திருவள்ளூர் மாவட்டம் கும்மிடிப்பூண்டி அருகே 3 வயது சிறுமி பாலியல் வன்கொடுமைக்கு ஆளாக்கப்பட்டு உயிரிழந்த சம்பவம் தமிழகம் முழுவதும் பெரும் அதிர்ச்சியையும் வேதனையையும் ஏற்படுத்தியுள்ள நிலையில், இதுதொடர்பாக தமிழக சட்டமன்ற எதிர்க்கட்சித் தலைவர் உதயநிதி ஸ்டாலின் கடும் கண்டனம் தெரிவித்துள்ளார்.

இதுகுறித்து அவர் தனது எக்ஸ் தளத்தில் வெளியிட்டுள்ள பதிவில், பிஞ்சுக் குழந்தையின் உயிரைப் பறித்த இந்த மனிதநேயமற்ற குற்றச்செயல் மனதை உலுக்கும் வகையில் இருப்பதாக குறிப்பிட்டுள்ளார். சம்பவத்தில் தொடர்புடைய உண்மையான குற்றவாளிகளை முழுமையாக அடையாளம் கண்டு, அவர்களுக்கு சட்டத்தின் கீழ் மிகக் கடுமையான தண்டனை பெற்றுத்தர வேண்டும் என்று வலியுறுத்தியுள்ளார்.

மேலும், இதுபோன்ற கொடூரச் சம்பவங்கள் தொலைதூர மாநிலங்களில் நடைபெறுவதாக மட்டுமே மக்கள் கருதிய நிலையில், தற்போது தமிழ்நாட்டிலேயே தொடர்ச்சியாக அரங்கேறி வருவது கவலைக்குரியதாக இருப்பதாக அவர் தெரிவித்துள்ளார். குழந்தைகள் மற்றும் பெண்களின் பாதுகாப்பை உறுதி செய்ய வேண்டிய அரசு, அந்தப் பொறுப்பில் போதிய கவனம் செலுத்தத் தவறி வருவதாகவும் அவர் குற்றம்சாட்டியுள்ளார்.

சமீப காலமாக பெண்கள் மற்றும் குழந்தைகளுக்கு எதிரான குற்றச்சம்பவங்கள் பல்வேறு பகுதிகளில் அதிகரித்து வருவதாக சுட்டிக்காட்டிய அவர், அவற்றை கட்டுப்படுத்துவதில் ஆட்சியாளர்கள் உறுதியான நடவடிக்கைகளை மேற்கொள்ளவில்லை என்றும் விமர்சித்துள்ளார்.மேலும், ஆட்சி பொறுப்பேற்று ஒரு மாதத்திற்கும் மேலாகிய நிலையில் கூட சட்டம்-ஒழுங்கு நிலையை வலுப்படுத்துவதற்கான தெளிவான மற்றும் தீவிரமான நடவடிக்கைகள் எடுக்கப்படுவதாக தெரியவில்லை என அவர் குறிப்பிட்டுள்ளார்.

அரசியல் நடவடிக்கைகளுக்கு முக்கியத்துவம் அளிப்பதை விட, பொதுமக்களின் பாதுகாப்பையும் சமூக அமைதியையும் உறுதி செய்வதில் அரசு கூடுதல் அக்கறை செலுத்த வேண்டும் என்றும் வலியுறுத்தியுள்ளார்.

தமிழ்நாட்டில் சட்டம்-ஒழுங்கு நிலை பாதிக்கப்படாமல் இருக்க, உயர்மட்ட காவலர்கள் பங்கேற்கும் அவசர ஆலோசனைக் கூட்டத்தை உடனடியாக நடத்த வேண்டும் என்றும், மண்டல மற்றும் மாவட்ட அளவிலான காவலர்களுக்கு குற்றத் தடுப்பு தொடர்பாக கடுமையான வழிகாட்டுதல்கள் வழங்கப்பட வேண்டும் என்றும் அவர் கோரிக்கை விடுத்துள்ளார்.

இதேபோன்ற குற்றச்சம்பவங்கள் தொடரும் பட்சத்தில், மக்கள் நலன் மற்றும் பாதுகாப்பை முன்னிறுத்தி பொதுமக்களை திரட்டி ஜனநாயக வழியில் போராட்டங்களை முன்னெடுக்கவும் திமுக தயங்காது எனவும் தனது பதிவில் உதயநிதி ஸ்டாலின் எச்சரித்துள்ளதாக தெரிவிக்கப்படுகிறது.