தமிழக பாஜக முன்னாள் தலைவர் அண்ணாமலை தொடங்கியுள்ள 'வி த லீடர்ஸ்' அமைப்பு, சுற்றுச்சூழல் விழிப்புணர்வை மையமாகக் கொண்டு சென்னை நகரில் பிரம்மாண்ட பேரணியை நடத்தத் திட்டமிட்டுள்ளது. ஆகஸ்ட் 16-ஆம் தேதி நடைபெறவுள்ள இந்த பேரணியில் ஆயிரக்கணக்கானோர் பங்கேற்பார்கள் என அமைப்பு தரப்பில் தெரிவிக்கப்பட்டுள்ளது.

பாஜகவிலிருந்து விலகிய பிறகு அண்ணாமலை தொடங்கிய 'வி த லீடர்ஸ்' அமைப்பு, உறுப்பினர் சேர்க்கை மற்றும் அமைப்பு விரிவாக்கப் பணிகளில் தீவிரமாக ஈடுபட்டு வருகிறது. மாநிலம் முழுவதும் அமைப்பை வலுப்படுத்தி, எதிர்காலத்தில் அரசியல் கட்சியாக மாற்றும் நோக்கில் பல்வேறு நிகழ்ச்சிகள் நடத்தப்பட்டு வருகின்றன.

அமைப்பின் முதல் மாநில மாநாடு பொள்ளாச்சியில் நடைபெற்றது. இதில் ஆயிரக்கணக்கானோர் பங்கேற்றதாக கூறப்பட்ட நிலையில், அண்ணாமலையின் உரை அரசியல் வட்டாரங்களில் கவனம் பெற்றது. தொடர்ந்து, போதை ஒழிப்பு மற்றும் சமூக விழிப்புணர்வு தொடர்பான நிகழ்ச்சிகளையும் அமைப்பு முன்னெடுத்து வருகிறது.

இதன் தொடர்ச்சியாக, "என் குமரி... பசுமை குமரி" என்ற பெயரில் கன்னியாகுமரியில் ஆகஸ்ட் 2-ஆம் தேதி சுற்றுச்சூழல் தொடர்பான மாநாடு நடத்தவும் திட்டமிடப்பட்டுள்ளதாக தகவல்கள் வெளியாகியுள்ளன.

அதனைத் தொடர்ந்து, சென்னை ராஜரத்தினம் மைதானம் அருகே ஆகஸ்ட் 16-ஆம் தேதி சுற்றுச்சூழல் விழிப்புணர்வு பேரணி நடைபெறும் என்று அறிவிக்கப்பட்டுள்ளது. இந்த பேரணிக்கு அண்ணாமலை தலைமை தாங்கவுள்ளதுடன், மாநிலத்தின் பல்வேறு பகுதிகளில் இருந்து அமைப்பின் நிர்வாகிகள் மற்றும் உறுப்பினர்கள் பங்கேற்பார்கள் என எதிர்பார்க்கப்படுகிறது.

இதற்கிடையில், 'வி த லீடர்ஸ்' அமைப்பின் செயல்பாடுகளை ஒருங்கிணைக்கும் வகையில் புதிய மொபைல் செயலியும் அறிமுகப்படுத்தப்பட்டுள்ளது. அதன் மூலம் புதிய உறுப்பினர்கள் நேரடியாக பதிவு செய்யவும், ஏற்கனவே இணைந்த உறுப்பினர்கள் தங்களது பதிவு எண்ணைப் பயன்படுத்தி உள்நுழைந்து அமைப்பின் நிகழ்வுகள் மற்றும் தகவல்களை அறிந்து கொள்ளவும் வசதி செய்யப்பட்டுள்ளதாக தெரிவிக்கப்பட்டுள்ளது.

சமூக மற்றும் சுற்றுச்சூழல் சார்ந்த நிகழ்ச்சிகள் மூலம் மாநிலம் முழுவதும் தனது அமைப்பை விரிவுபடுத்தும் முயற்சியில் அண்ணாமலை தீவிரமாக செயல்பட்டு வருவதாக அரசியல் வட்டாரங்களில் பேசப்பட்டு வருகிறது. இருப்பினும், இந்த அமைப்பு அரசியல் கட்சியாக எப்போது மாற்றப்படும் என்பது குறித்து இதுவரை அதிகாரப்பூர்வ அறிவிப்பு வெளியாகவில்லை.