அதிகாரிகள் இரு பிரிவுகளாகப் பிரிந்து செயல்படுவது நிர்வாகக் சீர்கேட்டைக் காட்டுகிறது என்று சுட்டிக்காட்டியுள்ளார்.

மேலும், கடந்த ஐந்து ஆண்டுகளுக்கு முன்பு நடந்த 'சிவசங்கர் பாபா' போன்ற போலி சாமியார்களின் போக்சோ வழக்குகள் இன்னும் நீதிமன்ற விசாரணைக்கே வராமல் முடக்கப்பட்டுள்ளன என்றும், போக்சோ வழக்குகளை 1-2 ஆண்டுகளுக்குள் முடிக்க வேண்டும் என்ற உச்ச நீதிமன்ற உத்தரவை இந்த அரசு காற்றில் பறக்கவிட்டுள்ளதாகவும், குற்றவாளிகள் தப்பிப்பதையும், ஆதாரங்கள் அழிக்கப்படுவதையும் தடுக்க வீரமணி வழக்கு உடனடியாக சிபிஐ விசாரணைக்கு மாற்ற வேண்டும் என்று வலியுறுத்தியுள்ளார்.

தொடர்ந்து பேசிய நாராயணன் திருப்பதி, கிராமப்புற ஏழை மாணவர்களின் நல்வாழ்வுக்கு நவோதயா பள்ளிகளுக்கு அனுமதி தர வேண்டும் என்றும், நவோதயா பள்ளிகள் அமைந்தால் திராவிட முன்னேற்றக் கழகத்தைச் சேர்ந்தவர்களின் மற்றும் அவர்களின் அபிமானிகளின் தனியார் பள்ளி வியாபாரம் கெட்டுப்போய்விடும் என்ற ஒரே காரணத்துக்காக இப்பள்ளிகள் திட்டமிட்டு எதிர்க்கப்படுகின்றன என்று குற்றம் சுமத்தியுள்ளார்.

அதாவது, நவோதயா பள்ளிகளில் 6 முதல் 8-ஆம் வகுப்பு வரை தாய்மொழி வழிக் கல்வியும், 8 முதல் 10 வரை தமிழ் பாடமும் கட்டாயம் என மத்திய அரசு நீதிமன்றத்தில் எழுத்துப்பூர்வமாக உறுதி அளித்துள்ளதை குறிப்பிட்டு பேசியுள்ளார்.

ஏழை மற்றும் கிராமப்புற மாணவர்களுக்குக் சர்வதேச தரத்திலான கல்வி கிடைக்க வேண்டும். எனவே, முதல்வர் விஜய், இந்த விவகாரத்தில் பின்னாலிருந்து தவறான வழிநடத்துதலைத் தரும் சக்திகளைப் புறந்தள்ளி, உயர் நீதிமன்ற உத்தரவுப்படி 03 மாத காலத்துக்குள் நவோதயா பள்ளிகளுக்கான இடங்களை வழங்க வேண்டும் என்று கோரிக்கை வைத்துள்ளார்.

அரசு மருத்துவமனைகளில் குறைப்பிரசவத்தில் பிறக்கும் குழந்தைகளைக் காப்பாற்றத் தேவைப்படும் 'சர்பேக்டன்ட்' போன்ற அத்தியாவசியத் திரவ மருந்துகள் கடந்த 3, 4 மாதங்களாகக் கிடைக்காமல் தட்டுப்பாடு நிலவுகிறதாகவும், இது சுகாதாரத் துறையின் மிக மோசமான நிர்வாகத் தோல்வியாகும் என்று விமர்சித்துள்ளார்.

உடனடியாக அரசு மருத்துவமனைகளில் மருந்து தட்டுப்பாட்டைப் போக்கி, பச்சிளம் குழந்தைகளின் உயிரைக் காக்க நடவடிக்கை எடுக்க வேண்டும் என்று கேட்டுக்கொண்டுள்ளார்.

அத்துடன், தமிழகத்தில் ஹெல்மெட் அணியாமல் செல்வது, ஒருவழிப் பாதையில் எதிரே வருவது, இருசக்கர வாகனத்தில் மூவர்/நால்வர் செல்வது போன்ற விதிமீறல்களால் விபத்துகளும் உயிரிழப்புகளும் அதிகரித்துள்ளன. காவல் துறை வெறும் அபராதம் வசூலிப்பதில் மட்டுமே குறிக்கோளாக உள்ளதாகவும், குற்றங்களையும் விபத்துகளையும் முன்கூட்டியே தடுக்கத் தவறிவிட்டு, "குற்றவாளிகளைக் கண்டுபிடித்துவிட்டோம்" என முதல்வர் காலரைத் தூக்கிக் கொள்வது பெருமைக்குரியது அல்ல. இது காவல் துறையின் தோல்வியை காட்டுகிறது என்று கடுமையாக தாக்கி பேசியுள்ளார்.

மேலும், தமிழக அரசின் புள்ளிவிவரங்களின்படியே, மருத்துவமனைகள், திருவிழாக்கள் மற்றும் பொது இடங்களில் பெண் குழந்தைகள் மற்றும் பச்சிளம் குழந்தைகள் கடத்தப்படுவது அண்மைக்காலமாக மிகவும் அதிகரித்துள்ளதாகவும் சுட்டிக்காட்டியுள்ளார்.

2014-க்கு முன்பு இருந்த மோசமான மின் தட்டுப்பாட்டை பிரதமர் நரேந்திர மோடியின் அரசு, மத்திய தொகுப்பு மற்றும் புதுப்பிக்கத்தக்க ஆற்றல் உதவிகள் மூலம் சீரமைத்தது. ஆனால், இந்த தவேக ஆட்சியில் முறையான திட்டமிடல் இல்லாததால் மீண்டும் மின்வெட்டு அரங்கேறி வருவது கண்டிக்கத்தக்கது என்று நாராயணன் திருப்பதி தெரிவித்துள்ளார்.

இந்த அரசின் சட்டம் - ஒழுங்கு சீர்கேட்டைப் பற்றி கம்யூனிஸ்டுகள், காங்கிரஸ் மற்றும் விசிக போன்ற கூட்டணி கட்சிகளே வெளியில் விமர்சிக்கிறார்கள், ஆனால், ஆட்சியை ஆதரிக்கிறார்கள். இது வெறும் தேர்தல் பேரம் பேசுவதற்காக நடத்தப்படும் பொம்மலாட்ட நாடகம் என்பதை மக்கள் புரிந்து வைத்துள்ளதகவலும் குறிப்பிட்டுள்ளார்.

அத்துடன், முதல்வர் விஜய் தொடர் வேலை செய்வதினால் மன அழுத்தம் ஏற்ப்பட்டு அதைப் போக்க லண்டன் சென்றார் என்றால் ஏற்றுக்கொள்ளலாம். ஆனால், அரசு முறைப் பயணம் என்று கூறி லண்டன் சென்ற அமைச்சர்கள், அங்கு என்ன முதலீடுகளை ஈர்த்தார்கள் என்ற வெள்ளை அறிக்கையை இதுவரை வெளியிடவில்லை என்று சுட்டிக்காட்டியதோடு, நாட்டுக்கு தேவையான முதலீடுகளை ஈர்க்காமல் கார் ரேஸ் போன்ற ஆடம்பர விளையாட்டுக்களை காண சென்றது கண்டிக்கத்தக்கது என்று  தமிழக பாஜகவின் தலைமை செய்தித் தொடர்பாளர் நாராயணன் திருப்பதி காட்டமாக தெரிவித்துள்ளார்.