மேற்கு வங்க அரசியலில் பரபரப்பை ஏற்படுத்தும் வகையில் திரிணாமுல் காங்கிரஸ் கட்சியில் புதிய அரசியல் அதிர்ச்சி உருவாகியுள்ளது. கட்சியின் மாநில தலைவராக இருந்த சந்திரிமா பட்டாச்சார்யா திடீரென தனது பதவியை ராஜினாமா செய்திருப்பது அரசியல் வட்டாரங்களில் பெரும் பேசுபொருளாக மாறியுள்ளது.

இதுதொடர்பாக, சந்திரிமா பட்டாச்சார்யா தனது ராஜினாமா கடிதத்தை கட்சித் தலைவர் மம்தா பானர்ஜிக்கு அனுப்பியுள்ளதாக தகவல்கள் வெளியாகியுள்ளன. இந்த திடீர் முடிவு கட்சிக்குள் நிலவும் உள்கட்சி குழப்பத்தை மேலும் வெளிச்சத்துக்கு கொண்டு வந்துள்ளது.

கடந்த மாதம் திரிணாமுல் காங்கிரஸ் மாநில தலைவராக சுப்ரதா பக்ஷியை நியமித்த மம்தா பானர்ஜி, கட்சியை மீண்டும் வலுப்படுத்தும் முயற்சியில் தீவிரமாக செயல்பட்டு வந்தார். ஆனால், பதவியேற்று ஒரு மாதமே ஆன நிலையில் மாநில தலைவர் பதவியில் இருந்து விலகியிருப்பது மம்தா பானர்ஜிக்கு அரசியல் ரீதியாக பெரும் பின்னடைவாக பார்க்கப்படுகிறது.

மேற்கு வங்க சட்டசபை தேர்தல் முடிவுகள் மாநில அரசியலில் மிகப்பெரிய மாற்றத்தை ஏற்படுத்தின. நீண்டகால ஆதிக்கம் செலுத்திய திரிணாமுல் காங்கிரஸ் கட்சிக்கு எதிராக பாரதிய ஜனதா கட்சி மிகப்பெரிய வெற்றியை பதிவு செய்து, 200-க்கும் அதிகமான தொகுதிகளில் வென்று முதல் முறையாக ஆட்சியை கைப்பற்றியது.

இதனைத் தொடர்ந்து சுவேந்து அதிகாரி முதல் மந்திரியாக பதவியேற்று ஆட்சிப் பொறுப்பை ஏற்றார். இந்த அரசியல் மாற்றம் திரிணாமுல் காங்கிரஸ் கட்சிக்குள் கடும் அதிர்வுகளை உருவாக்கியது.

மம்தா பானர்ஜியின் தலைமையின்மீது அதிருப்தி அதிகரித்த நிலையில், திரிணாமுல் காங்கிரஸ் கட்சியின் 80 எம்.எல்.ஏ.க்களில் 60 பேர் ரிதப்ரதா பானர்ஜி தலைமையில் தனி அணியாக செயல்பட்டு வருவதாக தெரிவிக்கப்படுகிறது.

அதிருப்தி எம்.எல்.ஏ.க்களின் எண்ணிக்கை மூன்றில் இரண்டு பங்கைக் கடந்துள்ளதாக தகவல்கள் வெளியாகியுள்ளதால், கட்சிக்குள் நிலவும் அதிகாரப் போட்டி மேலும் தீவிரமடைந்துள்ளது.

இதற்கிடையில், கொல்கத்தாவில் உள்ள திரிணாமுல் காங்கிரஸ் கட்சி அலுவலகமும் அதிருப்தி அணியின் கட்டுப்பாட்டுக்குள் சென்றுள்ளதாக தெரிவிக்கப்படுகிறது. இந்த தொடர் அரசியல் பரபரப்பு மேற்கு வங்க அரசியலில் அடுத்த கட்ட திருப்பங்களை உருவாக்கும் என எதிர்பார்க்கப்படுகிறது.