நாடு முழுவதும் ஏற்படும் உயிரிழப்புகள் குறித்து, இந்தியத் தலைமைப் பதிவாளர் அலுவலகம் வெளியிட்ட சமீபத்திய தரவுகள் அதிர்ச்சியை ஏற்படுத்தியுள்ளது. அந்த அறிக்கையின் படி, மொத்த இறப்புகளில் 31% உயிரிழப்புகளுக்கு இதய நோய்களே காரணம் எனத் தெரியவந்துள்ளது.

முன்னர் மாரடைப்பு மற்றும் இதயம் சார்ந்த பிரச்சனைகள் சில இடங்களில் மட்டும் தோன்றியிருந்தாலும், இப்போது நிலைமை முற்றிலும் மாறி விட்டது. இளம் வயதினரும், குழந்தைகளும் கூட மாரடைப்பால் பாதிக்கப்படுகின்றனர். மாறி வரும் வாழ்க்கை முறை, மன அழுத்தம், உடற்பயிற்சி குறைவு, சீரற்ற உணவு பழக்கம் ஆகியவை இதற்கு முக்கிய காரணங்களாகக் கூறப்படுகிறது.

2021–2023 காலகட்டத் தரவுகள்

2021 முதல் 2023 வரையிலான மூன்று ஆண்டுகளின் பதிவுகளை ஆய்வு செய்த பிறகு, இந்த அறிக்கை வெளியிடப்பட்டுள்ளது. அதன்படி,தொற்று அல்லாத நோய்கள் (Non-communicable diseases) — இதய நோய்கள், புற்றுநோய், நீரிழிவு உள்ளிட்டவை — **மொத்த இறப்புகளில் 56.7%**க்கு காரணமாக உள்ளன.தொற்று நோய்கள், மகப்பேறு மற்றும் ஊட்டச்சத்து குறைபாடுகள் — மொத்த இறப்புகளில் 23.4% ஆகக் காணப்படுகின்றன.

கொரோனா காலத்தில் (2020–2022), இந்த விகிதங்கள் முறையே 55.7% மற்றும் 24% ஆக இருந்தன. அதாவது, தொற்று நோய்கள் குறைந்தும், இதய நோய்கள் அதிகரித்தும் இருப்பது உறுதிப்படுத்தப்பட்டுள்ளது.

அறிக்கையில், இதய நோய்களுக்கு அடுத்தபடியாக உயிரிழப்புக்குக் காரணமாகும் நோய்கள் மற்றும் விபத்துகளும் குறிப்பிடப்பட்டுள்ளன:

செரிமான நோய்கள் – 5.3%,காய்ச்சல் மற்றும் தொற்றுகள் – 4.9%,வாகன விபத்துகள் – 3.7%,நீரிழிவு நோய் – 3.5%

இந்த தரவுகள், இந்தியாவில் இதய நோய் எவ்வளவு தீவிரமான பிரச்சனையாக மாறி விட்டது என்பதை வெளிப்படுத்துவதாகும். மருத்துவ நிபுணர்கள், தினசரி உடற்பயிற்சி, ஆரோக்கியமான உணவுப் பழக்கம் மற்றும் சீரான மருத்துவ பரிசோதனைகள் மூலம் இதய நோய்களை கட்டுப்படுத்தலாம் என எச்சரித்து வருகின்றனர்.