ஒடிசாவின் பெர்ஹாம்பூரைச் சேர்ந்த ப்ரீத்திபன்னா மிஸ்ரா (40) மற்றும் ஆந்திராவின் காக்கிநாடாவைச் சேர்ந்த பானு தேஜா (43) ஆகியோர், பாரம்பரியச் சடங்குகளைத் தவிர்த்து, அரசியலமைப்பின் மீது உறுதிமொழி எடுத்து திருமண உறவில் இணைந்த சம்பவம் அனைவரது கவனத்தையும் ஈர்த்துள்ளது.

விநோதத் திருமணம்

தெலங்கானா மாநிலம் ஹைதராபாத்தில் தனியார் நிறுவனத்தில் பணியாற்றி வரும் ப்ரீத்திபன்னா மிஸ்ராவும், பெங்களூருவில் பணியாற்றும் பானு தேஜாவும் சில ஆண்டுகளுக்கு முன்பு சந்தித்தபோது காதலில் விழுந்தனர்.

திருமண முறை: இந்தத் தம்பதியரின் திருமணம் நேற்று முன்தினம் (நவ. 28) பெர்ஹாம்பூரில் நடைபெற்றது. இதில், வழக்கமான சடங்குகள் ஏதுமின்றி, இந்திய அரசியலமைப்பின் மீது உறுதிமொழி எடுத்து இருவரும் மணமக்களாகத் தங்களை அறிவித்துக் கொண்டனர்.

ரத்த தான முகாம் திருமணம் முடிந்த கையோடு, திருமண மண்டபத்திலேயே ஏற்பாடு செய்யப்பட்டிருந்த ரத்த தான முகாமில் மணமக்கள் இருவரும் உடனடியாக ரத்த தானம் செய்தனர்.

திருமணத்துக்கு வந்திருந்த உறவினர்களும் இதில் ஆர்வத்துடன் பங்கேற்று ரத்த தானம் செய்தனர். இதன் மூலம் மொத்தம் 18 யூனிட்கள் ரத்தம் சேகரிக்கப்பட்டது.

ஒடிசாவில் நடந்த இந்த விநோதமான திருமணம், சமூக அக்கறையுடன் கூடிய புதிய சிந்தனையைப் பிரதிபலிப்பதாக அமைந்தது.