செரிமானக் கோளாறு, வயிற்றுப்போக்கு, குடல் அழற்சி மற்றும் அறுவை சிகிச்சைக்குப் பிறகான மீட்பு காலங்களில் மருத்துவர்கள் பெரும்பாலும் குறைந்த நார்ச்சத்து கொண்ட “லோ-ஃபைபர்” அல்லது “லோ-ரெசிட்யூ” உணவுமுறையை பின்பற்ற அறிவுறுத்துகின்றனர். இவ்வகை உணவுகள் குடலுக்கு அதிக அழுத்தம் தராமல் எளிதில் ஜீரணமாகி, வயிற்றை மென்மையான நிலையில் வைத்திருக்க உதவுகின்றன. குறிப்பாக சில பழங்கள் மற்றும் காய்கறிகள் செரிமான மண்டலத்தின் செயல்பாட்டை சீராக்குவதில் முக்கிய பங்காற்றுகின்றன.

இந்த பட்டியலில் முதன்மையான இடத்தை பிடிப்பது நன்கு பழுத்த வாழைப்பழம். இதில் நிறைந்துள்ள பொட்டாசியம் மற்றும் மென்மையான அமைப்பு வயிற்றை அமைதிப்படுத்தி, குடல் இயக்கத்தை சமநிலைப்படுத்த உதவுகிறது. வயிற்றுப்போக்கு ஏற்பட்ட சமயங்களில் மருத்துவர்கள் வாழைப்பழத்தை பரிந்துரைப்பதற்கான முக்கிய காரணமும் இதுவே என நிபுணர்கள் தெரிவிக்கின்றனர்.

அதேபோல், தர்பூசணி மற்றும் முலாம்பழம் போன்ற நீர்ச்சத்து நிறைந்த பழங்கள் உடலுக்கு தேவையான ஈரப்பதத்தை வழங்குவதோடு, குடலுக்கு சிரமமின்றி ஜீரணமாகும் தன்மையைக் கொண்டுள்ளன.

உடலில் நீர்ச்சத்து குறைவதைத் தடுப்பதிலும் இப்பழங்கள் பயனுள்ளதாக கருதப்படுகின்றன.பச்சைக் காய்கறிகளை விட நன்கு வேகவைத்து மென்மையாக்கப்பட்ட காய்கறிகள் செரிமானத்திற்கு சிறந்தவை என உணவியல் நிபுணர்கள் வலியுறுத்துகின்றனர். குறிப்பாக தோல் நீக்கி வேகவைக்கப்படும் கேரட் வயிற்றில் எரிச்சலை ஏற்படுத்தாமல் ஜீரணத்தை எளிதாக்குகிறது.

இதில் உள்ள வைட்டமின்-ஏ உடலின் நோய் எதிர்ப்பு திறனை மேம்படுத்தவும் உதவுகிறது.அதேநேரத்தில், மென்மையாக சமைக்கப்பட்ட பச்சை பீன்ஸ் உடலில் எளிதில் கரையும் தன்மை கொண்டதால், குடல் தொடர்பான பிரச்சினை உள்ளவர்களுக்கு ஏற்ற உணவாக பார்க்கப்படுகிறது. குடலின் செயல்பாட்டை அதிக சிரமமின்றி இயங்கச் செய்யும் திறனும் இதில் காணப்படுகிறது.

சௌசௌ போன்ற குறைந்த நார்ச்சத்து கொண்ட காய்கறிகள் வயிற்றில் வீக்கம், எரிச்சல் அல்லது அசௌகரியத்தை ஏற்படுத்தாமல் செரிமானத்தை சீராக்க உதவுகின்றன. இதனை சூப் அல்லது மென்மையான கறி வடிவில் சமைத்து எடுத்துக்கொள்ளலாம் என உணவியல் நிபுணர்கள் பரிந்துரைக்கின்றனர்.

மேலும், தோல் மற்றும் விதைகள் நீக்கப்பட்ட பேரிக்காய் பழங்களை அளவாக சாப்பிடுவது குடலுக்கு குறைந்த சுமையை மட்டுமே வழங்குகிறது. இதனால் செரிமான சிக்கல் உள்ளவர்கள் இதனை எளிதாக உணவில் சேர்த்துக்கொள்ளலாம் என தெரிவிக்கப்படுகிறது.பச்சை ஆப்பிளில் அதிக நார்ச்சத்து இருப்பதால் சிலருக்கு வயிற்று சிரமம் ஏற்பட வாய்ப்பு உள்ளது.

ஆனால் அதனை வேகவைத்து கூழ் வடிவில் தயாரிக்கப்படும் ஆப்பிள் சாஸ் மிகவும் மென்மையான உணவாக கருதப்படுகிறது. இது வயிற்றை அமைதிப்படுத்துவதோடு, குழந்தைகள் மற்றும் முதியவர்களுக்கும் ஏற்ற உணவாக விளங்குகிறது.இதனுடன் சேர்த்து தோல் நீக்கப்பட்ட உருளைக்கிழங்கு, வெள்ளை அரிசி, தயிர் மற்றும் ஓட்ஸ் கஞ்சி போன்ற மென்மையான உணவுகளையும் மருத்துவர் ஆலோசனையுடன் எடுத்துக்கொள்ளலாம்.

அதேசமயம், அதிக எண்ணெய், காரம், கச்சா காய்கறிகள் மற்றும் அதிக நார்ச்சத்து கொண்ட உணவுகளை தவிர்ப்பது குடல் ஆரோக்கியத்திற்கு நல்லது என மருத்துவ நிபுணர்கள் அறிவுறுத்துகின்றனர்.குடல் நலனை பாதுகாக்க சிறிய அளவில் அடிக்கடி உணவு எடுத்துக்கொள்வது, போதுமான அளவு தண்ணீர் குடிப்பது மற்றும் மருத்துவரின் ஆலோசனைகளை தொடர்ந்து பின்பற்றுவது மிகவும் அவசியம் என மருத்துவ வட்டாரங்களில் தெரிவிக்கப்படுகிறது.