தமிழக அரசியலில் கடந்த சில ஆண்டுகளாக "என் மண், என் மக்கள்" என்ற கோஷத்துடன் பாஜகவை அடித்தளத்தில் வலுப்படுத்த முயன்ற அண்ணாமலை, 2026 சட்டமன்றத் தேர்தலுக்கான பாஜக வேட்பாளர் பட்டியலில் இடம்பெறாதது பெரிய விவாதமாக மாறியுள்ளது.

அண்ணாமலை போட்டியிடுவார், சட்டமன்றத்தில் வலுவான குரலாக இருப்பார் என எதிர்பார்த்திருந்த அவரது ஆதரவாளர்களுக்கு இது அதிர்ச்சியாக அமைந்துள்ளது. “நான் வேட்பாளர் இல்லை, பூத் ஏஜென்ட் தான்” என்ற அவரது முந்தைய கருத்தை பலர் அரசியல் தந்திரமாக எடுத்துக் கொண்ட நிலையில், இப்போது அது உண்மையாகி விட்டது.

அண்ணாமலை போட்டியிடாததற்கான காரணங்கள் குறித்து பல்வேறு கருத்துக்கள் வெளியாகின்றன. அதிமுக கூட்டணியில் பாஜகவுக்கு ஒதுக்கப்பட்ட தொகுதிகளில் வெற்றி வாய்ப்பு குறைவாக இருக்கலாம் என்ற மதிப்பீடு, இந்த முடிவுக்குப் பின்னணி காரணமாக இருக்கலாம் என கூறப்படுகிறது. தோல்வி ஏற்பட்டால் தலைமைப் பதவிக்கு பாதிப்பு ஏற்படும் என்பதையும் அவர் கருத்தில் கொண்டிருக்கலாம் என அரசியல் விமர்சகர்கள் கருதுகின்றனர்.

மேலும், அண்ணாமலைக்கு முழு மாநிலத்திலும் பிரசாரம் செய்ய ‘ஸ்டார் கேம்பைனர்’ ஆக சுதந்திரம் வழங்கப்பட்டுள்ளது என்றும், தேர்தலுக்குப் பிறகு தேசிய அரசியலில் அவருக்கு வாய்ப்பு கிடைக்கலாம் என்றும் சிலர் கூறுகின்றனர். இதற்கிடையில், அவர் மத்திய தலைமையின் “குட் புக்கில்” இல்லையென்றும் சில கருத்துக்கள் பரவி வருகின்றன.

ஆனால், அடிமட்டத் தொண்டர்கள் இதை ஏற்க முடியாமல் அதிருப்தியில் உள்ளனர். “சிஸ்டத்தை மாற்ற வந்தவர் ஏன் புறக்கணிக்கப்பட்டார்?” என்ற கேள்வி எழுப்பப்படுகிறது.

தற்போது அண்ணாமலை அமைதியாக இருந்து தேர்தல் பிரசாரத்தில் கவனம் செலுத்துவார் எனக் கூறப்படுகிறது. தேர்தல் முடிவுகளுக்குப் பிறகு தான் அவரது அடுத்த அரசியல் நகர்வு என்ன என்பது தெளிவாகும்.

அவர் சாதாரண தொண்டனாக தன்னை முன்வைத்து சென்டிமென்ட் உருவாக்குவாரா? அல்லது தேர்தல் மேடையில் தீவிர பிரசாரம் மூலம் தாக்கத்தை ஏற்படுத்துவாரா? என்பது அரசியல் வட்டாரத்தில் எதிர்பார்ப்பை ஏற்படுத்தியுள்ளது.
தேர்தல் முடிவுகளுக்குப் பிறகு அண்ணாமலையின் அரசியல் பாதை எந்த திசைக்கு செல்லும் என்பது தான் இப்போதைய பெரிய கேள்வியாக உள்ளது.