மாநிலங்களவை உறுப்பினர் பதவிக்கான தேர்தலை முன்னிட்டு, கர்நாடகா, மத்தியப் பிரதேசம், ராஜஸ்தான், தமிழ்நாடு மற்றும் ஜார்கண்ட் மாநிலங்களுக்கான வேட்பாளர் பட்டியலை அகில இந்திய காங்கிரஸ் தலைமையகம் வெளியிட்டு அரசியல் வட்டாரங்களில் பரபரப்பை ஏற்படுத்தியுள்ளது.

கர்நாடக மாநிலத்தில் காலியாகும் நான்கு மாநிலங்களவை இடங்களுக்கான தேர்தல் வருகிற 18-ஆம் தேதி நடைபெற உள்ளது. இதற்கான வேட்புமனு தாக்கல் பணிகள் தற்போது தீவிரமாக நடைபெற்று வருகின்றன.

மனு தாக்கல் செய்வதற்கான இறுதி நாள் ஜூன் 8-ஆம் தேதி ஆகும்.சட்டப்பேரவையில் உள்ள உறுப்பினர் பலத்தின் அடிப்படையில் ஆளும் காங்கிரஸ் கட்சிக்கு மூன்று இடங்கள் உறுதியாகக் கிடைக்கும் சூழல் நிலவுகிறது.

இதையடுத்து, அகில இந்திய காங்கிரஸ் தலைவர் மல்லிகார்ஜுன கார்கேவை மீண்டும் மாநிலங்களவைக்கு அனுப்ப கட்சி முடிவு செய்துள்ளது.தற்போதைய மாநிலங்களவை உறுப்பினர் பதவிக்காலம் ஜூன் 25-ஆம் தேதியுடன் நிறைவடைய உள்ள நிலையில், கார்கே மீண்டும் கர்நாடகாவில் இருந்து களமிறக்கப்பட்டுள்ளார்.

அவருடன் அகில இந்திய காங்கிரஸ் செய்தித் தொடர்பாளர் பவன் கேரா மற்றும் மன்சூர் அலி கான் ஆகியோரும் வேட்பாளர்களாக அறிவிக்கப்பட்டுள்ளனர்.

இன்று பெங்களூருவில் உள்ள விதான சவுதாவில் மல்லிகார்ஜுன கார்கே தனது வேட்புமனுவை தாக்கல் செய்ய உள்ளார். இந்த நிகழ்வில் மக்களவை எதிர்க்கட்சித் தலைவர் ராகுல் காந்தி பங்கேற்கிறார். இதற்காக அவர் தனி விமானம் மூலம் பெங்களூரு வரவுள்ளதாக தெரிவிக்கப்பட்டுள்ளது.

இதுவரை மூன்று வேட்பாளர்கள் மட்டுமே அறிவிக்கப்பட்டுள்ள நிலையில், மீதமுள்ள இடங்களுக்கான பெயர்கள் குறித்து கட்சித் தலைமையகம் விரைவில் அதிகாரப்பூர்வ அறிவிப்பை வெளியிடும் என அரசியல் வட்டாரங்களில் எதிர்பார்ப்பு நிலவுகிறது.

மாநிலங்களவை தேர்தலை முன்னிட்டு கர்நாடக அரசியல் களம் நாளுக்கு நாள் அதிக வெப்பம் அடைந்து வருவது குறிப்பிடத்தக்கது.