மக்களவை எதிர்க்கட்சித் தலைவர் மற்றும் காங்கிரஸ் எம்.பி. ராகுல் காந்தி, இந்திய ராணுவ வீரர்களை குறித்த அவதூறான கருத்துக்கள் தெரிவித்ததாக கூறப்படும் வழக்கில் லக்னோ நீதிமன்றத்தில் நேற்று (ஜூன் 26, 2025) ஆஜரானார். அவரது அண்மைய அரசியல் பயணமான பாரத் ஜோடோ யாத்திரையின் போது பேசிய கருத்துகள் இந்த வழக்கிற்கான காரணமாகக் கூறப்படுகிறது.

வழக்கின் பின்னணி என்ன?
2022-ம் ஆண்டு டிசம்பர் மாதம் அருணாச்சல பிரதேச எல்லையில் இந்தியா – சீனா இராணுவங்களுக்கிடையில் மோதல் ஏற்பட்டது. இதையடுத்து, ராகுல் காந்தி தனது யாத்திரையின் போது செய்தியாளர்களிடம், “பாரத் யாத்திரை பற்றி யாரும் கேட்கவில்லை... ஆனால் சீன ராணுவத்திடம் இந்திய ராணுவம் அடித்துக்கொண்டதை பற்றி யாரும் பேசவில்லை,” என தெரிவித்ததாக கூறப்படுகிறது.

இந்தக் கருத்து, இந்திய ராணுவ வீரர்களின் வீரத்தை இழிவு படுத்துவதாக கருதி, ஓய்வு பெற்ற எல்லை சாலைகள் நிர்வாக இயக்குநராக பணியாற்றிய உதய் சங்கர் ஸ்ரீவஸ்தவா என்பவர் அவதூறு புகாரை அளித்தார். இது பிப்ரவரி 11, 2025 அன்று விசாரணைக்கு வந்தபோது, லக்னோவிலுள்ள ஒரு சிறப்பு நீதிமன்றம் ராகுல் காந்திக்கு சம்மன் அனுப்பி, நேரில் ஆஜராக உத்தரவிட்டது.

நீதிமன்றத்தில் ராகுல் காந்தி
இந்நிலையில், நேற்று ராகுல் காந்தி, தனது சட்டத்தரணிகளுடன் லக்னோ நீதிமன்றத்தில் நேரில் ஆஜராகி ஜாமீன் பெற்றார். அவரது சக கட்சியினர் அஜய் ராய் மற்றும் அவினாஷ் பாண்டே உடனிருந்தனர். நீதிபதியின் அறைக்கு அழைக்கப்பட்ட ராகுல், ஜாமீன் பத்திரம் தாக்கல் செய்ததோடு, சில ஆதார ஆவணங்களையும் சமர்ப்பித்தார். நீதிமன்றம் அவரை விடுவித்து, ஜாமீன் வழங்கியது.

பாதுகாப்பு பலப்படுத்தப்பட்டது
ராகுல் காந்தி லக்னோவிற்கு வந்ததையடுத்து, நீதிமன்ற வளாகம் மற்றும் வழிச்சந்திப்புகளில் போலீசார் கடும் பாதுகாப்பு ஏற்பாடுகளை செய்திருந்தனர். விசாரணைக்கு பின் அவர் டெல்லிக்கு திரும்புவார் என்றும், பின்னர் தனது தொகுதியான ரேபரேலிக்கு செல்லும் வாய்ப்பு இருப்பதாகவும் அஜய் ராய் கூறியிருந்தார்.

சமூகத்திலும் விமர்சனங்கள்
ராகுல் காந்தியின் இந்தக் கருத்துகள், அரசியல் மற்றும் சமூக வட்டாரங்களில் கடுமையான எதிர்வினைகளை உருவாக்கின. பலர், “இந்திய ராணுவ வீரர்களின் தியாகம், வீரத்தை குறைக்கும் வகையில் பேசுவது கண்டிக்கத்தக்கது” என விமர்சித்தனர். இருப்பினும், ராகுல் காந்தி தரப்பில் இதுவரை அதிகாரப்பூர்வ விளக்கம் எதுவும் வெளியிடப்படவில்லை.

இந்த வழக்கு எதிர்காலத்தில் எந்த முடிவை எடுக்கும் என்பது தெரியவில்லை. ஆனால், இந்திய அரசியல் வரலாற்றில் ஒரு முக்கிய எதிர்க்கட்சித் தலைவர், ராணுவம் குறித்த கருத்துக்காக நீதிமன்றத்தில் ஆஜராக வேண்டிய நிலைக்கு வருவதாகும் இச்சம்பவம், அரசியல் உரையாடல்களுக்குள் பாதுகாப்புப் படைகள் பற்றிய நுணுக்கமான கவனத்தை வலியுறுத்துகிறது.