தமிழ்நாட்டில் புதிய தொழில் மற்றும் முதலீட்டுத் திட்டங்களை விரைவாக செயல்படுத்தும் வகையில் தமிழக அரசு கொண்டு வந்த சட்டத் திருத்தத்துக்கு ஆளுநர் ஆர்.என். ரவி அல்ல, தற்போதைய ஆளுநர் அர்லேகர் ஒப்புதல் வழங்கியுள்ளதாக தெரிவிக்கப்பட்டுள்ளது. இதுதொடர்பான அறிவிப்பும் அரசிதழில் வெளியிடப்பட்டுள்ளது. தொழில் தொடங்குவதற்குத் தேவையான பல்வேறு துறைகளின் அனுமதிகளைப் பெறுவதில் ஏற்படும் காலதாமதத்தை குறைத்து, தமிழகத்தின் முதலீட்டுச் சூழலை மேலும் எளிதாக்குவதே இந்த சட்டத் திருத்தத்தின் முக்கிய நோக்கமாகும்.

தமிழ்நாட்டில் தொழில்துறை முதலீடுகள் தொடர்ந்து அதிகரித்து வந்தது மாநிலத்தின் பொருளாதார வளர்ச்சிக்கு முக்கிய காரணிகளில் ஒன்றாக பார்க்கப்படுகிறது. தமிழகத்தில் நிலவும் தொழில் முதலீட்டு சூழல் குறித்து ஆந்திர முதலமைச்சர் சந்திரபாபு நாயுடுவின் மகனும், அம்மாநில அமைச்சருமான நாரா லோகேஷ் உள்ளிட்டோரும் ஏற்கனவே கருத்து தெரிவித்திருந்தனர். இந்த நிலையில், புதிதாக அமைந்துள்ள தமிழக வெற்றிக் கழக அரசும் மாநிலத்துக்கு அதிக முதலீடுகளை ஈர்ப்பதற்கான நடவடிக்கைகளை மேற்கொண்டு வருகிறது.

இதன் ஒரு பகுதியாக தமிழ்நாடு வணிக எளிதாக்கல் (திருத்த) சட்டம், 2026 கொண்டு வரப்பட்டது. புதிய தொழில் மற்றும் முதலீட்டுத் திட்டங்களை விரைவாக செயல்படுத்தும் நோக்கில் உருவாக்கப்பட்ட இந்த சட்டத் திருத்தத்துக்குத்தான் தற்போது ஆளுநர் அர்லேகர் ஒப்புதல் வழங்கியுள்ளதாக கூறப்படுகிறது. இதற்கான அரசிதழ் வெளியீடும் தற்போது வெளியாகியுள்ளது.

இந்த சட்டத் திருத்தத்தின் முக்கிய அம்சங்களில் ஒன்றாக “தமிழ்நாடு முதலீட்டு ஊக்குவிப்பு ஆணையம்” என்ற புதிய அமைப்பு உருவாக்கப்படுகிறது. இந்த ஆணையத்தின் தலைவராக தமிழக அரசின் தலைமைச் செயலாளர் செயல்படுவார். தொழில்கள், முதலீட்டு ஊக்குவிப்பு மற்றும் வர்த்தகத் துறையை கவனிக்கும் அரசு செயலாளர், ஆணையத்தின் உறுப்பினர்-ஒருங்கிணைப்பாளராக இருப்பார். இதுதவிர, அரசு வகுக்கும் நடைமுறைகளின்படி அதிகபட்சமாக 20 உறுப்பினர்கள் வரை இந்த ஆணையத்தில் நியமிக்கப்படலாம்.

தமிழ்நாட்டில் அதிக அளவில் முதலீட்டையும் வேலைவாய்ப்பையும் உருவாக்கக்கூடிய முக்கியமான தொழில் திட்டங்களை இந்த ஆணையம் தொடர்ந்து கண்காணிக்கும். குறிப்பாக ரூ.200 கோடி அல்லது அதற்கு மேல் மூலதன முதலீடு செய்யப்படும் திட்டங்கள், குறைந்தபட்சம் 5,000 பேருக்கு வேலைவாய்ப்பு உருவாகும் என எதிர்பார்க்கப்படும் திட்டங்கள், எப்.டி.ஏ. வர்த்தக ஒப்பந்தங்களுடன் தொடர்புடைய முதலீடுகள் மற்றும் இந்தியாவுக்கு வெளியே வசிக்கும் தமிழர் வம்சாவளியினரின் முதலீடுகள் ஆகியவை முக்கிய முதலீட்டுத் திட்டங்களாகக் கருதப்படும்.

ஒரு முதலீட்டுத் திட்டம் தொடங்குவதற்கு முன்பான ஆரம்ப கட்டத்தில் இருந்து, அந்த திட்டம் முழுமையாக செயல்பாட்டுக்கு வந்து உற்பத்தி அல்லது வணிக நடவடிக்கைகள் தொடங்கும் நிலை வரை ஆணையம் தொடர்ந்து கண்காணிக்கும். குறிப்பாக பெரிய முதலீட்டுத் திட்டங்களுக்கு தேவையான அரசு அனுமதிகள், சலுகைகள் மற்றும் பிற ஒப்புதல்கள் உரிய காலத்துக்குள் கிடைப்பதை உறுதி செய்வதற்காக சம்பந்தப்பட்ட துறைகளுக்கு ஆணையம் உத்தரவுகளை பிறப்பிக்கவும் முடியும்.

மேலும், தொழில் திட்டங்களுக்காக ஏற்கெனவே ஒதுக்கப்பட்டிருந்தும் இதுவரை வணிக நடவடிக்கைகள் தொடங்கப்படாத நிலங்களின் ஒதுக்கீடு மற்றும் பயன்பாடு குறித்தும் இந்த ஆணையம் ஆய்வு செய்யும். தொழில் தொடங்குவதற்கான நிலம் உள்ளிட்ட அடிப்படை வசதிகள் இருந்தும் திட்டங்கள் நீண்ட காலமாக செயல்பாட்டுக்கு வராமல் இருந்தால், அதற்கான காரணங்களையும் ஆணையம் ஆய்வு செய்யும் வகையில் இந்த அமைப்பு செயல்பட உள்ளது.

தமிழ்நாட்டில் முதலீடு செய்வதற்கும் தொழில் தொடங்குவதற்கும் சாதகமான சூழலை உருவாக்கும் வகையில், கொள்கைகள், விதிமுறைகள் மற்றும் நிர்வாக நடைமுறைகளில் செய்ய வேண்டிய மாற்றங்கள் குறித்தும் இந்த ஆணையம் தமிழக அரசுக்கு பரிந்துரைகளை வழங்கும். இதன் மூலம் தொழில் நிறுவனங்கள் எதிர்கொள்ளும் நிர்வாகத் தடைகளை குறைத்து, புதிய முதலீடுகளை வேகமாக செயல்படுத்த முடியும் என அரசு எதிர்பார்க்கிறது.

இந்த சட்டத் திருத்தத்தில் அரசு அனுமதிகளுக்கான காலக்கெடுவும் முக்கியமாக மாற்றப்பட்டுள்ளது. குறிப்பிட்ட அனுமதியை வழங்குவதற்கு ஏற்கெனவே 21 நாட்களுக்கு மேல் கால அவகாசம் நிர்ணயிக்கப்பட்டிருந்தால், அந்த காலக்கெடு 21 நாட்களாக குறைக்கப்பட்டதாக கருதப்படும். அதேபோல், ஒரு குறிப்பிட்ட அனுமதியை வழங்குவதற்கு எந்த காலக்கெடுவும் நிர்ணயிக்கப்படவில்லை என்றாலும், அந்த அனுமதியை வழங்குவதற்கான காலவரம்பு 21 நாட்களாக கருதப்படும் வகையில் சட்டத் திருத்தம் செய்யப்பட்டுள்ளதாக தெரிவிக்கப்பட்டுள்ளது.

இந்த 21 நாட்கள் கணக்கீட்டில் அரசு அறிவிக்கும் பொது விடுமுறை மற்றும் உள்ளூர் விடுமுறை நாட்கள் சேர்க்கப்படாது. இதனால் தொழில் நிறுவனங்கள் அரசு அனுமதிகளுக்காக நீண்ட காலம் காத்திருக்க வேண்டிய நிலையை குறைக்க முடியும் என எதிர்பார்க்கப்படுகிறது.

மொத்தத்தில், பெரிய முதலீட்டுத் திட்டங்களை தனியாக கண்காணிப்பது, துறைகளுக்கு இடையிலான ஒருங்கிணைப்பை அதிகரிப்பது, அரசு அனுமதிகளுக்கான காலதாமதத்தை குறைப்பது என தொழில் முதலீடுகளுக்கு சாதகமான நிர்வாக கட்டமைப்பை உருவாக்குவதே இந்த சட்டத் திருத்தத்தின் நோக்கமாக உள்ளது. இதன் மூலம் தமிழ்நாட்டுக்கு புதிய முதலீடுகள், தொழிற்சாலைகள் மற்றும் வேலைவாய்ப்புகளை அதிக அளவில் கொண்டு வர முடியும் என்பதே தமிழக அரசின் எதிர்பார்ப்பாக உள்ளது.