தமிழகத்தில் தவெக அரசு பொறுப்பேற்று மூன்று மாதங்கள் நிறைவடைந்துள்ள நிலையில், சட்டப்பேரவையில் பட்ஜெட் மீதான விவாதம் அனல் பறந்து வருகிறது. பட்ஜெட் விவகாரத்தைத் தாண்டியும் ஆளுங்கட்சியான தவெகவுக்கும் எதிர்க்கட்சியான திமுகவுக்கும் இடையே பல்வேறு விவகாரங்களில் கடுமையான வாக்குவாதங்கள் நடைபெற்று வருகின்றன.

அந்த வகையில், நிதியமைச்சர் மரிய வில்சனுக்கும் கடையநல்லூர் சட்டமன்ற உறுப்பினர் ராஜேந்திரனுக்கும் இடையே தமிழ் உச்சரிப்பு தொடர்பாக நடைபெற்ற விவாதம் சட்டப்பேரவையில் பரபரப்பை ஏற்படுத்தியது. விவாதத்தின்போது மரிய வில்சன் கடும் கோபத்துடன் பேசியதாக கூறப்படுகிறது.

இந்த நிலையில், நிதியமைச்சர் மரிய வில்சனின் அணுகுமுறையை விமர்சித்து சவுக்கு சங்கர் வெளியிட்டுள்ள வீடியோவில், அவரை அமைச்சரவையில் இருந்து நீக்க வேண்டும் என்று வலியுறுத்தியுள்ளார்.

சவுக்கு சங்கர் கூறுகையில், இந்த விவகாரத்தை சாதாரணமாக கடந்து செல்லக் கூடாது என்றும், மரிய வில்சனை அமைச்சரவையில் இருந்து நீக்கும் வரை இந்த விவகாரத்தை விடக்கூடாது என்றும் தெரிவித்துள்ளார்.

மேலும், “ராஜேந்திரன் எம்எல்ஏ தவறாக எதுவும் பேசவில்லை. அவர் தனது ஆதங்கத்தைத்தான் வெளிப்படுத்தினார். ‘நீங்கள் நிதியமைச்சர், தமிழை அழகாக உச்சரியுங்கள்’ என்றுதான் கேட்டார். ஆனால், அதற்கு மரிய வில்சன் கடுமையாக எதிர்வினையாற்றியுள்ளார்” என சவுக்கு சங்கர் விமர்சித்துள்ளார்.

தொடர்ந்து, அமைச்சர்கள் பொறுமையையும் நிதானத்தையும் கடைப்பிடிக்க வேண்டும் என்றும், நிதானத்தை இழக்கும் ஒருவர் அமைச்சரவையில் தொடர வேண்டுமா என்ற கேள்வி எழுவதாகவும் அவர் தெரிவித்துள்ளார்.

சபாநாயகர் பிரபாகர் கூட இந்த விவகாரத்தை லேசான அணுகுமுறையுடன் எடுத்துக்கொள்ளுமாறு அறிவுறுத்தியதாகவும், அதன்பிறகும் மரிய வில்சன் கோபமாக நடந்துகொண்டதாகவும் சவுக்கு சங்கர் கூறியுள்ளார்.

மேலும், ஒரு தனிப்பட்ட குடும்பத் தகராறில் கூட மனிதர்கள் பொதுவாக நேரடியாக வன்முறையில் ஈடுபடாமல் விலகிச் செல்வார்கள். அதுபோலவே பொது வாழ்க்கையில் இருப்பவர்களும் தங்களது கோபத்தைக் கட்டுப்படுத்த வேண்டும் என்ற கருத்தையும் அவர் முன்வைத்துள்ளார்.

இதனைத் தொடர்ந்து, அடக்கம் மற்றும் நிதானத்தின் முக்கியத்துவத்தை வலியுறுத்தும் திருக்குறள் மற்றும் முன்னாள் முதலமைச்சர் கருணாநிதியின் விளக்கத்தை சுட்டிக்காட்டிய சவுக்கு சங்கர், அறிந்து செயல்பட்டு அடக்கத்துடன் நடந்து கொள்வதே ஒரு தலைவருக்கு அழகு என்றும் குறிப்பிட்டுள்ளார்.

மரிய வில்சன் தேவையான நிதானத்தை கடைப்பிடிக்கவில்லை என்றும், அவரிடம் ஆணவம் அதிகமாக இருப்பதாகவும் அவர் கடுமையாக விமர்சித்துள்ளார்.

நிதியமைச்சர் மற்றும் சட்டமன்ற உறுப்பினர் இடையிலான இந்த விவாதத்தைத் தொடர்ந்து, அமைச்சர்களின் அவை நடத்தை, எதிர்க்கட்சி உறுப்பினர்களிடம் அவர்கள் கடைப்பிடிக்க வேண்டிய அணுகுமுறை உள்ளிட்ட விவகாரங்கள் அரசியல் வட்டாரத்தில் மீண்டும் விவாதப் பொருளாகியுள்ளன.