திண்டுக்கல்லில் நடைபெற்ற செய்தியாளர் சந்திப்பில் முன்னாள் அமைச்சர் திண்டுக்கல் சீனிவாசன், அரசியல் மேடையை சூடேற்றும் வகையில் தி.மு.க. அரசை கடுமையாக விமர்சித்தார்.

“ஆட்சியின் கடைசி கட்டத்தில் பட்ஜெட் தாக்கல் என்ற பெயரில் மக்களின் வரிப்பணத்தை சுரண்டி வருகின்றனர்” என்று குற்றம்சாட்டிய அவர், அமைச்சர் இ.பெரியசாமி மீது நிலுவையில் உள்ள வழக்குகளை சுட்டிக்காட்டி, “முதலில் தன் முதுகில் உள்ள அழுக்கை பார்த்துக்கொள்ளட்டும், பிறரை குறை கூறுவது பின்னர்” என தாக்குதல்மிகு கருத்து தெரிவித்தார்.

மேலும் துரைமுருகன், நேரு, சாத்தூர் ராமச்சந்திரன், தங்கம் தென்னரசு உள்ளிட்ட 9 அமைச்சர்கள் மீது வழக்குகள் பதிவு செய்யப்பட்டு விசாரணை நடைபெறவுள்ளதாகவும், தேர்தலுக்குப் பிறகு சட்ட நடவடிக்கை எடுக்கப்படும் என்றும் கூறினார்.

தி.மு.க. 525 தேர்தல் வாக்குறுதிகளில் பலவும் நிறைவேறாமல் ‘காகித வாக்குறுதிகளாக’ மாறிவிட்டதாக விமர்சித்த அவர், புதிய தேர்தல் அறிக்கை வெளியிடுவதற்கு முன் பழைய வாக்குறுதிகளை நிறைவேற்றச் சொல்லினார்.

தேர்தல் நெருங்கும் நிலையில் பொதுமக்களுக்கு அண்டா, ஹாட்பாக்ஸ் போன்ற பரிசுப் பொருட்கள் வழங்கப்படுவது ‘வாக்கு வேட்டை நாடகம்’ என்றும், “100 வீடுகளில் 10 வீடுகளுக்கே தரமான பொருள்” என குற்றம்சாட்டினார்.

“பணம் கொடுத்தும், பரிசு கொடுத்தும் மக்களை ஏமாற்ற முடியாது; உயர்ந்த மின் கட்டணம், சொத்துவரி மக்களின் கோபத்தை அதிகரித்துவிட்டது” என்றார்.மேலும் நடிகர் விஜய் கருப்பு பணம் பெற்றதாக முன்வைத்த குற்றச்சாட்டை மீண்டும் வலியுறுத்திய அவர், “இதில் யாரும் பதில் சொல்லத் தயங்குகின்றனர்” என்றும் கூறினார்.

இறுதியாக, “வரவிருக்கும் சட்டமன்ற தேர்தலில் அ.தி.மு.க. தலைமையிலான என்.டி.ஏ. கூட்டணி 210 இடங்களில் வெற்றி பெறும்” என நம்பிக்கையுடன் அறிவித்து, தனது உரையை முடித்தார். அவரது பேச்சு அரசியல் வட்டாரங்களில் பரபரப்பை ஏற்படுத்தியுள்ளது.