அல்வா என்றாலே நாவில் கரையும் இனிப்பான சுவையும், மணம் வீசும் நெய்யின் வாசனையும் நினைவுக்கு வரும். வழக்கமாக கோதுமை, ரவை உள்ளிட்டவற்றில் தயாரிக்கப்படும் அல்வாவை சற்று வித்தியாசமாக, கொய்யாப்பழத்தின் இயற்கையான மணமும் சுவையும் சேர்த்து குளிர்ச்சியாக செய்து பார்த்தால் எப்படி இருக்கும்? கோதுமை மாவுடன் கொய்யாப்பழ விழுது, பழத்துண்டுகள், முந்திரி, பாதாம் ஆகியவற்றை சேர்த்து தயாரிக்கப்படும் இந்த ஜில் பழ அல்வா, பார்ப்பதற்கும் அழகாகவும், சாப்பிடுவதற்கு சுவையாகவும் இருக்கும். குறிப்பாக குழந்தைகள் விரும்பி சாப்பிடும் வகையில் இதை கண்ணாடிக் கிண்ணங்களில் அலங்கரித்து குளிர வைத்து பரிமாறலாம்.

தேவையான பொருட்கள்
கோதுமை மாவு – 1 கப்
சுடுநீர் – 2 டம்ளர்
சர்க்கரை – 2 கிண்ணம்
கொய்யாப்பழ விழுது – அரைக் கிண்ணம்
நறுக்கிய கொய்யாப்பழத் துண்டுகள் – 2 தேக்கரண்டி
முந்திரி, பாதாம் துண்டுகள் – தலா 2 தேக்கரண்டி
ஆரஞ்சு நிறப்பொடி – சிறிதளவு
நெய் – தேவையான அளவு
ஜெல்லி மிட்டாய் – அலங்கரிக்க

செய்முறை
முதலில் ஒரு அகலமான பாத்திரத்தில் கோதுமை மாவை எடுத்துக்கொள்ளவும். அதில் மாவு முழுவதும் நனையும் அளவுக்கு சுடுநீரை ஊற்றி நன்றாகக் கிளறவும். இந்தக் கலவையை சுமார் 3 மணி நேரம் அப்படியே ஊறவிட வேண்டும். ஒவ்வொரு ஒரு மணி நேரத்துக்கும் ஒருமுறை கிளறிவிடுவது நல்லது.பின்னர், பெரிய துளைகள் கொண்ட வடிகட்டியைப் பயன்படுத்தி மாவுக் கலவையை வடிகட்டவும். மாவில் இருக்கும் தேவையற்ற திப்பிகள் வடிகட்டியின் மேல் தங்கிவிடும்.

கிடைக்கும் மாவுக் கலவையை தேவையான அளவு தண்ணீர் சேர்த்து, அடி கனமான வாணலியில் ஊற்றி மிதமான தீயில் தொடர்ந்து கிளறத் தொடங்கவும்.கலவை சிறிது சிறிதாகத் திரண்டு அல்வா பதத்திற்கு வரத் தொடங்கியதும், தேவையான அளவு நெய்யைச் சேர்த்து தொடர்ந்து கிளறவும்.

மாவு நன்றாக வெந்து பளபளப்பான பதத்திற்கு வந்ததும் சர்க்கரையைச் சேர்க்கவும்.சர்க்கரை நன்றாகக் கரைந்து அல்வாவுடன் ஒன்றாகச் சேர்ந்ததும், சிறிதளவு ஆரஞ்சு நிறப்பொடியைச் சேர்க்கவும். பின்னர் நறுக்கிய முந்திரி, பாதாம் துண்டுகளைப் போட்டு நன்றாகக் கிளறவும். இறுதியாக கொய்யாப்பழ விழுதைச் சேர்த்து, அதன் மணமும் சுவையும் அல்வாவில் முழுமையாக கலக்கும் வரை கிளறி அடுப்பில் இருந்து இறக்கவும்.

குளிர வைத்து பரிமாறுவது எப்படி?
பரிமாறும் கண்ணாடிக் கிண்ணத்தின் அடிப்பகுதியில் சிறிதளவு நறுக்கிய கொய்யாப்பழத் துண்டுகளைப் போடவும். அதன் மீது தயாரித்து வைத்துள்ள அல்வாவை நிரப்பி, மேலே ஜெல்லி மிட்டாய்களை வைத்து அழகாக அலங்கரிக்கவும்.பின்னர் இந்தக் கிண்ணங்களை குளிர்சாதனப் பெட்டியில் சுமார் அரை மணி நேரம் வைத்து குளிரவிடவும். நன்றாகக் குளிர்ந்ததும் வெளியே எடுத்து பரிமாறலாம்.கொய்யாப்பழத்தின் இயற்கையான மணம், பழத்துண்டுகளின் சுவை, முந்திரி–பாதாமின் மொறுமொறுப்பு என ஒவ்வொரு கவளத்திலும் வித்தியாசமான சுவையைத் தரும் ஜில் பழ அல்வா தயார்.