2026 சட்டசபை தேர்தலில் ஏற்பட்ட தோல்விக்குப் பிறகு திமுகவை முழுமையாக மறுசீரமைக்கும் பணிகளை அக்கட்சியின் தலைவர் மு.க.ஸ்டாலின் தொடங்கியுள்ளதாக தகவல்கள் வெளியாகியுள்ளன. ஏற்கனவே தமிழகம் முழுவதும் திமுக கள ஆய்வுக் குழு ஆய்வு நடத்தி விரிவான அறிக்கையை சமர்ப்பித்துள்ள நிலையில், அதன் அடிப்படையில் கட்சி நிர்வாகத்தில் பெரிய அளவிலான மாற்றங்களை மேற்கொள்ள தலைமை தயாராகி வருவதாக கூறப்படுகிறது.

குறிப்பாக, கட்சியில் பட்டியலின மக்களுக்கு போதிய முக்கியத்துவமும் பிரதிநிதித்துவமும் வழங்கப்படவில்லை என்ற புகார் அதிகளவில் முன்வைக்கப்பட்டுள்ளதாக தகவல் வெளியாகியுள்ளது. இதையடுத்து, பட்டியலினத்தவர்களுக்கு கட்சி நிர்வாகத்தில் அதிக பிரதிநிதித்துவம் வழங்கும் வகையில் 20-க்கும் மேற்பட்ட மாவட்டங்களில் அவர்களை மாவட்டச் செயலாளர்களாக நியமிப்பது குறித்து மு.க.ஸ்டாலின் ஆலோசித்து வருவதாக அறிவாலய வட்டாரங்கள் கூறுகின்றன.

2026 சட்டசபை தேர்தலில் திமுக சந்தித்த தோல்வி அக்கட்சிக்குள் மிகப்பெரிய அதிர்வலைகளை ஏற்படுத்தியதாக கூறப்படுகிறது. குறிப்பாக, திமுக தலைவர் மு.க.ஸ்டாலின் தனது கொளத்தூர் தொகுதியிலேயே தோல்வியை சந்தித்ததை கட்சியினரால் ஏற்றுக்கொள்ள முடியவில்லை என சொல்லப்படுகிறது.

அதுமட்டுமின்றி, 15-க்கும் மேற்பட்ட பலம் வாய்ந்த அமைச்சர்களும் தேர்தலில் படுதோல்வியை சந்தித்ததாக கூறப்படுகிறது. இதையடுத்து, தோல்விக்கான உண்மையான காரணங்களை கண்டறிய விரிவான ஆய்வு நடத்த திமுக தலைமை முடிவு செய்தது.

இதற்காக கள ஆய்வுக் குழுக்கள் அமைக்கப்பட்டு, மாவட்ட வாரியாகவும் தொகுதி வாரியாகவும் ஆய்வுகள் மேற்கொள்ளப்பட்டன. கட்சி நிர்வாகிகள், முன்னாள் அமைச்சர்கள், முன்னாள் எம்எல்ஏக்கள், மாவட்டச் செயலாளர்கள் மற்றும் அடிமட்ட தொண்டர்கள் என பல்வேறு தரப்பினரையும் நேரில் சந்தித்து கருத்துகள் சேகரிக்கப்பட்டதாக கூறப்படுகிறது.

கள ஆய்வின் முடிவில் விரிவான அறிக்கை தயாரிக்கப்பட்டு திமுக தலைவர் மு.க.ஸ்டாலினிடம் ஒப்படைக்கப்பட்டதாக தகவல் வெளியாகியுள்ளது. அந்த அறிக்கையில் நீண்ட காலமாக கட்சிக்குள் நிலவி வந்த அதிருப்தி, நிர்வாகக் குறைபாடுகள், தொகுதி பிரச்சினைகள் மற்றும் வேட்பாளர் தேர்வில் ஏற்பட்ட குளறுபடிகள் உள்ளிட்ட பல்வேறு அம்சங்கள் விரிவாக இடம்பெற்றிருந்ததாக கூறப்படுகிறது.

இந்த அறிக்கையை தனது பண்ணை வீட்டிலும் இல்லத்திலும் வைத்து மு.க.ஸ்டாலின் விரிவாக ஆய்வு செய்ததாகவும், அதில் இடம்பெற்றுள்ள புகார்கள் குறித்து முக்கிய நிர்வாகிகளுடன் ஆலோசனை நடத்தியதாகவும் தகவல்கள் தெரிவிக்கின்றன.

குறிப்பாக, இந்த அறிக்கையில் அடிமட்ட தொண்டர்களின் கருத்துகளுக்கு அதிக முக்கியத்துவம் அளிக்கப்பட்டிருந்ததாக கூறப்படுகிறது.

சில தொகுதிகளில் கட்சியின் அதிகாரப்பூர்வ வேட்பாளர்களுக்கு எதிராக சொந்த கட்சி நிர்வாகிகளே உள்ளடி வேலை பார்த்ததாக கள ஆய்வு அறிக்கையில் குற்றச்சாட்டுகள் இடம்பெற்றுள்ளதாக கூறப்படுகிறது. மேலும், சில தொகுதிகளில் திமுக வேட்பாளர்கள் அதிமுக வேட்பாளர்களுடன் மறைமுகமாக கூட்டு சேர்ந்ததாகவும் அதிர்ச்சித் தகவல்கள் பதிவு செய்யப்பட்டுள்ளதாக சொல்லப்படுகிறது.

அதுமட்டுமின்றி, திமுக ஆட்சிக் காலத்தில் அதிகார மையங்களாக செயல்பட்ட சில முன்னாள் அமைச்சர்கள் தேர்தலின்போது கட்சிக்கு சாதகமாக செயல்படவில்லை என்ற குற்றச்சாட்டும் எழுந்துள்ளதாக தகவல்கள் தெரிவிக்கின்றன.

தங்களது சொந்த வெற்றி அல்லது அரசியல் செல்வாக்கில் மட்டுமே கவனம் செலுத்திய சிலர், தங்களது மாவட்டங்களில் போட்டியிட்ட மற்ற திமுக வேட்பாளர்களின் வெற்றிக்காக போதிய ஆர்வம் காட்டவில்லை என்றும் கூறப்படுகிறது. இத்தகைய செயல்பாடுகளும் கட்சி மிகப்பெரிய தோல்வியை சந்திக்க முக்கிய காரணமாக அமைந்ததாக தொண்டர்கள் தெரிவித்துள்ளதாக சொல்லப்படுகிறது.

கள ஆய்வின்போது அதிகளவில் முன்வைக்கப்பட்ட முக்கிய புகார்களில் ஒன்று, திமுகவில் பட்டியலின மக்களுக்கு போதிய பிரதிநிதித்துவம் வழங்கப்படவில்லை என்பதாக கூறப்படுகிறது.

தமிழகம் முழுவதும் பிற்படுத்தப்பட்ட மற்றும் மிகவும் பிற்படுத்தப்பட்ட சமூகங்களைச் சேர்ந்த பலர் மாவட்டச் செயலாளர்களாக உள்ள நிலையில், பட்டியலினத்தைச் சேர்ந்தவர்களுக்கு உரிய முக்கியத்துவம் வழங்கப்படவில்லை என்ற குற்றச்சாட்டு கட்சிக்குள் எழுந்துள்ளதாக தகவல் வெளியாகியுள்ளது.

தற்போது வாசுதேவநல்லூர் ராஜா, சி.வி.கணேசன் மற்றும் திருவள்ளூர் ரமேஷ் ஆகிய மூன்று பேர் மட்டுமே பட்டியலினத்தைச் சேர்ந்த மாவட்டச் செயலாளர்களாக இருப்பதாக கூறப்படுகிறது.

இதற்கிடையே, தமிழக வெற்றிக் கழகம் தேர்தலில் 20-க்கும் மேற்பட்ட பட்டியலினத்தைச் சேர்ந்தவர்களுக்கு போட்டியிட வாய்ப்பு வழங்கியதாகவும், தனித் தொகுதிகளை தாண்டியும் சிலர் பொதுத் தொகுதிகளில் வேட்பாளர்களாக களமிறக்கப்பட்டதாகவும் கூறப்படுகிறது.

அவர்களில் பெரும்பாலானோர் வெற்றி பெற்றுள்ள நிலையில், தவெக அமைச்சரவையில் எட்டு பட்டியலின அமைச்சர்கள் இடம்பெற்றுள்ளதாக சொல்லப்படுகிறது. இதனால் தமிழக அரசியல் களத்தில் சமூக பிரதிநிதித்துவம் தொடர்பான புதிய விவாதம் உருவாகியுள்ளதாக கூறப்படுகிறது.

இந்த சூழலில்தான் திமுகவிலும் பட்டியலின மக்களுக்கு உரிய முக்கியத்துவம் வழங்க வேண்டும் என்ற கோரிக்கை வலுப்பெற்றுள்ளதாக தகவல்கள் தெரிவிக்கின்றன.

2026 சட்டசபை தேர்தலுக்குப் பிறகு தமிழக அரசியல் களம் முற்றிலும் மாறியுள்ள நிலையில், கட்சியில் பெரிய மாற்றங்கள் அவசியம் என திமுக தலைமை உணர்ந்துள்ளதாக கூறப்படுகிறது.

அதன் ஒரு பகுதியாக, பட்டியலினத்தைச் சேர்ந்தவர்களுக்கு அதிக மாவட்டச் செயலாளர் பொறுப்புகளை வழங்குவது குறித்து ஆலோசனை நடைபெற்று வருவதாக தகவல்கள் வெளியாகியுள்ளன. தற்போது கிடைத்துள்ள தகவல்களின்படி, 20-க்கும் மேற்பட்ட மாவட்டங்களில் பட்டியலினத்தைச் சேர்ந்தவர்கள் மாவட்டச் செயலாளர்களாக நியமிக்கப்பட வாய்ப்பு இருப்பதாக கூறப்படுகிறது.

திமுகவை மறுசீரமைப்பதற்காக தங்கம் தென்னரசு, கீதா ஜீவன், சக்கரபாணி, சிவசங்கர், தமிழரசி, அப்துல்லா, பரந்தாமன், எழிலன், முரசொலி மற்றும் கருணா உள்ளிட்டோர் இடம்பெற்ற குழு அமைக்கப்பட்டுள்ளதாக கூறப்படுகிறது.

இந்தக் குழுவினர் சமீபத்தில் அண்ணா அறிவாலயத்தில் திமுக தலைவர் மு.க.ஸ்டாலினை சந்தித்து ஆலோசனை நடத்தியதாக தகவல் வெளியாகியுள்ளது.

அப்போது, கட்சிக்கு புதிய நிர்வாகிகளை தேர்வு செய்ய வேண்டியது அவசியம் என்றும், தற்போது உள்ள மாவட்ட அமைப்புகளை மேலும் பிரித்து நிர்வாகத்தை வலுப்படுத்த வேண்டும் என்றும் குழுவினர் பரிந்துரைத்ததாக கூறப்படுகிறது.

இதையடுத்து, திமுக மறுசீரமைப்பின் முக்கிய அம்சமாக பட்டியலினத்தைச் சேர்ந்த பலருக்கு மாவட்டச் செயலாளர் பதவிகள் வழங்கப்படலாம் என அறிவாலய வட்டாரங்களில் பேசப்படுகிறது.

2026 சட்டசபை தேர்தல் தோல்விக்குப் பிறகு திமுகவில் நடைபெறவுள்ள இந்த மறுசீரமைப்பு, வெறும் நிர்வாக மாற்றமாக மட்டுமின்றி சமூக பிரதிநிதித்துவத்தை அதிகரிக்கும் முக்கிய நடவடிக்கையாகவும் அமையுமா என்ற எதிர்பார்ப்பு அரசியல் வட்டாரங்களில் எழுந்துள்ளது.