2026 சட்டமன்றத் தேர்தல் முடிவுகள் தமிழக அரசியலில் பல்வேறு மாற்றங்களை ஏற்படுத்தியுள்ள நிலையில், நாம் தமிழர் கட்சி சந்தித்த வாக்கு சரிவு அரசியல் வட்டாரங்களில் பெரும் விவாதமாக மாறியுள்ளது. குறிப்பாக நடிகர் விஜய்யின் அரசியல் வருகையால் இளைஞர்கள் மற்றும் நகர்ப்புற வாக்குகள் பெருமளவில் தவெக பக்கம் சென்றதே, சீமானின் கட்சிக்கு ஏற்பட்ட பின்னடைவின் முக்கிய காரணமாக பார்க்கப்படுகிறது.

இருப்பினும், இந்த தோல்வியால் சற்றும் தளராமல், வரும் 2029 நாடாளுமன்றத் தேர்தலை இலக்காகக் கொண்டு மீண்டும் தனித்து போட்டியிடப் போவதாக சீமான் அறிவித்திருப்பது அவரது ஆதரவாளர்களுக்கு புதிய உற்சாகத்தை ஏற்படுத்தியுள்ளது.

2010-ஆம் ஆண்டு தொடங்கப்பட்ட நாம் தமிழர் கட்சி, 2016 சட்டமன்றத் தேர்தலில் முதன்முறையாக 234 தொகுதிகளிலும் தனித்து போட்டியிட்டது. அப்போது வெறும் 1.1 சதவீத வாக்குகளை மட்டுமே பெற்றிருந்தாலும், சீமானின் தமிழ் தேசிய அரசியல் மற்றும் மேடைப் பேச்சுகள் இளைஞர்களிடம் கவனம் பெற்றன.

அதன்பிறகு 2019 மக்களவைத் தேர்தலில் ஆண்-பெண் சமபங்கு அடிப்படையில் வேட்பாளர்களை நிறுத்திய நாம் தமிழர் கட்சி, 3.9 சதவீத வாக்குகளை பெற்று கவனம் ஈர்த்தது.

2021 சட்டமன்றத் தேர்தலில் 6.61 சதவீத வாக்குகளை பெற்று, 170-க்கும் மேற்பட்ட தொகுதிகளில் மூன்றாவது இடத்தை பிடித்து அரசியல் வட்டாரங்களை ஆச்சரியப்படுத்தியது.தொடர்ந்து 2024 மக்களவைத் தேர்தலில் 8.1 சதவீத வாக்குகளுடன் மாநிலக் கட்சி அங்கீகாரத்தையும் பெற்றது.

ஆனால் 2026 சட்டமன்றத் தேர்தலில் நிலைமை முற்றிலும் மாறியது. 2021-ல் 6.6 சதவீதமாக இருந்த வாக்கு வங்கி, இந்த முறை சுமார் 4 சதவீதமாக குறைந்துள்ளது. மொத்தமாக 19 லட்சத்துக்கும் அதிகமான வாக்குகள் கிடைத்திருந்தாலும், பெரும்பாலான தொகுதிகளில் நாம் தமிழர் கட்சி நான்காவது இடத்திற்கே தள்ளப்பட்டுள்ளது.

காரைக்குடியில் போட்டியிட்ட சீமான் கூட நான்காவது இடம் பெற்றது கட்சியினருக்கு அதிர்ச்சியை ஏற்படுத்தியுள்ளது.அரசியல் விமர்சகர்களின் கருத்துப்படி, தவெக தலைவர் விஜய்யின் அரசியல் வருகை தான் இந்த மாற்றத்திற்கான முக்கிய காரணமாக பார்க்கப்படுகிறது.

இதுவரை சீமானின் உணர்ச்சி சார்ந்த பேச்சுகளால் ஈர்க்கப்பட்ட இளைஞர்கள், பெண்கள் மற்றும் புதிய வாக்காளர்கள் பலர், இந்த முறை விஜய்யை மாற்று சக்தியாக ஏற்றுக்கொண்டதாக கூறப்படுகிறது.

குறிப்பாக நகர்ப்புறங்களில் தவெக பெற்ற ஆதரவு, நாம் தமிழர் கட்சியின் வாக்கு வங்கியை பெரிதும் பாதித்துள்ளதாக அரசியல் ஆய்வாளர்கள் கருதுகின்றனர்.

இந்த சூழலிலும், “2029 நாடாளுமன்றத் தேர்தலிலும் கூட்டணி இல்லை; தனித்தே போட்டி” என்று சீமான் உறுதியாக அறிவித்துள்ளார்.மேலும்,“இந்த தேர்தலில் இழந்த வாக்குகளை விட அதிக வாக்குகளை பெற்று மீண்டும் எழுச்சி பெறுவோம்,”என்று அவர் தொண்டர்களுக்கு நம்பிக்கை அளித்துள்ளார்.

கொள்கை அரசியல் மற்றும் தனித்து போட்டி என்ற அடையாளத்தை நாம் தமிழர் கட்சி தொடர்ந்து தக்கவைத்திருந்தாலும், தற்போதைய டிஜிட்டல் அரசியல் சூழலில் வெறும் உணர்ச்சி சார்ந்த பிரச்சாரம் மட்டும் போதாது என்பதை இந்த தேர்தல் உணர்த்தியுள்ளதாக அரசியல் விமர்சகர்கள் கூறுகின்றனர்.

மக்கள் மத்தியில் தொடர்ந்து களப்பணியில் ஈடுபடுவது, சமூக ஊடகங்களில் தாக்கத்தை அதிகரிப்பது மற்றும் புதிய தலைமுறையின் அரசியல் எதிர்பார்ப்புகளை புரிந்துகொள்வது போன்ற சவால்கள் சீமான் முன்னிலையில் உள்ளன.

2029 தேர்தலில் சீமானின் “தனித்து போட்டி” முடிவு மீண்டும் நாம் தமிழர் கட்சியை தமிழகத்தின் மூன்றாவது பெரிய சக்தியாக மாற்றுமா? அல்லது தற்போதைய சரிவு தொடருமா? என்பது எதிர்கால அரசியல் களத்தில் தெரியவரும்.