1980 ஆம் ஆண்டு நடைபெற்ற தமிழ்நாடு சட்டமன்றத் தேர்தல், மாநில அரசியலில் மிக முக்கியமான திருப்புமுனையாக அமைந்தது. மத்திய அரசால் ஆட்சி கலைக்கப்பட்ட பின்னரும், மக்களின் ஆதரவுடன் எம்.ஜி.ஆர் தலைமையிலான அதிமுக மீண்டும் ஆட்சியை கைப்பற்றியது.

எமர்ஜென்சி காலத்தில் தமிழ்நாட்டில் திமுக ஆட்சி இருந்த நிலையில், 1976 ஜனவரி 30 அன்று மு.கருணாநிதியின் அரசு பதவிநீக்கம் செய்யப்பட்டது. பின்னர் அரசியல் மாற்றங்களால் 1980 இல் தமிழ்நாடு மீண்டும் சட்டமன்றத் தேர்தலை சந்திக்க வேண்டிய சூழல் உருவானது.

அந்த தேர்தலில் எம்.ஜி.ஆர் தலைமையிலான அதிமுக 129 தொகுதிகளில் வெற்றி பெற்று ஆட்சியை அமைத்தது. திமுக வெறும் 37 இடங்களிலேயே முடங்கியது. காங்கிரஸ் (ஐ) 31 இடங்களிலும், சிபிஐ 9, சிபிஎம் 11 இடங்களிலும் வெற்றி பெற்றன.

தேர்தலில் மதுரை மேற்கு தொகுதியில் போட்டியிட்ட எம்.ஜி.ஆர் 57,019 வாக்குகள் பெற்று வெற்றி பெற்றார். அதேபோல் கருணாநிதி அண்ணா நகர் தொகுதியில் 51,290 வாக்குகள் பெற்று வெற்றி பெற்றார்.

தேர்தல் வெற்றிக்குப் பிறகு ஜூன் 3 ஆம் தேதி, கருணாநிதியின் பிறந்தநாளுக்கு எம்.ஜி.ஆர் வாழ்த்து தெரிவித்தது அரசியல் வட்டாரத்தில் பெரும் பேசுபொருளாக மாறியது. அதே நேரத்தில், “துப்பறியும் அதிகாரியும் திருடனும் சேர்ந்து நிறுவனம் நடத்த முடியுமா?” என்ற எம்.ஜி.ஆரின் கருத்தும் அரசியல் விவாதத்தை கிளப்பியது.

இந்தத் தேர்தல் தோல்விக்குப் பிறகு கருணாநிதி நிகழ்ச்சியில் பேசிய உரையும் வரலாற்று முக்கியத்துவம் பெற்றது. “என்னை கடலில் தூக்கி எறிந்தாலும் கட்டுமரமாக மிதப்பேன்; நெருப்பில் எறிந்தாலும் உங்களுக்கு பயன்படுவேன்” என்ற அவரது உரை, தொண்டர்களின் மனதை உருக்கியதாகக் கூறப்படுகிறது.

இதன் மூலம் 1980 தேர்தல் எம்.ஜி.ஆரின் மக்கள் ஆதரவை உறுதி செய்த தேர்தலாகவும், அதிமுக அரசியல் சக்தியாக நிலைநிறுத்தப்பட்ட காலமாகவும் வரலாற்றில் குறிப்பிடப்படுகிறது.