செங்கல்பட்டு மாவட்டம் மதுராந்தகத்தில் இன்று நடைபெறும் தேசிய ஜனநாயகக் கூட்டணியின் (NDA) பிரம்மாண்டப் பொதுக்கூட்டத்தில் பிரதமர் நரேந்திர மோடி பங்கேற்கிறார். இதையொட்டி கூட்டணிக் கட்சிகள் சார்பில் மாவட்டம் முழுவதும் வரவேற்பு பேனர்கள் வைக்கப்பட்டுள்ள நிலையில், அதிமுக-வின் பேனர்கள் புதிய அரசியல் சர்ச்சையைக் கிளப்பியுள்ளன.

புறக்கணிப்பு: அதிமுக சார்பில் வைக்கப்பட்டுள்ள பேனர்களில் பிரதமர் மோடி, அதிமுக பொதுச்செயலாளர் எடப்பாடி பழனிசாமி (EPS) மற்றும் கூட்டணி கட்சி தலைவர்களின் புகைப்படங்கள் இடம்பெற்றுள்ளன. ஆனால், அதே கூட்டணியில் அங்கம் வகிக்கும் அமமுக பொதுச்செயலாளர் டிடிவி தினகரனின் புகைப்படம் முழுமையாகப் புறக்கணிக்கப்பட்டுள்ளது.

இதற்கு நேர்மாறாக, அமமுக தொண்டர்கள் வைத்துள்ள பேனர்களில் கூட்டணிக் கட்சித் தலைவர் என்ற முறையில் எடப்பாடி பழனிசாமியின் புகைப்படம் இடம்பெற்றுள்ளது.

அதிமுக மற்றும் அமமுக இடையேயான பழைய கசப்புணர்வுகள் இன்னும் மறையவில்லை என்பதையே இந்தத் 'நிழற்படப் போர்' வெளிப்படுத்துவதாக அரசியல் விமர்சகர்கள் கருதுகின்றனர்.

பிரதமர் பங்கேற்கும் முதல் தேர்தல் பரப்புரை கூட்டத்திலேயே கூட்டணிக் கட்சிகளிடையே இத்தகைய ஒருங்கிணைப்பு குறைபாடு காணப்படுவது தொண்டர்களிடையே சலசலப்பை ஏற்படுத்தியுள்ளது. மேடையில் தலைவர்கள் ஒன்றாகத் தோன்றும் போது இந்தச் சிக்கல் முடிவுக்கு வருமா என்ற எதிர்பார்ப்பு எழுந்துள்ளது.