சென்னை: அதிமுகவில் இருந்து முக்கிய நிர்வாகிகள் மற்றும் முன்னாள் அமைச்சர்கள் அடுத்தடுத்து தமிழக வெற்றிக் கழகத்தில் (தவெக) இணைந்து வரும் நிலையில், முன்னாள் சுகாதாரத் துறை அமைச்சரும் விராலிமலை தொகுதி எம்.எல்.ஏவுமான டாக்டர் சி. விஜயபாஸ்கர் தனது எம்.எல்.ஏ பதவியை ராஜினாமா செய்துள்ளதாக வெளியாகியுள்ள தகவல், தமிழக அரசியலில் புதிய பரபரப்பை ஏற்படுத்தியுள்ளது.

அவரது இந்த நடவடிக்கை, தவெகவில் இணைவதற்கான முன்னோட்டமாக அரசியல் வட்டாரங்களில் பார்க்கப்படுகிறது. 2026 சட்டப்பேரவைத் தேர்தலுக்குப் பிறகு அதிமுகவில் உருவாகியுள்ள அதிருப்தி மற்றும் கட்சித் தாவல் சூழலுக்கு இந்த நிகழ்வு மேலும் வேகம் சேர்க்கும் என அரசியல் பார்வையாளர்கள் கருதுகின்றனர்.

ஜெயலலிதா தலைமையிலான ஆட்சிக் காலத்திலிருந்து அதிமுகவில் முக்கியப் பொறுப்புகளை வகித்து வந்த சி. விஜயபாஸ்கர், சுகாதார அமைச்சராக இருந்தபோது கொரோனா காலத்தில் பல்வேறு நிர்வாக நடவடிக்கைகளால் கவனம் பெற்றார். ஆனால், சமீப காலமாக அதிமுக பொதுச் செயலாளர் எடப்பாடி கே. பழனிசாமி தலைமையின் மீது அவர் அதிருப்தி கொண்டிருந்ததாகக் கூறப்படுகிறது. குறிப்பாக, புதுக்கோட்டை மாவட்டச் செயலாளர் பதவி அவரிடமிருந்து பறிக்கப்பட்டதைத் தொடர்ந்து, கட்சித் தலைமையுடனான இடைவெளி அதிகரித்ததாக தகவல்கள் தெரிவிக்கின்றன.

சட்டப்பேரவையில் தவெக அரசுக்கு ஆதரவாக செயல்பட்ட ‘ரெபல்’ எம்.எல்.ஏக்களில் ஒருவராகக் கருதப்படும் விஜயபாஸ்கர், அண்மையில், “உழைக்கும் தொண்டர்களை எதிரிகளாகப் பார்க்கும் தலைமைக்கு வரலாறு வெற்றியைத் தந்ததில்லை” எனக் கூறி, அதிமுக தலைமையை மறைமுகமாக விமர்சித்திருந்தார்.

விஜயபாஸ்கரின் ராஜினாமா, குறிப்பாக புதுக்கோட்டை மற்றும் டெல்டா மண்டலங்களில் அதிமுகவின் அமைப்பு பலத்திற்கு பின்னடைவை ஏற்படுத்தக்கூடும் என அரசியல் விமர்சகர்கள் சுட்டிக்காட்டுகின்றனர். அதே நேரத்தில், தவெக தலைவர் விஜய் தலைமையிலான கட்சிக்கு இது ஒரு முக்கிய அரசியல் ஆதாயமாகக் கருதப்படுகிறது.

ஏற்கனவே முன்னாள் அமைச்சர்களான கே.ஏ. செங்கோட்டையன், எம்.சி. சம்பத், கடம்பூர் ராஜு, உடுமலை ராதாகிருஷ்ணன், என்.ஆர். சிவபதி, வெல்லமண்டி நடராஜன், கே.டி. பச்சைமால் உள்ளிட்டோர் தவெகவில் இணைந்துள்ளதாக கூறப்படுகிறது. மேலும், மதுராந்தகம் மரகதம் குமரவேல், பெருந்துறை ஜெயக்குமார், தாராபுரம் சத்யாபாமா, அம்பாசமுத்திரம் இசக்கி சுப்பையா உள்ளிட்ட எம்.எல்.ஏக்களும் கட்சி மாறியுள்ளனர்.

அதேபோல், முன்னாள் எம்.பி.க்களான என். பாலகங்கா, ஆர். வனரோஜா, ஏ. இளவரசன் மற்றும் முன்னாள் நிர்வாகிகளான எம். வசந்தி, ஆர். நடராஜ், இ. புவனேஸ்வரி உள்ளிட்டோரும் தவெகவில் இணைந்திருப்பதாக தகவல்கள் வெளியாகியுள்ளன.

இந்த தொடர் இணைப்புகள் தவெகவை அரசியல் ரீதியாக வலுப்படுத்தும் நிலையில், அதிமுகவின் அடித்தள அமைப்புக்கு பெரும் சவாலாக மாறியுள்ளதாக அரசியல் வட்டாரங்கள் மதிப்பிடுகின்றன. விராலிமலையை தனது அரசியல் கோட்டையாகக் கொண்ட சி. விஜயபாஸ்கரின் அடுத்தகட்ட அரசியல் முடிவு மற்றும் அவரது அதிகாரப்பூர்வ தவெக இணைப்பு எப்போது நடைபெறும் என்பது தற்போது தமிழக அரசியலில் அதிகம் எதிர்பார்க்கப்படும் விஷயமாக மாறியுள்ளது.

கட்சிக்குள் அதிருப்தி தொடரும் சூழலில், மேலும் பல முக்கிய தலைவர்கள் தவெகவை நோக்கி நகர்வார்களா என்ற கேள்வியும் அரசியல் அரங்கில் எழுந்துள்ளது.