தமிழக அரசியலில் புதிய அலை கிளப்பியுள்ள நடிகர் விஜய், தாம் தொடங்கிய தமிழக வெற்றிக்கழகம் கட்சியுடன் வரவிருக்கும் சட்டமன்றத் தேர்தலில் தனித்து களம் இறங்கத் தயாராகிறார்.

ஆரம்பத்திலிருந்தே திராவிட முன்னேற்றக் கழகம் மீது கடுமையான குற்றச்சாட்டுகளை முன்வைத்து வந்த அவர், சமீபத்தில் அண்ணா திராவிட முன்னேற்றக் கழகம் கட்சியையும் ‘ஊழல் சக்தி’ எனச் சாடியதால் அரசியல் சூழல் சூடுபிடித்துள்ளது.

இந்த விமர்சனங்களுக்கு பதிலடி கொடுக்க அதிமுக தலைவர்கள் தீவிரமாக களமிறங்கியுள்ளனர். குறிப்பாக சென்னையில் நடந்த நிகழ்ச்சியில், அதிமுக முன்னாள் அமைச்சர் ஜெயகுமார், விஜயை நேரடியாக குறிவைத்து கடுமையாக விமர்சித்தார்.

மேலும், ஜெயலலிதா பிறந்தநாள் விழாவில் பேசிய அவர், “விஜய் பெரும்பாலும் பணக்காரர்களின் வீட்டு விழாக்களில்தான் கலந்து கொள்வார்; எப்போதாவது ஏழை மக்களின் நிகழ்ச்சிகளில் பங்கேற்றிருக்கிறாரா? கோடீஸ்வரர்களின் வட்டாரமே அவருக்கு நெருக்கம்” எனக் கேள்வி எழுப்பினார்.

மேலும், “பல தயாரிப்பாளர்களை உருவாக்கியதாகச் சொல்லிக்கொள்வார். ஆனால் தன்னை கஷ்டப்பட்டு வளர்த்த தந்தையை ஏன் தயாரிப்பாளராக மாற்றவில்லை? அதுவே அவரது மனநிலையை காட்டுகிறது” எனக் குற்றம்சாட்டினார்.

இந்த கருத்துக்கள், தேர்தலை முன்னிட்டு அரசியல் களத்தில் புதிய விவாதத்தையும் பரபரப்பையும் ஏற்படுத்தியுள்ளன.