தமிழகத்தில் தற்போதைய அரசியல் சூழலில் ஏழு சட்டமன்றத் தொகுதிகள் காலியாக உள்ளதாக அதிகாரப்பூர்வமாக அறிவிக்கப்பட்டுள்ளது. முதலமைச்சர் ஜோசப் விஜய் பெரம்பூர் மற்றும் திருச்சி கிழக்கு ஆகிய இரண்டு தொகுதிகளில் வெற்றி பெற்று, பின்னர் திருச்சி கிழக்கு தொகுதி எம்எல்ஏ பதவியை ராஜினாமா செய்தார். மேலும், கடந்த மே 13 அன்று சட்டமன்றத்தில் நடைபெற்ற நம்பிக்கை வாக்கெடுப்பில் ஆளுங்கட்சியான தவெக அரசுக்கு ஆதரவாக வாக்களித்த அதிமுக சட்டமன்ற உறுப்பினர்களான மரகதம் குமரவேல், ஜெயக்குமார், சத்தியபாமா, இசக்கி சுப்பையா ஆகியோர் தங்களது எம்எல்ஏ பதவிகளை ராஜினாமா செய்துவிட்டு தமிழக வெற்றிக் கழகத்தில் இணைந்தனர். இவர்களைத் தொடர்ந்து மூத்த தலைவர்களான சி. விஜயபாஸ்கர் மற்றும் எம்.ஆர். விஜயபாஸ்கர் ஆகியோரும் தங்களது சட்டமன்ற உறுப்பினர் பதவிகளை ராஜினாமா செய்துள்ளனர். கரூர் தொகுதி காலியானதாக அரசிதழில் வெளியிடப்பட்டுள்ளது. இதன் விளைவாக, காலியாக உள்ள இந்த ஏழு தொகுதிகளுக்கும் வரும் நவம்பர் மாதத்திற்குள் இடைத்தேர்தல் நடத்தப்பட வேண்டிய கட்டாயம் தேர்தல் ஆணையத்திற்கு ஏற்பட்டுள்ளது. அதற்கான பணிகளும் முடுக்கிவிடப்பட்டுள்ளன.

இந்த பரபரப்பான அரசியல் சூழ்நிலையில், கடந்த தேர்தலில் கொளத்தூர் தொகுதியில் தோல்வியைத் தழுவிய முன்னாள் முதலமைச்சர் மு.க. ஸ்டாலினை மீண்டும் எப்படியாவது சட்டமன்றத்திற்குள் கொண்டுவர திமுக தலைமை தீவிரமாகச் செயல்பட்டு வருகிறது. தொடக்கத்தில் காலியாக உள்ள திருச்சி கிழக்கு தொகுதியில் அவர் போட்டியிடலாம் என்று பரவலாக எதிர்பார்க்கப்பட்டது. ஆனால், கட்சித் தலைமை மேற்கொண்ட உள்ளக ஆய்வுகளில், திருச்சி கிழக்கு மற்றும் அதிமுகவினர் ராஜினாமா செய்த இதர தொகுதிகளில் திமுகவின் வெற்றி வாய்ப்பு மிகக் குறைவாக இருப்பதாகக் கணிக்கப்பட்டுள்ளது. எனவே, எந்தவித சறுக்கலும் இல்லாத பாதுகாப்பான ஒரு தொகுதியைத் தேர்ந்தெடுக்க வேண்டிய அவசியம் கட்சித் தலைமைக்கு உருவாகியுள்ளது.

இதன் காரணமாக, முன்னாள் முதலமைச்சர் கலைஞர் கருணாநிதியின் பூர்வீகமும், திமுகவின் அசைக்க முடியாத கோட்டையுமான திருவாரூர் தொகுதியில் மு.க. ஸ்டாலினை களமிறக்க தீவிர ஆலோசனைகள் தற்போது நடைபெற்று வருகின்றன. இந்தத் திட்டத்தை செயல்படுத்துவதற்காக, தற்போது திருவாரூர் தொகுதி சட்டமன்ற உறுப்பினராகப் பதவி வகிக்கும் பூண்டி கே. கலைவாணன் தனது பதவியை விரைவில் ராஜினாமா செய்யக்கூடும் என்று நம்பத்தகுந்த அரசியல் வட்டாரங்கள் தெரிவிக்கின்றன. தற்போதைய இக்கட்டான அரசியல் நெருக்கடியில் மு.க. ஸ்டாலினை மீண்டும் சட்டமன்ற உறுப்பினராக்கி விட வேண்டும் என்ற ஒற்றை இலக்கில் திமுக தலைமை பல்வேறு வியூகங்களை வகுத்து வருகிறது.