தமிழக வெற்றிக் கழகத்தின் (தவெக) தலைவர் விஜய் இன்று கடலூர் மாவட்டத்தில் மேற்கொள்ளவிருந்த பிரச்சாரம் ரத்து செய்யப்பட்டதைத் தொடர்ந்து, கும்மிடிப்பூண்டியில் நடைபெறவிருந்த அவரது அடுத்தக்கட்ட தேர்தல் பிரச்சாரமும் தற்போது ரத்து செய்யப்பட்டுள்ளது.

கடலூரைப் போலவே கும்மிடிப்பூண்டியிலும் பாதுகாப்பு காரணங்கள் மற்றும் காவல்துறையின் கடுமையான நிபந்தனைகளைச் சுட்டிக்காட்டி இந்தப் பயணம் தள்ளி வைக்கப்பட்டுள்ளதாகத் தவெக வட்டாரங்கள் தெரிவிக்கின்றன.

ஒரே நாளில் அடுத்தடுத்து இரண்டு முக்கியப் பிரச்சாரங்கள் ரத்து செய்யப்பட்டது தொண்டர்களிடையே பெரும் ஏமாற்றத்தை ஏற்படுத்தியுள்ளது.

கும்மிடிப்பூண்டி தொகுதி வேட்பாளரை ஆதரித்து விஜய் மேற்கொள்ளவிருந்த இந்தப் பயணத்திற்காக, கடந்த சில நாட்களாகவே கட்சியினர் பிரம்மாண்டமான வரவேற்பு ஏற்பாடுகளைச் செய்திருந்தனர்.

இருப்பினும், பிரச்சார வாகனத்தின் அளவு, செல்லும் வழித்தடம் மற்றும் நேரக் கட்டுப்பாடு தொடர்பாகக் காவல்துறை விதித்த கட்டுப்பாடுகள் தவெகவின் திட்டத்திற்குப் பெரும் முட்டுக்கட்டையாக அமைந்தன. போதிய பாதுகாப்பு வழங்க முடியாத சூழல் நிலவுவதாகக் கூறி, கடைசி நேரத்தில் அனுமதி மறுக்கப்பட்டதாகக் கூறப்படுகிறது.

கடந்த வாரம் பெரம்பூர் மற்றும் வில்லிவாக்கம் பகுதிகளில் விஜய்யின் பிரச்சாரங்களுக்கு அனுமதி மறுக்கப்பட்ட நிலையில், தற்போது கடலூர் மற்றும் கும்மிடிப்பூண்டி பயணங்களும் முடங்கியுள்ளன. இது திட்டமிட்ட அரசியல் பழிவாங்கும் நடவடிக்கை என்றும், தவெகவின் வளர்ச்சியைப் பிடிக்காத ஆளுங்கட்சியின் பின்னணியில் இத்தகைய தடைகள் உருவாக்கப்படுவதாகவும் அக்கட்சியின் பொதுச்செயலாளர் புஸ்ஸி ஆனந்த் உள்ளிட்ட நிர்வாகிகள் பகிரங்கமாகக் குற்றம் சாட்டியுள்ளனர். இதனால் சென்னை மற்றும் அதன் சுற்றுவட்டார மாவட்டங்களில் அரசியல் பதற்றம் அதிகரித்துள்ளது.

தேர்தலுக்கு இன்னும் மிகக் குறைவான நாட்களே உள்ள நிலையில், விஜய்யின் இந்தத் தொடர் பிரச்சார ரத்துகள் கட்சியின் தேர்தல் வியூகத்தைப் பாதிக்குமா என்ற கேள்வி எழுந்துள்ளது.