சர்க்கரை வள்ளிக்கிழங்கு (Sweet Potato) தற்போது ஆரோக்கிய உணவுப் பட்டியலில் முக்கிய இடம் பிடித்துள்ள ஒரு சத்தான கிழங்கு வகையாகும். அதிக ஊட்டச்சத்துகள், நார்ச்சத்து மற்றும் ஆன்டி-ஆக்சிடெண்டுகள் நிறைந்த இந்த உணவு உடலுக்கு பல நன்மைகளை அளித்தாலும், சில உடல்நலக் கோளாறுகள் உள்ளவர்கள் இதை எச்சரிக்கையுடன் சாப்பிட வேண்டும் என மருத்துவர்கள் தெரிவிக்கின்றனர்.

சர்க்கரை வள்ளிக்கிழங்கின் முக்கிய சிறப்பு, இதில் அதிகளவில் காணப்படும் பீட்டா கரோட்டின் ஆகும். இது உடலில் வைட்டமின் A-ஆக மாறி கண் பார்வை, சரும ஆரோக்கியம் மற்றும் நோய் எதிர்ப்பு சக்தியை மேம்படுத்த உதவுகிறது. அதோடு வைட்டமின் C மற்றும் பொட்டாசியம் நிறைந்திருப்பதால் உடலின் நோய் எதிர்ப்பு திறனை வலுப்படுத்துவதோடு, இதய துடிப்பை சீராக வைத்திருக்கவும் உதவுகிறது.

இதில் உள்ள அதிக நார்ச்சத்து செரிமானத்தை சீராக்கி மலச்சிக்கலை குறைக்க உதவுகிறது. குடல் ஆரோக்கியத்திற்கும் இது நல்ல உணவாக கருதப்படுகிறது.

ஆனால், எல்லோருக்கும் இது ஒரே மாதிரி ஏற்ற உணவாக இருக்காது. குறிப்பாக சிறுநீரகக் கல் (Kidney Stone) பிரச்சனை உள்ளவர்கள் கவனமாக இருக்க வேண்டும். சர்க்கரை வள்ளிக்கிழங்கில் ஆக்சலேட் (Oxalate) உள்ளது. ஏற்கனவே சிறுநீரகக் கல் வரலாறு உள்ளவர்கள் இதை அதிகமாக சாப்பிடுவது கல் உருவாகும் அபாயத்தை அதிகரிக்கக்கூடும்.

நீரிழிவு நோயாளிகளும் இதை அளவோடு மட்டுமே சாப்பிட வேண்டும். இதன் கிளைசெமிக் குறியீடு (Glycemic Index) குறைவாக இருந்தாலும், மாவுச்சத்து அதிகம் இருப்பதால் ரத்த சர்க்கரை அளவை உயர்த்தும் வாய்ப்பு உள்ளது. எனவே வேகவைத்த வடிவில், அளவோடு சாப்பிடுவது நல்லது.

மேலும், இதில் உள்ள அதிக பொட்டாசியம் காரணமாக சிறுநீரக செயலிழப்பு அல்லது பொட்டாசியம் அதிகம் உள்ள நோயாளிகள் மருத்துவரின் ஆலோசனையுடன் மட்டுமே சாப்பிட வேண்டும்.

சிலருக்கு இதில் உள்ள மன்னிட்டோல் (Mannitol) என்ற இயற்கை சர்க்கரை சேர்மம் செரிமானக் கோளாறுகளை ஏற்படுத்தக்கூடும். குறிப்பாக IBS (Irritable Bowel Syndrome) அல்லது உணர்திறன் மிகுந்த குடல் பிரச்சனைகள் உள்ளவர்களுக்கு வயிற்றுப்புணர்ச்சி, வாயுத் தொல்லை போன்றவை வரலாம்.

மருத்துவர்கள் குறிப்பிடும் முக்கிய எச்சரிக்கை என்னவென்றால், அழுகிய அல்லது பூஞ்சை பிடித்த சர்க்கரை வள்ளிக்கிழங்கை சாப்பிடக் கூடாது. அப்படிப்பட்ட கிழங்குகளில் உருவாகும் Ipomeamarone என்ற நச்சு உடலுக்கு தீங்கு விளைவித்து, சில சமயங்களில் நுரையீரல் பிரச்சனைகளுக்கும் காரணமாக இருக்கலாம்.

எனவே, நல்ல தரமான கிழங்குகளைத் தேர்வு செய்து, முறையாக வேக வைத்து அளவோடு சாப்பிட்டால், சர்க்கரை வள்ளிக்கிழங்கு ஆரோக்கியமான உணவாக பயன்படும். சத்துக்கள் நிறைந்த இந்த இயற்கை உணவை சரியான முறையில் சேர்த்துக்கொள்வது உடல்நலத்திற்கு பல நன்மைகளை தரும்.