திருச்சி மாவட்டம் மணச்சநல்லூர் தொகுதி திமுக எம்.எல்.ஏ கதிரவன், தனது தந்தையின் 81-வது பிறந்தநாளை முன்னிட்டு சுமார் ரூ.40 கோடி மதிப்புள்ள ஹெலிகாப்டரைப் பரிசாக வழங்கியதாக வெளியாகியுள்ள தகவல் பேசுபொருளாகியுள்ளது. தமிழகத்தில் பிரபலமான தனலட்சுமி சீனிவாசன் கல்விக் குழுமத்தின் நிறுவனரான தனது தந்தை சீனிவாசனுக்கு கதிரவன் வழங்கிய இந்தப் பிரம்மாண்டப் பரிசு பலரையும் வியப்பில் ஆழ்த்தியுள்ளது.

திருச்சி மாவட்டம் மணச்சநல்லூர் சட்டமன்றத் தொகுதியின் திமுக எம்.எல்.ஏவாக இருப்பவர் கதிரவன். இவரது தந்தை சீனிவாசன், தமிழகத்தில் பிரபலமாக விளங்கும் தனலட்சுமி சீனிவாசன் கல்விக் குழுமத்தின் நிறுவனராக உள்ளார். இந்தக் குழுமத்தின் கீழ் மருத்துவக் கல்லூரிகள், பொறியியல் கல்லூரிகள் மட்டுமின்றி சர்க்கரை ஆலை, சிட்பண்ட்ஸ் உள்ளிட்ட பல்வேறு நிறுவனங்களும் செயல்பட்டு வருகின்றன.

பெரும் தொழிலதிபர் குடும்பத்தைச் சேர்ந்த கதிரவன், ரோல்ஸ் ராய்ஸ் உள்ளிட்ட சொகுசு கார்களையும் வைத்திருப்பதாகக் கூறப்படுகிறது. இந்நிலையில், கடந்த வாரம் சீனிவாசன் தனது 81-வது பிறந்தநாளைக் கொண்டாடினார். இதையொட்டி, அவரது பிறந்தநாள் விழாவை கதிரவன் பிரம்மாண்டமாக ஏற்பாடு செய்திருந்தார். பெரம்பலூரில் உள்ள தனது கல்லூரி வளாகத்தில் நடைபெற்ற இந்த விழாவில் சுமார் 30 ஆயிரம் பேருக்கு அறுசுவை உணவு வழங்கப்பட்டதாகத் தெரிவிக்கப்பட்டுள்ளது.

விழா நிறைவில், தனது தந்தை சீனிவாசனுக்கு ஹெலிகாப்டரை கதிரவன் பரிசாக வழங்கியதாகக் கூறப்படுகிறது. சுமார் ரூ.40 கோடி மதிப்புடையதாகக் கூறப்படும் இந்த ஹெலிகாப்டரில் ஐந்து பேர் பயணிக்க முடியும் எனத் தகவல்கள் தெரிவிக்கின்றன. பிறந்தநாள் பரிசாக விலை உயர்ந்த கார்கள் வழங்கப்படுவதைப் பார்த்திருக்கிறோம்; ஆனால், தந்தைக்கு ஹெலிகாப்டரையே பரிசாக வழங்கியிருப்பது ஆச்சரியத்தை ஏற்படுத்தியுள்ளதாக விழாவில் பங்கேற்றவர்கள் பேசியதாகக் கூறப்படுகிறது.

மேலும், மகன் பரிசளித்த ஹெலிகாப்டரில் சீனிவாசன் சுற்றுலா மற்றும் ஆன்மிகத் தலங்களுக்குச் சென்று வருவதாகவும் தகவல்கள் வெளியாகியுள்ளன. சமயபுரம், பழனி, கொடைக்கானல், ஊட்டி மற்றும் கேரளா உள்ளிட்ட இடங்களுக்கு அவர் சென்று வருவதாகக் கூறப்படும் நிலையில், ஹெலிகாப்டர் பரிசளிக்கப்பட்ட காட்சிகள் சமூக வலைத்தளங்களில் கவனம் பெற்று வருகின்றன.

கதிரவன் கடந்த 2021-ஆம் ஆண்டு முதல் மணச்சநல்லூர் தொகுதியின் எம்.எல்.ஏவாக இருந்து வருகிறார். கடந்த ஏப்ரல் மாதம் நடைபெற்ற சட்டமன்றப் பொதுத்தேர்தலிலும் திமுக சார்பில் போட்டியிட்டு வெற்றி பெற்றார். தேர்தலின்போது அவர் தாக்கல் செய்த வேட்புமனுவில், தனது மொத்த சொத்து மதிப்பு ரூ.153.5 கோடி என்றும், ரூ.37.5 கோடி கடன் இருப்பதாகவும், ஆண்டு வருமானம் ரூ.3.6 கோடி என்றும் குறிப்பிட்டிருந்தார்.

சட்டமன்றத் தேர்தலில் மணச்சநல்லூர் தொகுதியில் கதிரவன் 81,447 வாக்குகளைப் பெற்று, 12,364 வாக்குகள் வித்தியாசத்தில் வெற்றி பெற்றார். தமிழக அரசியல் சூழலில் கவனம் பெற்றுள்ள கதிரவனின் குடும்பப் பின்னணியும், தந்தைக்கு வழங்கியதாகக் கூறப்படும் ரூ.40 கோடி ஹெலிகாப்டர் பரிசும் தற்போது பேசுபொருளாகியுள்ளது.