நாம் என்ன சாப்பிடுகிறோம் என்பது மட்டும் அல்ல, எப்போது, எப்படி, எவ்வளவு கவனத்துடன் சாப்பிடுகிறோம் என்பதுதான் நம் உடல்நலத்தின் உண்மையான ரகசியம் என்று சமீபத்திய ஆய்வுகள் வலியுறுத்துகின்றன. “உள்ளே செல்லும் கலோரி வெளியேறும் கலோரி” என்ற எளிய கணக்கைத் தாண்டி, மனித உடலில் நடைபெறும் நுணுக்கமான உயிரியல் செயல்பாடுகள் உணவின் தாக்கத்தை நிர்ணயிக்கின்றன என்பது இப்போது தெளிவாகியுள்ளது.

ஒரே உணவை இருவர் எடுத்தாலும், அது உடலில் எப்படி செரிமானமாகிறது, எவ்வளவு ஆற்றலாக மாறுகிறது, எவ்வளவு கொழுப்பாக சேமிக்கப்படுகிறது என்பதில் பெரும் வேறுபாடு உள்ளது. உணவின் தன்மை மட்டுமல்லாமல், அதை எடுத்துக்கொள்ளும் நேரம், சாப்பிடும் வேகம், மென்றல் முறை, மேலும் குடலில் வாழும் நுண்ணுயிர்களின் சமநிலை போன்றவை அனைத்தும் இதில் முக்கிய பங்காற்றுகின்றன.

காலை நேரத்தில் அதிகளவு உணவு எடுத்துக்கொள்வோர், மாலை அல்லது இரவு நேரத்தில் அதே அளவு உணவு சாப்பிடுபவர்களை விட உடல் எடையை எளிதாக கட்டுப்படுத்த முடியும் என்பது ஆய்வுகள் கூறும் உண்மை. குறிப்பாக, இரவு 9 மணிக்குப் பிறகு சாப்பிடும் பழக்கம் ரத்த சர்க்கரை மற்றும் தீய கொழுப்பு அளவுகளை உயர்த்தி, இதயநோய் அபாயத்தை அதிகரிக்கக் கூடும்.

அதனால், உணவு நேரத்தை கட்டுப்படுத்துவது ஒரு ஆரோக்கியமான வாழ்க்கையின் முக்கிய தூணாக மாறியுள்ளது.அதேபோல், உணவை மெதுவாக சுவைத்து சாப்பிடுவது மிக அவசியம். வேகமாக சாப்பிடும் போது, “வயிறு நிறைந்தது” என்ற தகவல் மூளைக்கு செல்லும் முன்பே அதிக உணவு உட்கொள்ளப்படுகிறது.

மெதுவாக சாப்பிடும் போது பசியைக் கட்டுப்படுத்தும் ஹார்மோன்கள் இயல்பாக செயல்பட்டு, நீண்ட நேரம் திருப்தியுடன் இருக்க உதவுகின்றன. இல்லையெனில், ரத்த சர்க்கரை திடீரென உயர்ந்து, நீண்டகாலத்தில் நீரிழிவு அபாயத்தையும் ஏற்படுத்தும்.உணவின் வடிவமும் உடலின் பதிலை மாற்றுகிறது. முழு பழங்களை விட ஜூஸ் வடிவில் எடுத்துக்கொண்டால் பசியடக்கம் குறைவாக இருக்கும்.

அதேபோல், முழு உணவுகளை விட அதிகமாக பதப்படுத்தப்பட்ட உணவுகள் உடலில் அதிக கலோரியை உறிஞ்சச் செய்து, எடை அதிகரிக்க வழிவகுக்கின்றன.மேலும், குடலில் உள்ள நுண்ணுயிர்கள் (கட் மைக்ரோபயோட்டா) உணவின் செரிமானத்தில் மறைமுக நாயகர்களாக செயல்படுகின்றன.

ஒவ்வொருவரின் உடலிலும் இந்நுண்ணுயிர்களின் அமைப்பு மாறுபடுவதால், ஒரே உணவுக்கே உடல் தரும் பதிலும் மாறுபடுகிறது. இதுவே “தனிப்பட்ட ஊட்டச்சத்து” என்ற புதிய சிந்தனையை உருவாக்கியுள்ளது.எனவே, ஆரோக்கியமான வாழ்க்கைக்கு சில எளிய வழிமுறைகள்: நார்ச்சத்து நிறைந்த காய்கறி, பழங்கள், முழுதானியங்களை அதிகரித்தல்; சர்க்கரை, உப்பு, தீய கொழுப்பை கட்டுப்படுத்தல்; உணவை மெதுவாக நன்றாக மென்று சாப்பிடுதல்; இரவு உணவை குறைத்தல்; மற்றும் உணவு நேரத்தை ஒழுங்குபடுத்துதல்.

இவ்வாறு முழுமையான அணுகுமுறையால் மட்டுமே நீடித்த ஆரோக்கியத்தையும் சமநிலையான உடல் எடையையும் பெற முடியும் என நிபுணர்கள் வலியுறுத்துகின்றனர்.