2026 சட்டமன்றத் தேர்தலை முன்னிட்டு, அதிமுக–பாஜக கூட்டணியில் தொகுதி பங்கீடு குறித்ததாக சமூக வலைதளங்களில் வெளியான ஒரு பட்டியல் அரசியல் களத்தில் பெரும் பரபரப்பை ஏற்படுத்தியுள்ளது. அதிமுகவுக்கு 170 இடங்கள், பாஜகவுக்கு 23 இடங்கள், தேமுதிக, அமமுக, ஓபிஎஸ் தரப்புக்கு தலா சில இடங்கள் என குறிப்பிடப்பட்ட அந்த பட்டியல், அமித்ஷா – பியூஷ் கோயல் ஆலோசனைப்படி திட்டமிட்டு கசிய விடப்பட்டதாக கூறப்படுகிறது. ஆனால், இதுவே தற்போது பாஜக கூட்டணிக்கு கடும் தலைவலியாக மாறியுள்ளது.

இந்த பட்டியலில் தங்களுக்கு ஒதுக்கப்பட்டதாக கூறப்படும் குறைந்த இடங்கள் காரணமாக தேமுதிக, அமமுக, ஓபிஎஸ் அணிகளில் கடும் அதிருப்தி உருவாகியுள்ளது. “6 இடங்கள், 3 இடங்கள் என்ற பேச்சு வதந்தி” என்று டிடிவி தினகரன் வெளிப்படையாக மறுத்துள்ளார். ஓபிஎஸ் தரப்பும், “மூன்று இடங்களுக்காக அதிமுக–பாஜக கூட்டணியில் இணைய முடியாது” என்று தங்கள் நிலைப்பாட்டை தெளிவுபடுத்தியுள்ளது. இதேபோல், பிரேமலதாவும் இந்த தகவல்களை கண்டித்து, இவ்வாறு தகவல் பரப்பியவர்களுக்கே இது பாதிப்பாகும் என தெரிவித்துள்ளார்.

இந்த சூழலில், நடிகர் விஜய் தலைமையிலான தமிழக வெற்றிக் கழகம் (தவெக) 2026 தேர்தலில் மையப் புள்ளியாக மாறியுள்ளது. அதிமுக–பாஜக கூட்டணியில் மரியாதை கிடைக்கவில்லை என்ற எண்ணம் கொண்ட பல சிறிய கட்சிகளும், பிரிந்து சென்ற அணிகளும் தவெக பக்கம் நகர வாய்ப்பு இருப்பதாக அரசியல் வட்டாரங்களில் பேசப்படுகிறது. ஓபிஎஸ் மற்றும் டிடிவி தினகரன் அணிகளும் தவெகவுடன் கூட்டணி அமைப்பது குறித்து திறந்த மனதுடன் ஆலோசித்து வருவதாக தகவல்கள் வெளியாகியுள்ளன.

மொத்தத்தில், சமூக வலைதளங்களில் பரவிய அந்த தொகுதி பங்கீடு பட்டியல், அதிமுக–பாஜக கூட்டணிக்குள் அதிருப்தியை வெடிக்கச் செய்து, எதிர்பாராத விதமாக தவெகுக்கு சாதகமான சூழலை உருவாக்கி உள்ளது. இந்த அதிருப்திகளை சமாளிக்க பாஜக தலைமை தற்போது சமாதான பேச்சுகளை தொடங்கியுள்ளதாகவும் கூறப்படுகிறது.