தமிழக சட்டசபை தேர்தல் நெருங்கி வரும் நிலையில், தந்தி டிவி வெளியிட்டுள்ள சமீபத்திய கருத்துக் கணிப்பு அரசியல் வட்டாரத்தில் பெரிய விவாதத்தை கிளப்பியுள்ளது. திமுக, அதிமுக, தவெக, நாம் தமிழர் என அனைத்து முக்கிய கட்சிகளுக்கும் இந்த சர்வே ஒரு வகையில் அதிர்ச்சியையே ஏற்படுத்தியுள்ளது.

மார்ச் 29 முதல் ஏப்ரல் 20 வரை நடத்தப்பட்ட இந்த கருத்துக் கணிப்பின் முழுமையான முடிவுகள் தற்போது வெளியாகியுள்ளன. அதன்படி, திமுக கூட்டணி 98 தொகுதிகளிலும், அதிமுக கூட்டணி 91 தொகுதிகளிலும் வெற்றி பெற வாய்ப்புள்ளதாக கணிக்கப்பட்டுள்ளது. இரு பெரிய கூட்டணிகளும் 100க்கு அருகில் இருந்தாலும், ஆட்சிக்கு தேவையான 118 என்ற மெஜாரிட்டி எண்னை எட்ட முடியாத நிலை உருவாகியுள்ளது.

புதிய அரசியல் சக்தியாக களமிறங்கியுள்ள தமிழக வெற்றி கழகம் (தவெக) 2 தொகுதிகளில் வெற்றி பெறும் வாய்ப்புள்ளதாக கூறப்பட்டுள்ளது. குறிப்பாக பெரம்பூரில் விஜய் எளிதில் வெல்வார் என்றும், திருச்சி கிழக்கில் கடும் போட்டி இருந்தாலும் இறுதியில் அவருக்கே சாதகமாக அமையலாம் என்றும் கணிப்பு தெரிவிக்கிறது.

அதே நேரத்தில், நாம் தமிழர் கட்சி இந்த முறை எந்த தொகுதியிலும் வெற்றி பெற வாய்ப்பு இல்லை எனவும், சீமான் தனது சொந்த மாவட்டமான காரைக்குடியிலும் வெற்றி பெற சிரமம் எனவும் இந்த சர்வே கூறுகிறது.

இந்த தேர்தலின் உண்மையான “கேம் சேஞ்சர்” எனக் கருதப்படுவது 43 தொகுதிகள். இங்கு கடும் போட்டி நிலவுவதாகவும், இந்த தொகுதிகளில் யார் முன்னிலை பெறுகிறார்களோ அவர்கள் தான் ஆட்சியை அமைப்பார்கள் என்றும் கணிக்கப்பட்டுள்ளது.

இந்த இழுபறி நிலைக்கு முக்கிய காரணமாக தவெக பார்க்கப்படுகிறது. பல தொகுதிகளில் கணிசமான வாக்குகளைப் பிரிப்பதால், திமுக மற்றும் அதிமுக இடையிலான நேரடி போட்டி இன்னும் கடுமையாக மாறியுள்ளதாக சர்வே சுட்டிக்காட்டுகிறது.

மொத்தத்தில், இந்த கருத்துக் கணிப்பு “ஹங் அசெம்ப்ளி” (தெளிவான பெரும்பான்மை இல்லாத நிலை) சாத்தியத்தை முன்வைக்கிறது. இருப்பினும், இது ஒரு கணிப்பு மட்டுமே என்பதால், இறுதி தீர்ப்பு வாக்காளர்களிடமே உள்ளது.

மே 4 ஆம் தேதி வாக்கு எண்ணிக்கைக்கு பிறகே தமிழக மக்கள் எந்தத் தீர்மானத்தை எடுத்துள்ளனர் என்பது தெளிவாகும். அதுவரை அரசியல் களம் இப்படியே பரபரப்புடன் நீடிக்கப் போகிறது.