கடந்த 1975 ஆம் ஆண்டு ஜூன் 25 நள்ளிரவில், அப்போதைய பாரதப் பிரதமர் இந்திரா காந்தி தலைமையிலான காங்கிரஸ் அரசாங்கத்தின் பரிந்துரையின் பேரில், இந்தியா முழுவதும் அவசரநிலை (Emergency) பிரகடனம் செய்யப்பட்டது. ஏறத்தாழ 21 மாதங்கள் நீடித்த இந்த அவசரநிலைக் காலத்தில், இந்தியக் குடிமக்களின் அடிப்படை உரிமைகள், பத்திரிகை சுதந்திரம் மற்றும் பேச்சுரிமை ஆகியவை முற்றிலுமாக நசுக்கப்பட்டன. இந்திய மக்களாட்சியின் இந்த இருண்ட அத்தியாயத்தை நினைவுகூறும் வகையிலும், ஜனநாயகத்தின் மாண்பைக் காத்த தியாகிகளைக் கௌரவிக்கும் வகையிலும் ஜூன் 25 ஆம் தேதியை 'அரசியலமைப்பு படுகொலை தினம்' (Samvidhan Hatya Diwas) என்று மத்திய அரசு அதிகாரப்பூர்வமாக அறிவித்துள்ளது.

ஜனநாயகம் நசுக்கப்பட்ட இருண்ட காலம்

அவசரநிலை பிரகடனப்படுத்தப்பட்டவுடன், நாட்டில் இருந்த முக்கிய எதிர்க்கட்சித் தலைவர்கள், மூத்த பத்திரிகையாளர்கள் மற்றும் சமூக ஆர்வலர்கள் என ஆயிரக்கணக்கானோர் எவ்வித விசாரணையுமின்றி நள்ளிரவில் கைது செய்யப்பட்டுச் சிறைகளில் அடைக்கப்பட்டனர். நீதிமன்றங்களின் அடிப்படை அதிகாரங்கள் பெருமளவுக் கட்டுப்படுத்தப்பட்டு, ஒட்டுமொத்த தேசமும் ஒரு சர்வாதிகாரப் பிடிக்குள் தள்ளப்பட்டது. இந்த அடக்குமுறைகளுக்கு எதிராகத் துணிச்சலுடன் போராடி தியாகம் செய்த எண்ணற்றோரின் போராட்டத்தால் மட்டுமே நாட்டில் மீண்டும் ஜனநாயகம் மீட்டெடுக்கப்பட்டது.

பிரதமர் நரேந்திர மோடியின் எக்ஸ் (X) பதிவு

இந்தத் தினத்தை முன்னிட்டுப் பிரதமர் நரேந்திர மோடி தனது எக்ஸ் சமூக வலைத்தளப் பக்கத்தில் வெளியிட்டுள்ள செய்தியில்:

"அரசியலமைப்பு படுகொலை தினம், இந்திய ஜனநாயகம் கொடூரமாக நசுக்கப்பட்ட அந்த இருண்ட காலத்தை இன்று நமக்கு மீண்டும் நினைவூட்டுகிறது. ஜனநாயகம், அரசியலமைப்பு மற்றும் குடிமக்களின் உரிமைகளைப் பாதுகாப்பதில் நாம் எப்போதும் அர்ப்பணிப்புடன் இருக்க வேண்டும் என்ற எண்ணத்தை இது நமக்கு ஊட்டுகிறது. அவசரநிலையைத் துணிச்சலுடன் எதிர்த்த அனைத்துச் சான்றோர்களுக்கும் எனது மரியாதைக்குரிய வணக்கங்கள்."

மேலும், சுதந்திரத்தின் முக்கியத்துவத்தை வலியுறுத்திய பிரதமர், "சுதந்திரத்தின் மூலமே ஒரு மனிதன் மகிழ்ச்சியையும், மிக உயர்ந்த உன்னத நிலையையும் அடைகிறான். சுதந்திரமே ஒருவருக்கு முழுமையையும் உச்சகட்ட உன்னதத்தையும் வழங்குகிறது" என்றும் சுட்டிக்காட்டியுள்ளார்.

மத்திய அமைச்சர்களின் காரசார விமரிசனம்

மத்திய உள்துறை அமைச்சர் அமித் ஷா மற்றும் பாதுகாப்புத்துறை அமைச்சர் ராஜ்நாத் சிங் உள்ளிட்ட மூத்த தலைவர்கள், காங்கிரஸ் கட்சியின் தணிக்க முடியாத அதிகாரப் பசியால் அன்று இந்திய அரசியலமைப்பின் ஆன்மா முற்றிலும் சிதைக்கப்பட்டது என்று மிகக் கடுமையாக விமரிசித்துள்ளனர். வருங்கால சந்ததியினர் இந்த வரலாற்றுப் பிழையை ஒருபோதும் மறந்துவிடக் கூடாது என்பதற்காகவும், மீண்டும் இது போன்றதொரு ஜனநாயக விரோதச் செயல் நாட்டில் எக்காலத்திலும் அரங்கேறாமல் இருப்பதை உறுதி செய்யவுமே இந்த நாள் ஆண்டுதோறும் தேசிய அளவில் அனுசரிக்கப்படுவதாக அவர்கள் தெரிவித்துள்ளனர்.