தமிழ் திரைப்பட இசை உலகில் காலத்தால் அழியாத பாடல்களில் ஒன்றாகத் திகழ்வது “கண்ணே கலைமானே”. இயக்குநர் பாலுமகேந்திரா இயக்கிய மூன்றாம் பிறை திரைப்படத்தில் இடம்பெற்ற இந்தப் பாடல், இசைஞானி இளையராஜாவின் இசையிலும், கவிஞர் கண்ணதாசனின் வரிகளிலும் உருவான ஒரு அழியாத கலைப் பொக்கிஷமாக கருதப்படுகிறது.

இந்தப் பாடலுக்கு இன்னொரு வரலாற்று முக்கியத்துவமும் உள்ளது. கவிஞர் கண்ணதாசன் தனது வாழ்க்கையில் எழுதிய கடைசி திரைப்படப் பாடல் இதுவே என்பது ரசிகர்களை இன்றும் நெகிழச் செய்கிறது.

இந்தப் பாடல் உருவான தருணத்தைப் பற்றி இசைஞானி இளையராஜா பல மேடைகளில் நெகிழ்ச்சியுடன் கூறியுள்ளார். ஒரு நாள் அவர் இந்தப் பாடலுக்கான மெட்டையை வாசித்து காட்டியபோது, அதை கேட்ட கண்ணதாசன்
“ராஜா, இந்த மெட்டுக்கு நான் இப்போதே வரிகளை எழுதிவிடுகிறேன்” என்று கூறி அங்கேயே அமர்ந்து எழுதத் தொடங்கியதாக கூறப்படுகிறது.

அந்த காலத்தில் கண்ணதாசனின் உடல்நிலை ஏற்கனவே பாதிக்கப்பட்டிருந்தது. இருப்பினும், அவர் மிக இயல்பாகவும், ஆழ்ந்த உணர்வோடும் அந்த வரிகளை எழுதியதாக இளையராஜா நினைவுகூர்ந்துள்ளார்.

இந்தப் பாடலில் இடம்பெறும்“காதல் கொண்டேன் கனவினை வளர்த்தேன்…கண்மணி உனை நான் கருத்தினில் பதித்தேன்…”
போன்ற வரிகள் இன்று வரை ரசிகர்களின் மனதில் ஆழமாக பதிந்துள்ளன.

பாடல் பதிவு நடைபெற்றபோது கண்ணதாசன் நேரில் இல்லை. அவர் உடல்நலக்குறைவால் மருத்துவமனையில் அனுமதிக்கப்பட்டிருந்ததாக கூறப்படுகிறது. பாடலை இசையமைக்கும் போது அது ஒரு தாலாட்டு போலவும், அதே சமயம் ஆழ்ந்த சோக உணர்வையும் தர வேண்டும் என்று இளையராஜா விரும்பியிருந்தார்.

இந்தப் பாடலை கே.ஜே. யேசுதாஸ் தனது இனிமையான குரலில் பாடிய விதம் பாடலுக்கு மேலும் ஒரு தெய்வீகத் தன்மையை அளித்தது. குறிப்பாக“கண்ணே கலைமானே…”என்ற அழைப்பில் தாயன்பும், காதலும், ஏக்கமும் ஒன்றாக கலந்து இருப்பதாக இசை ரசிகர்கள் கூறுகின்றனர்.

கண்ணதாசன் மறைந்த பிறகு இந்தப் பாடலைக் கேட்கும் போது,“அவர் தனது வாழ்க்கையின் இறுதி உணர்வுகளை முன்கூட்டியே உணர்ந்து எழுதியாரோ?” என்ற கேள்வி பலருக்கும் தோன்றும் என்று இளையராஜா கூறியுள்ளார்.

இன்றும் இந்தப் பாடல் ஒலிக்கும் இடமெல்லாம் கண்ணதாசனின் கவித்துவமும், இளையராஜாவின் இசை மாயமும் இணைந்து தமிழ் இசை உலகில் என்றும் நிலைத்து நிற்கின்றன.