முன்னாள் அமைச்சர் செங்கோட்டையன் அதிமுகவில் இருந்து நீர்க்கப்பட்ட நிலையில், தவெகவில் இணைந்துள்ளார். இன்று ஈரோடு மாவட்டம் கோபி செட்டிபாளையத்தில் அதிமுக பொதுச்செயலாளர் இபிஎஸ் பொதுக்கூட்டத்தில் கலந்து கொண்ட நிலையில், அவருக்கு அங்கு தொண்டர்கள் உற்சாக வரவேற்பு அளித்தனர்.

தொண்டர்கள் முன்னிலையில் பேசிய அவர் குறிப்பிட்டுள்ளதாவது: இங்கு கூடியுள்ள கூட்டத்தின் மூலம் வரும் சட்டசபை தேர்தலில் அதிமுக வேட்பாளர் வெற்றி பெற்று விட்டார் என்பதை உறுதி செய்துவிட்டீர்கள் என்றும், யார் யாரோ கனவு கண்டு கொண்டிருக்கிறார்கள். அந்த கனவை நொறுக்கி விட்டீர்கள் என்று பேசியுள்ளார். 

அத்துடன், அடுத்தாண்டு நடக்கும் சட்டசபை தேர்தலில் அதிமுக தலைமையிலான கூட்டணி பெரும்பான்மை இடங்களில் வெற்றி பெற்று ஆட்சியமைக்கும். அதில், கோபி தொகுதியில் அதிமுக அதிக ஓட்டுகள் வித்தியாசத்தில் வெற்றி பெறும் என்று எடப்பாடி பழனிச்சாமி நம்பிக்கை தெரிவித்துள்ளார். 

மேலும், இந்தத் தொகுதியில் ஒருவர் எம்எல்ஏவாக (செங்கோட்டையன்) இருந்தார். நீங்கள் ஓட்டு போட்டு தேர்ந்தெடுக்கப்பட்டவர். ஓட்டு வாங்க உங்களை அணுகினார். ஆனால், ராஜினாமா பண்ண உங்களைக் கேட்டாரா..? என்று கேள்வி எழுப்பியுள்ளார். அத்துடன், அதைப் பற்றி கவலைப்பட வேண்டாம். அதிமுக ஆட்சி மலர்ந்த உடன் எடப்பாடி தொகுதிக்கு மேலாக கோபிச் செட்டிபாளையம் தொகுதி வளரும். தமிழகத்தில் முதன்மையான தொகுதியாக கோபி தொகுதி வருவதற்கான அனைத்து நடவடிக்கைகளும் எடுக்கப்படும் என்று தெரிவித்துள்ளார்.