தென் மாநிலங்கள் மற்றும் யூனியன் பிரதேசங்களின் முதல்வர்கள் பங்கேற்கும் முக்கியத்துவம் வாய்ந்த தென் மண்டல கவுன்சில் உச்சிமாநாடு, மத்திய உள்துறை அமைச்சர் அமித் ஷா தலைமையில் சென்னையில் நடைபெற உள்ளது.

சென்னை கிழக்கு கடற்கரைச் சாலையில் உள்ள கோவளம் பகுதியில் அமைந்துள்ள சொகுசு விடுதியில், இந்த மாதம் 19 மற்றும் 20-ம் தேதிகளில் இரண்டு நாட்கள் மாநாடு நடைபெற திட்டமிடப்பட்டுள்ளது. மத்திய உள்துறை அமைச்சகத்தின் சார்பில் ஏற்பாடு செய்யப்படும் இந்த மாநாடு, தென் மாநிலங்களுக்கு இடையேயான ஒருங்கிணைப்பை வலுப்படுத்தும் முக்கிய ஆலோசனைக் கூட்டமாக பார்க்கப்படுகிறது.

சுமார் மூன்று ஆண்டுகளுக்குப் பிறகு நடைபெறும் இந்த மாநாட்டில் தமிழ்நாடு, கேரளா, கர்நாடகா, தெலங்கானா மற்றும் புதுச்சேரி உள்ளிட்ட தென் மாநிலங்களின் முதல்வர்கள் மற்றும் நிர்வாகத் தலைவர்கள் பங்கேற்க உள்ளதாக கூறப்படுகிறது. தமிழ்நாடு சார்பில் முதல்வர் விஜய்யும் மாநாட்டில் பங்கேற்கிறார்.

முதல்வர்களுடன் அந்தந்த மாநிலங்களின் தலைமைச் செயலாளர்கள், உள்துறைச் செயலாளர்கள், காவல்துறை உயர் அதிகாரிகள் உள்ளிட்ட முக்கிய அதிகாரிகளும் கலந்துகொள்ள உள்ளனர். இதன் மூலம் அரசியல் தலைமைக்கும் நிர்வாக அமைப்புகளுக்கும் இடையே நேரடி ஆலோசனை மற்றும் ஒருங்கிணைப்பு ஏற்படும் என எதிர்பார்க்கப்படுகிறது.

இரண்டு நாள் மாநாட்டில் கடலோரப் பாதுகாப்பு முக்கிய விவாதப் பொருளாக இடம்பெற உள்ளது. தென்னிந்திய மாநிலங்கள் நீண்ட கடலோர எல்லையை கொண்டுள்ள நிலையில், கடல்வழி கண்காணிப்பை வலுப்படுத்துதல், கடலோரக் காவல் நிலையங்களின் உள்கட்டமைப்பை மேம்படுத்துதல், நவீன தொழில்நுட்பங்களை அதிக அளவில் பயன்படுத்துதல் உள்ளிட்ட நடவடிக்கைகள் குறித்து ஆலோசிக்கப்பட உள்ளன.

மேலும், கடல்வழி கடத்தல் மற்றும் பிற சட்டவிரோத நடவடிக்கைகளை கட்டுப்படுத்த மாநிலங்களுக்கு இடையே ஒருங்கிணைந்த பாதுகாப்பு நடவடிக்கைகளை மேற்கொள்வது குறித்தும் விவாதிக்கப்பட உள்ளது.

இதுதவிர, மாநிலங்களுக்கு இடையேயான நதிநீர் பிரச்சனைகள், பேரிடர் காலங்களில் மத்திய-மாநில ஒருங்கிணைப்பு, மின்சார விநியோகம், சாலை மற்றும் ரயில்வே உள்கட்டமைப்பு, எல்லை தாண்டிய சட்டவிரோத நடவடிக்கைகள் உள்ளிட்ட பல்வேறு முக்கிய பிரச்சனைகளும் மாநாட்டின் நிகழ்ச்சி நிரலில் இடம்பெற உள்ளதாக கூறப்படுகிறது.

தென் மாநிலங்களின் வளர்ச்சி, பாதுகாப்பு மற்றும் மாநிலங்களுக்கு இடையேயான ஒத்துழைப்பை மேம்படுத்தும் வகையில் நடைபெறும் இந்த மாநாடு, பிராந்திய அளவில் முக்கியத்துவம் வாய்ந்ததாக பார்க்கப்படுகிறது. குறிப்பாக, நதிநீர், உள்கட்டமைப்பு மற்றும் பாதுகாப்பு போன்ற நீண்டகால பிரச்சனைகளில் மாநிலங்களுக்கிடையே ஒருங்கிணைந்த அணுகுமுறையை உருவாக்க இந்தக் கூட்டம் முக்கிய வாய்ப்பாக அமையும் என எதிர்பார்க்கப்படுகிறது.