டிட்வா புயலால் கடுமையாக இலங்கை பாதிக்கப்பட்டுள்ளது. பலத்த மழை, வெள்ளம் மற்றும் மண்சரிவு போன்ற அனர்த்தத்தில் சிக்கி பலியானவர்களின் எண்ணிக்கை 159 ஆக அதிகரித்துள்ளது. 203 க்கும் மேற்பட்டோர் காணாமல் போயுள்ளனர். இந்த இயற்கை பேரழிவால் ஆயிரக்கணக்கான மக்கள் பாதிக்கப்பட்டுள்ளனர்.

அந்நாட்டின் 25 மாவட்டங்களில் சுமார் 20 மாவட்டங்கள் பாதிக்கப்பட்டுள்ளன. மட்டக்களப்பு, மலையகம் முழுமையாக வெள்ளத்தில் சிக்கியுள்ளது. அத்துடன் கொழுப்பின் சில பகுதியில் வெள்ளத்தில் மூழ்கும் அபாயம் உள்ளதாக அந்நாட்டு அனர்த்த நிலையம் தெரிவித்துள்ளது.

அத்துடன், அங்கு அம்பாறை, கண்டி, நுவரெலியா, கொத்மலை, ஹட்டன் போன்ற பல பகுதிகளில் மழை இடைவிடாமல் பெய்து வருகிறது. பல இடங்களில் மண்சரிவு ஏற்பட்டுள்ளதால் போக்குவரத்து பெரிதும் பாதிக்கப்பட்டுள்ளது. மின் வயர்கள் மரங்கள் முறிந்து விழுந்ததில் அறுந்து விழுந்துள்ளதால் மின்சாரமின்றி பல பகுதிகள் இருளில் மூழ்கியுள்ளன.

சீரற்ற காலநிலை காரணமாக ஆயிரக்கணக்கான வீடுகள் சேதம் அடைந்துள்ளதால், அங்கு உள்ளவர்கள் பாதுகாப்பான இடங்களுக்கு மாற்றப்பட்டுள்ளனர். இந்நிலையில்,  டிட்வா புயல் சீற்றத்தால் சிக்குண்டுள்ள இலங்கைக்கு உதவும் வகையில் முதல் ஆளாக இந்தியா உதவிக்கரம் நீட்டியுள்ளது. அதன்படி, கப்பல்கள் மூலம் உணவு பொருட்கள் அங்கு அனுப்பி வைக்கப்பட்டுள்ளன. அத்துடன், இலங்கை விமான படையுடன் இணைந்து தேடுதல் பணிகளில் இறங்கவும், வெள்ளத்தில் சிக்கியோரை மீட்கவும் 02 ஹெலிகாப்டர்கள் அனுப்பி வைக்கப்பட்டுள்ளன.

இதற்காக 'ஆபரேஷன் சாகர் பந்து' என்ற மீட்பு நடவடிக்கையை இந்தியா தொடங்கியுள்ளது. இதன் பலனாக பாதிக்கப்பட்டவர்கள் தொடர்ந்து மீட்கப்பட்டு வருகின்றனர். இந் நிலையில், 'ஆபரேஷன் சாகர் பந்து' மூலம் உயிர்கள் காப்பாற்றப்பட்டுள்ளதாக இந்திய வெளியுறவு அமைச்சக செய்தி தொடர்பாளர் ரந்திர் ஜெய்ஸ்வால் கூறியுள்ளார்.

இதுகுறித்து அவர் எக்ஸ் வலைதள பதிவில் குறிப்பிட்டுள்ளதாவது; ''ஆபரேஷன் சாகர் பந்து பல உயிர்களை காப்பாற்றியது. இலங்கையில் சூறாவளியால் பாதிக்கப்பட்ட பகுதிகளில் இன்று இந்திய கடற்படை ஹெலிகாப்டர்கள் மூலம் பலர் மீட்கப்பட்டனர்.'' என்று கூறியுள்ளார்.