தமிழக பாஜகவில் அடுத்த தலைமை மாற்றம் குறித்த எதிர்பார்ப்பு அரசியல் வட்டாரத்தில் அதிகரித்துள்ளது. தேசிய அளவில் கட்சியின் அமைப்பில் பல்வேறு மாற்றங்கள் மேற்கொள்ளப்பட்டு வரும் நிலையில், தமிழகத்திலும் புதிய அரசியல் வியூகத்தை செயல்படுத்தும் வகையில் மாநிலத் தலைமை மாற்றம் குறித்து பாஜக மேலிடம் ஆலோசித்து வருவதாக தகவல்கள் வெளியாகியுள்ளன.

தமிழக பாஜகவின் அடுத்த தலைவராக தேசிய மகளிர் அணித் தலைவர் வானதி சீனிவாசனை நியமிக்க வாய்ப்புள்ளதாக டெல்லி வட்டாரங்களில் பேசப்படுகிறது. எனினும், இதுகுறித்து பாஜக மேலிடத்திலிருந்து இதுவரை அதிகாரப்பூர்வ அறிவிப்பு எதுவும் வெளியாகவில்லை.

பாஜக தேசியத் தலைவர் நிதின் நபீன் தலைமையிலான புதிய நிர்வாகக் குழுவில் பல்வேறு மூத்த தலைவர்களுக்கு புதிய பொறுப்புகள் வழங்கப்பட்டு வருகின்றன. தேசிய அளவில் துணைத் தலைவர்கள், பொதுச் செயலாளர்கள், செயலாளர்கள் என பல்வேறு பதவிகளிலும் மாற்றங்கள் செய்யப்பட்டுள்ளன. மாநில அளவிலும் அந்தந்த பகுதிகளின் அரசியல் சூழல், தேர்தல் கணக்குகள் மற்றும் கட்சியின் எதிர்கால வளர்ச்சி ஆகியவற்றை கருத்தில் கொண்டு புதிய தலைமைகள் நியமிக்கப்பட்டு வருகின்றன.

அந்த வகையில் தமிழகத்திலும் அமைப்பு ரீதியாக மாற்றங்களை மேற்கொள்ள பாஜக மேலிடம் திட்டமிட்டு வருவதாக கூறப்படுகிறது.

கே.அண்ணாமலைக்கு பிறகு தமிழக பாஜக தலைவராக நயினார் நாகேந்திரன் பொறுப்பேற்று கட்சியை வழிநடத்தி வருகிறார். கள அரசியலில் அனுபவம் வாய்ந்த தலைவராக அவர் செயல்பட்டு வரும் நிலையில், எதிர்கால கூட்டணி பேச்சுவார்த்தைகள், பெண்கள் வாக்கு வங்கி, புதிய அரசியல் கூட்டணிகள் உள்ளிட்ட பல்வேறு அம்சங்களை கருத்தில் கொண்டு தலைமை மாற்றம் குறித்து ஆலோசனை நடைபெற்று வருவதாக தகவல்கள் தெரிவிக்கின்றன.

இந்த சூழலில் வானதி சீனிவாசனின் பெயர் முன்னிலைக்கு வந்துள்ளதாக கூறப்படுகிறது. ஏபிவிபி மாணவர் அமைப்பின் வாயிலாக அரசியலில் பயணத்தை தொடங்கிய அவர், பல ஆண்டுகளாக பாஜக அமைப்பில் பல்வேறு பொறுப்புகளை வகித்துள்ளார். தேசிய மகளிர் அணித் தலைவராகவும், கட்சியின் முக்கிய தேசிய அமைப்புகளிலும் பணியாற்றிய அனுபவம் அவருக்கு உள்ளது.

மேலும், கோவை தெற்கு தொகுதி சட்டமன்ற உறுப்பினராக இருப்பதால் தமிழக கள அரசியலில் அவருக்கு நேரடி அனுபவமும் உள்ளது. கொங்கு மண்டலத்தைச் சேர்ந்தவர் என்பதும், கட்சியின் வாக்கு வங்கியை வலுப்படுத்தும் அரசியல் கணக்கில் சாதகமாக அமையும் என பாஜக மேலிடம் கருதுவதாக கூறப்படுகிறது.

வழக்கறிஞர் பின்னணி கொண்ட வானதி சீனிவாசன், கூட்டணி கட்சிகளுடனும் பிற அரசியல் தலைவர்களுடனும் மோதல் இல்லாத அணுகுமுறையுடன் செயல்படக்கூடியவர் என்ற பிம்பமும் அவருக்கு உள்ளது. அதே நேரத்தில், கட்சியின் கொள்கை சார்ந்த விவகாரங்களில் உறுதியான நிலைப்பாட்டை முன்வைத்து வருகிறார்.

தமிழகத்தில் அடுத்தடுத்த தேர்தல்களை எதிர்கொள்ள பாஜகவுக்கு அமைதியான அணுகுமுறையுடன், கூட்டணி அரசியலை கையாளக்கூடிய தலைமையும் தேவைப்படுவதாக கட்சி மேலிடம் கருதுவதாக கூறப்படுகிறது. குறிப்பாக, பெண்கள் மத்தியில் கட்சியின் ஆதரவை அதிகரிப்பது, கொங்கு மண்டலத்தில் வலுவை தக்கவைப்பது மற்றும் பிற கட்சிகளுடன் பேச்சுவார்த்தைகளை முன்னெடுப்பது போன்ற அம்சங்களில் வானதி சீனிவாசனின் தலைமையால் பலன் கிடைக்குமா என்பது குறித்து ஆலோசிக்கப்பட்டு வருவதாக தகவல்கள் தெரிவிக்கின்றன.

இதனால், டெல்லியில் நடைபெறும் அடுத்தடுத்த ஆலோசனைக் கூட்டங்களுக்குப் பிறகு தமிழக பாஜக தலைமை தொடர்பாக முக்கிய அறிவிப்பு வெளியாகுமா என்ற எதிர்பார்ப்பு கமலாலய வட்டாரத்தில் ஏற்பட்டுள்ளது.

நயினார் நாகேந்திரனுக்கு தொடருமா வாய்ப்பு? அல்லது வானதி சீனிவாசனிடம் தமிழக பாஜக தலைமை ஒப்படைக்கப்படுமா? இதற்கான அதிகாரப்பூர்வ முடிவை பாஜக மேலிடத்தின் அடுத்தகட்ட அறிவிப்புதான் தெளிவுபடுத்தும்.