ராஜ்யசபா இடைத்தேர்தலுக்கான வேட்பு மனு தாக்கல் நாளை தொடங்க உள்ள நிலையில், தமிழக அரசியல் வட்டாரத்தில் புதிய எதிர்பார்ப்பு உருவாகியுள்ளது. சமீபத்தில் நடைபெற்ற சட்டமன்றத் தேர்தலில் வெற்றி பெற்று ஆட்சியை அமைத்துள்ள தமிழக வெற்றிக் கழகத்திற்கு (தவெக), தற்போது ராஜ்யசபாவுக்கு தனது முதல் பிரதிநிதியை அனுப்பும் வாய்ப்பு கிடைத்துள்ளது.

விழுப்புரம் மாவட்டத்தைச் சேர்ந்த முன்னாள் அமைச்சர் மற்றும் அதிமுக மூத்த தலைவர் சி.வி. சண்முகம், மயிலம் சட்டமன்றத் தொகுதியில் வெற்றி பெற்றதையடுத்து தனது மாநிலங்களவை உறுப்பினர் பதவியை ராஜினாமா செய்தார். அவரது பதவிக்காலம் 2028 வரை இருந்ததால், அந்த காலியிடத்தை நிரப்ப இடைத்தேர்தல் அறிவிக்கப்பட்டுள்ளது.

தேர்தல் ஆணைய அறிவிப்பின்படி, ஜூன் 1 முதல் வேட்பு மனு தாக்கல் தொடங்குகிறது. ஜூன் 8 வரை மனு தாக்கல் செய்யலாம். ஜூன் 11 வரை மனுவை வாபஸ் பெற வாய்ப்பு வழங்கப்பட்டுள்ளது. தேர்தல் ஜூன் 18ஆம் தேதி நடைபெற உள்ளது.

ஒரே ஒரு மாநிலங்களவை இடத்திற்கான இந்த தேர்தலில், சட்டமன்றத்தில் பெரும்பான்மை பலம் கொண்ட கட்சி அல்லது கூட்டணியின் வேட்பாளர் வெற்றி பெறுவது உறுதியாக கருதப்படுகிறது. தற்போது தவெகவுக்கு 107 எம்.எல்.ஏக்கள் உள்ளனர். கூட்டணிக் கட்சிகளான காங்கிரஸ், விசிக, கம்யூனிஸ்ட் கட்சிகளின் ஆதரவையும் சேர்த்தால் எண்ணிக்கை 119 ஆக உயர்கிறது. இதனால் தவெக ஆதரவு பெற்ற வேட்பாளர் வெற்றி பெறுவது உறுதி என அரசியல் வட்டாரங்கள் மதிப்பிடுகின்றன.

இதனால், தற்போது அனைவரது கவனமும் ஒரே கேள்வியை நோக்கி திரும்பியுள்ளது: முதலமைச்சர் விஜய் யாரை டெல்லிக்கு அனுப்பப் போகிறார்?

தவெகவின் அரசியல் ஆலோசகராகவும், தேர்தல் வியூகங்களை வடிவமைத்த முக்கிய நபராகவும் கருதப்படும் ஜான் ஆரோக்கியசாமியின் பெயர் முன்னணியில் இருப்பதாக கூறப்படுகிறது. தேசிய அரசியல் தொடர்புகள் மற்றும் நிர்வாக அனுபவம் காரணமாக அவர் ராஜ்யசபா உறுப்பினராக தேர்வு செய்யப்படலாம் என்ற எதிர்பார்ப்பு நிலவுகிறது.

நிர்வாக அனுபவம் மற்றும் சுத்தமான பொதுப் பிம்பம் கொண்ட நபர்களுக்கு முக்கியத்துவம் அளிக்க விரும்பும் விஜய், ஓய்வு பெற்ற ஐபிஎஸ் அதிகாரி ரவியையும் பரிசீலித்து வருவதாக தகவல்கள் தெரிவிக்கின்றன.

விஜய்யின் நீண்டகால நண்பரும் நம்பிக்கைக்குரியவருமான ஜெகதீஷின் பெயரும் பரிசீலனையில் இருப்பதாக கூறப்படுகிறது. கட்சியின் தொடக்க கட்டத்திலிருந்து விஜய்யுடன் இருந்து வந்தவர் என்பதால், அவருக்கும் வாய்ப்பு கிடைக்கலாம் என அரசியல் வட்டாரங்கள் பேசுகின்றன.

தவெக - காங்கிரஸ் கூட்டணி உருவாக முக்கிய பங்காற்றிய காங்கிரஸ் மூத்த தலைவர் பிரவீன் சக்ரவர்த்தியின் பெயரும் பேசப்படுகிறது. இந்த இடத்தை காங்கிரஸுக்கு ஒதுக்க வேண்டும் என்ற கோரிக்கையை டெல்லி காங்கிரஸ் தலைமையே முன்வைத்துள்ளதாக தகவல்கள் வெளியாகியுள்ளன.

தவெக சார்பில் முதல் முறையாக நாடாளுமன்றத்தின் மேலவைக்கு செல்லும் பிரதிநிதி யார் என்பது குறித்த எதிர்பார்ப்பு அதிகரித்துள்ளது. கட்சியின் நம்பிக்கைக்குரிய ஒருவரை அனுப்பி டெல்லியில் தவெகவின் அரசியல் குரலை வலுப்படுத்துவாரா? அல்லது கூட்டணி அரசியலை கருத்தில் கொண்டு காங்கிரஸுக்கு வாய்ப்பு வழங்குவாரா? என்பது இன்னும் சில நாட்களில் தெரியவரும்.

அரசியல் வட்டாரங்களில் பரவும் தகவல்களுக்கு மத்தியில், இறுதி முடிவு முதலமைச்சர் விஜய்யின் கையில்தான் உள்ளது என்பதில் எந்த சந்தேகமும் இல்லை.