தமிழ்நாட்டில் வரவிருக்கும் சட்டமன்றத் தேர்தலை முன்னிட்டு திமுக–காங்கிரஸ் இடையிலான தொகுதிப் பங்கீடு பேச்சுவார்த்தை தீவிரமாக நடைபெற்று வருகிறது. கூட்டணிக்குள் வெளிப்படையாக அமைதியான சூழல் நிலவினாலும், சீட் எண்ணிக்கையைச் சுற்றி உள்ளகமாக கருத்து வேறுபாடுகள் இருப்பதாக தகவல்கள் வெளியாகியுள்ளன.

காங்கிரஸ் பொதுச் செயலாளர் கே.சி. வேணுகோபால், முதலமைச்சர் மு.க. ஸ்டாலினை சந்தித்ததையடுத்து, திமுக தரப்பில் கனிமொழி தலைமையில் காங்கிரஸ் மாநிலப் பொறுப்பாளர் கிரிஷ் சோடங்கருடன் தொகுதிப் பங்கீடு குறித்து ஆலோசனை நடைபெற்றது.

காங்கிரஸ் தரப்பில் ஒரு ராஜ்யசபா இடம் கோரப்பட்டுள்ளதாக கூறப்படுகிறது. இதற்கு திமுக சம்மதம் தெரிவிக்க வாய்ப்பு உள்ளதாக அரசியல் வட்டாரங்கள் கூறுகின்றன. ஆனால் சட்டசபைத் தொகுதிகள் எண்ணிக்கையே முக்கிய சிக்கலாக மாறியுள்ளது.

2016 தேர்தலில் போட்டியிட்டதைப் போல 41 தொகுதிகள் வேண்டும் என காங்கிரஸ் கோரியுள்ளதாக தகவல். இதற்கு பதிலாக, 2021 தேர்தலைப் போல அதிகபட்சம் 25 தொகுதிகள் மட்டுமே வழங்க முடியும் என திமுக தரப்பு தெரிவித்துள்ளதாக கூறப்படுகிறது. கடும் அழுத்தம் வந்தால் கூடுதலாக 2 அல்லது 3 தொகுதிகள் சேர்த்துக் கொடுக்கலாம் என்றாலும், 28க்கு மேல் வழங்க முடியாது என்பதே திமுகவின் நிலைப்பாடாக சொல்லப்படுகிறது.

இந்த முறை கடும் போட்டி நிலவும் என திமுக மதிப்பீடு செய்கிறது. வலுவான வேட்பாளர்கள் இல்லாமல் அதிக தொகுதிகள் ஒதுக்குவது அபாயகரமாக இருக்கும் என்ற கருத்து கட்சிக்குள் நிலவுகிறது. 2021 தேர்தலில் காங்கிரஸ் வெற்றி பெற திமுக தரப்பே பல இடங்களில் நேரடியாக வேலை செய்ததாகவும், இந்த முறை அதே அளவு உதவி சாத்தியமில்லை என்பதாலும் சீட் எண்ணிக்கையில் கட்டுப்பாடு வைக்கப்படுகிறது என கூறப்படுகிறது.

கடந்த தேர்தலில் 25 தொகுதிகளில் போட்டியிட்டு 18 இடங்களில் வெற்றி பெற்றதை காங்கிரஸ் சுட்டிக்காட்டுகிறது. அதே நேரத்தில் 188 தொகுதிகளில் போட்டியிட்ட திமுக 55 இடங்களில் தோல்வியடைந்தது என்பதையும் நினைவூட்டுகிறது. அதனால் திமுக இழந்த சில தொகுதிகளில் தங்களுக்கு வாய்ப்பு அளிக்கலாம் என காங்கிரஸ் கோரியுள்ளது. ஆனால் இந்த கோரிக்கையை திமுக ஏற்கவில்லை என தகவல்கள் தெரிவிக்கின்றன.

இந்த முறை திமுக கூட்டணியில் கூடுதலாக புதிய கட்சிகள் இணைந்துள்ளதால், சீட் பகிர்வு மேலும் சிக்கலாகியுள்ளது. இதுவும் காங்கிரஸுக்கு அதிக இடங்கள் வழங்க முடியாத காரணங்களில் ஒன்றாகக் கூறப்படுகிறது.

மறுபுறம் நடிகர் விஜய்யின் தமிழக வெற்றிக் கழகம், காங்கிரஸுடன் கூட்டணி அமைக்க முயற்சி செய்து வருவதாகவும், சுமார் 70 தொகுதிகள் வரை வழங்கத் தயாராக இருப்பதாகவும் தகவல்கள் வெளியாகியுள்ளன. இது திமுக–காங்கிரஸ் பேச்சுவார்த்தையில் மறைமுக அழுத்தமாக பார்க்கப்படுகிறது.

கூட்டணி அரசு அமைப்பது குறித்தும் கருத்து வேறுபாடு இருப்பதாக கூறப்படுகிறது. காங்கிரஸ் ஆட்சியில் பங்கு கோரியதாக தகவல் இருந்தாலும், திமுக அதற்கு விருப்பமில்லை எனத் தெரிகிறது. கூட்டணி ஆட்சி நிலைத்தன்மை குறித்த கேள்விகளை எழுப்பும் என்பதால் தமிழக அரசியலுக்கு அது ஏற்றதல்ல என்ற நிலைப்பாட்டில் திமுக உள்ளது.

இவை அனைத்தும் இரு கட்சிகளின் வட்டாரங்களில் இருந்து வெளியாகிய தகவல்கள் மட்டுமே. இதுவரை திமுக அல்லது காங்கிரஸ் அதிகாரப்பூர்வமாக தொகுதி பங்கீடு விவரங்களை வெளியிடவில்லை. சில கருத்து வேறுபாடுகள் இருந்தாலும், அடுத்த சில வாரங்களில் ஒப்பந்தம் இறுதி செய்யப்படும் என அரசியல் வட்டாரங்கள் எதிர்பார்க்கின்றன.