இந்திய அரசியலில் தற்போது முக்கிய தேசிய கட்சிகளாக காங்கிரஸ் மற்றும் பாஜக செயல்பட்டு வருகின்றன. நாடாளுமன்றத் தேர்தலாக இருந்தாலும், மாநில சட்டமன்றத் தேர்தலாக இருந்தாலும், இந்த இரண்டு கட்சிகளும் பொதுவாக மாநிலங்களில் உள்ள பிராந்திய கட்சிகளுடன் கூட்டணி அமைத்து தேர்தலை எதிர்கொள்வது வழக்கமாக இருந்து வருகிறது.

அவ்வாறு கூட்டணி அமைக்கப்படும் போது, மாநில அளவிலான அரசியல் சூழ்நிலைக்கு ஏற்ப அந்த மாநிலத்தில் செல்வாக்கு கொண்ட கட்சியே கூட்டணியை வழிநடத்துவது என்பது பாரம்பரியமாக இருந்து வந்த நடைமுறை. ஆனால் சமீப கால தேர்தல்களில் பாஜக கூட்டணி அமைக்கும் மாநிலக் கட்சிகளின் செல்வாக்கை குறைத்து, தன்னை முன்னிறுத்தும் வகையில் செயல்பட்டு வருகிறது என்ற விமர்சனங்கள் அரசியல் வட்டாரங்களில் எழுந்துள்ளன.

வட இந்திய மாநிலங்களில் இந்த அரசியல் யுக்தியை ஓரளவு வெற்றிகரமாக செயல்படுத்தியதாகக் கூறப்படும் பாஜக, தற்போது தென் இந்திய மாநிலங்களிலும் அதே அணுகுமுறையைப் பயன்படுத்த முயற்சித்து வருகிறது. ஆந்திரப் பிரதேசம், தெலுங்கானா மற்றும் கர்நாடகா போன்ற மாநிலங்களில் இது ஒரு அளவிற்கு செயல்பட்டதாக அரசியல் பார்வையாளர்கள் கூறுகின்றனர். இதே மாதிரியான அரசியல் திட்டத்தை தற்போது தமிழகத்திலும் செயல்படுத்த முயற்சி நடப்பதாகவும் பேசப்படுகிறது.

2026 சட்டமன்றத் தேர்தலை முன்னிட்டு அதிமுக தலைமையிலான தேசிய ஜனநாயக கூட்டணியில் பாஜக இடம்பெற்றுள்ளது. வெளிப்படையாக கூட்டணியின் தலைமையாக அதிமுக இருப்பதாக கூறப்பட்டாலும், பல முக்கிய முடிவுகள் டெல்லியில் நடைபெற்ற ஆலோசனைகளின் பின்னரே எடுக்கப்பட்டதாக தகவல்கள் வெளியாகியுள்ளன. குறிப்பாக தொகுதி பங்கீடு உள்ளிட்ட விவகாரங்களில் பாஜக தலைமை முக்கிய பங்கு வகித்ததாக அரசியல் வட்டாரங்கள் கூறுகின்றன.

இதற்கிடையில் கூட்டணியில் உள்ள சிறிய கட்சிகள் எந்த சின்னத்தில் போட்டியிடும் என்பது தற்போது முக்கிய விவாதமாக மாறியுள்ளது. வழக்கமாக அங்கீகரிக்கப்படாத சிறிய கட்சிகள், கூட்டணியை வழிநடத்தும் மாநிலக் கட்சியின் சின்னத்தில் போட்டியிடுவது பழக்கம். தமிழகத்தில் கலைஞர் கருணாநிதி மற்றும் ஜெயலலிதா காலத்திலும் இந்த நடைமுறை பின்பற்றப்பட்டது.

ஆனால் இந்த முறை அந்த மரபை மாற்ற முயற்சி நடக்கிறது என்ற தகவல்கள் வெளியாகியுள்ளன. அதாவது தேசிய ஜனநாயக கூட்டணியில் உள்ள சில சிறிய கட்சிகள் இரட்டை இலை சின்னத்தில் அல்லாமல், தாமரை சின்னத்தில் போட்டியிடலாம் என்ற பேச்சு அரசியல் வட்டாரங்களில் பரவியுள்ளது.

பாஜகவிற்கு ஏற்கனவே 27 தொகுதிகள் ஒதுக்கப்பட்டுள்ளன. அதேபோல் தமிழ் மாநில காங்கிரசுக்கு 5 தொகுதிகள் வழங்கப்பட்டுள்ளன. இந்த தொகுதிகளில் போட்டியிடும் வேட்பாளர்களில் பலர் தாமரை சின்னத்தில் போட்டியிட வாய்ப்பு உள்ளதாக கூறப்படுகிறது. மேலும் கூட்டணியில் உள்ள ஐஜேகே, புதிய நீதி கட்சி, தென்னிந்திய பார்வர்ட் பிளாக், புதிய தமிழகம் போன்ற கட்சிகளும் தாமரை சின்னத்தில் போட்டியிடலாம் என தகவல்கள் தெரிவிக்கின்றன.

இவ்வாறு 30க்கும் மேற்பட்ட வேட்பாளர்கள் தாமரை சின்னத்தில் போட்டியிட்டால், அவர்களில் சிலர் வெற்றி பெற்று சட்டமன்றத்திற்கு சென்றால், அவர்கள் கூட்டணிக் கட்சியைச் சேர்ந்தவர்களாக இருந்தாலும், சட்டமன்றத்தில் அவர்கள் பாஜக உறுப்பினர்களாகவே கருதப்படுவார்கள் என்ற அரசியல் கணக்கீடு இருப்பதாக கூறப்படுகிறது.

இதன் மூலம் எந்த கட்சி ஆட்சிக்கு வந்தாலும், சட்டமன்றத்தில் பாஜகவின் குரல் வலுவாக ஒலிக்க வேண்டும் என்பதே இந்த திட்டத்தின் நோக்கம் என அரசியல் விமர்சகர்கள் கருத்து தெரிவிக்கின்றனர்.

அதனால், இந்த தேர்தல் தமிழகத்தில் பாஜக தனது அரசியல் அடித்தளத்தை வலுப்படுத்த முயற்சிக்கும் முக்கிய கட்டமாக இருக்கலாம் என்றும், எதிர்காலத்தில் மாநில அரசியலில் பெரிய சக்தியாக உருவாகும் நோக்கில் இந்த வியூகம் அமைக்கப்பட்டிருக்கலாம் என்றும் அரசியல் வட்டாரங்கள் மதிப்பிடுகின்றன.