வடகிழக்கு பருவமழையை எதிர்கொள்ளும் வகையில் தமிழகம் முழுவதும் தேவையான முன்னெச்சரிக்கை நடவடிக்கைகளை விரைந்து மேற்கொள்ள வேண்டும் என்றும், சாலைகளில் மழைநீர் தேங்காத வகையில் நடவடிக்கை எடுக்க வேண்டும் என்றும் முதல்வர் விஜய் அதிகாரிகளுக்கு உத்தரவிட்டுள்ளார்.

வடகிழக்கு பருவமழை முன்னெச்சரிக்கை நடவடிக்கைகள் தொடர்பான ஆய்வுக் கூட்டம் முதல்வர் விஜய் தலைமையில் செப்டம்பர் 8ஆம் தேதி தலைமைச் செயலகத்தில் நடைபெற்றது. இதில் பல்வேறு துறைகளைச் சேர்ந்த உயர் அதிகாரிகள் பங்கேற்று, மழைக்காலத்தை எதிர்கொள்ள மேற்கொள்ளப்பட்டு வரும் பணிகள் குறித்து ஆலோசித்தனர்.

பெருநகர சென்னை மாநகராட்சி, நீர்வளத்துறை, நெடுஞ்சாலைத்துறை, வருவாய் மற்றும் பேரிடர் மேலாண்மைத்துறை, நகராட்சி நிர்வாகம் மற்றும் குடிநீர் வழங்கல் துறை, ஊரக வளர்ச்சி மற்றும் ஊராட்சித் துறை, காவல்துறை, தீயணைப்பு மற்றும் மீட்புப் பணிகள் துறை, மின்சார வாரியம் உள்ளிட்ட அனைத்து துறைகளும் ஒருங்கிணைந்து செயல்பட வேண்டும் என முதல்வர் அறிவுறுத்தினார்.

பருவமழையால் பொதுமக்களுக்கு எந்தவித பாதிப்பும் ஏற்படாத வகையில் தேவையான அனைத்து முன்னெச்சரிக்கை நடவடிக்கைகளையும் மழைக்காலம் தொடங்குவதற்கு முன்பே மேற்கொள்ள வேண்டும் என்றும் அவர் உத்தரவிட்டார்.

மேலும், அனைத்து மாவட்டங்களிலும் சம்பந்தப்பட்ட அனைத்து துறை அலுவலர்களையும் ஒருங்கிணைத்து பருவமழை முன்னேற்பாடுகள் தொடர்பான ஆலோசனைக் கூட்டங்களை நடத்த வேண்டும் என்றும் அறிவுறுத்தினார்.

சென்னை மாநகராட்சியைப் பொறுத்தவரை, மாநகராட்சி நிர்வாகம், சென்னை குடிநீர் வழங்கல் மற்றும் கழிவுநீரகற்று வாரியம், காவல்துறை, தீயணைப்பு மற்றும் மீட்புப் பணிகள் துறை, மருத்துவம் மற்றும் மக்கள் நல்வாழ்வுத்துறை, மீன்வளத்துறை, மின்சார வாரியம் மற்றும் சென்னை மெட்ரோ ரயில் நிறுவனம் ஆகியவை இணைந்து செயல்பட வேண்டும் என முதல்வர் தெரிவித்தார்.

கடந்த ஆண்டுகளில் மழைக்காலங்களில் வெள்ளநீர் அதிகளவில் தேங்கிய பகுதிகளை அதிகாரிகள் நேரில் ஆய்வு செய்து, அந்த இடங்களில் மீண்டும் தண்ணீர் தேங்காத வகையில் நிரந்தரத் தீர்வு காண வேண்டும் என்றும் அவர் வலியுறுத்தினார்.

மழைநீர் விரைவாக வெளியேறும் வகையில் நீர்நிலைகளில் உள்ள ஆகாயத்தாமரைகளை அகற்ற வேண்டும் என்றும், கால்வாய்கள் மற்றும் மழைநீர் வடிகால்களை முறையாக தூர்வாரி தயார் நிலையில் வைத்திருக்க வேண்டும் என்றும் முதல்வர் உத்தரவிட்டார்.

வடகிழக்கு பருவமழை தொடங்குவதற்கு முன்பாக நிறைவடையாமல் இருக்கும் குடிநீர் திட்டங்கள், கழிவுநீர் கால்வாய் பணிகள் மற்றும் சாலைப் பணிகளை விரைந்து முடிக்கவும் சம்பந்தப்பட்ட துறைகளுக்கு அறிவுறுத்தப்பட்டுள்ளது.

மழைக்காலங்களில் மின்கம்பிகள் அறுந்து விழுவதாலும், பலவீனமான மின்கம்பங்கள் சாய்வதாலும் உயிர்ச்சேதம் ஏற்படாமல் தடுக்கும் வகையில் மின்துறையினர் முன்னெச்சரிக்கை நடவடிக்கைகளை மேற்கொள்ள வேண்டும் என்றும் விஜய் அறிவுறுத்தினார்.

அறுந்து விழும் நிலையில் உள்ள மின்கம்பிகள் மற்றும் பலவீனமான மின்கம்பங்களை முன்கூட்டியே கண்டறிந்து உடனடியாக சீரமைக்க வேண்டும் என்றும் அவர் உத்தரவிட்டுள்ளார்.

நீர்வழிப் பாதைகளில் உள்ள ஆக்கிரமிப்புகளை உடனடியாக அகற்றுவதோடு, மழைக்காலங்களில் தண்ணீர் தேங்கக்கூடிய பகுதிகளில் போதிய அளவு மோட்டார் பம்புகள், ஜேசிபி இயந்திரங்கள் மற்றும் நீர் இறைக்கும் கருவிகளை தயாராக வைத்திருக்க வேண்டும் என்றும் முதல்வர் தெரிவித்துள்ளார்.

குறிப்பாக தாழ்வான பகுதிகளை முன்கூட்டியே கண்டறிந்து, அங்கு வசிக்கும் மக்களை தேவையான நேரத்தில் பாதுகாப்பான இடங்களுக்கு அழைத்துச் செல்லும் வகையில் அதிகாரிகள் திட்டமிட வேண்டும் என்றும் அறிவுறுத்தப்பட்டுள்ளது.

மழை மற்றும் வெள்ளத்தால் பொதுமக்கள் பாதிக்கப்பட்டால் உடனடியாக தங்க வைப்பதற்காக நிவாரண முகாம்களை தயார் நிலையில் வைத்திருக்க வேண்டும் என்றும் முதல்வர் உத்தரவிட்டுள்ளார்.

அந்த முகாம்களில் தேவையான உணவு, குடிநீர், மருத்துவ வசதிகள் உள்ளிட்ட அடிப்படை வசதிகள் தடையின்றி கிடைப்பதை உறுதி செய்ய வேண்டும் என்றும் அதிகாரிகளுக்கு அறிவுறுத்தப்பட்டுள்ளது.

வடகிழக்கு பருவமழை தொடங்குவதற்கு முன்பாகவே அனைத்து முன்னெச்சரிக்கை பணிகளையும் முடித்து, மழைக்காலத்தில் பொதுமக்களின் இயல்பு வாழ்க்கை பாதிக்காத வகையில் துறை அதிகாரிகள் ஒருங்கிணைந்து செயல்பட வேண்டும் என்பதே இந்த ஆய்வுக் கூட்டத்தில் முதல்வர் விஜய் வழங்கிய முக்கிய அறிவுறுத்தலாக அமைந்துள்ளது.