கோவாவை சேர்ந்த 22 வயது வாலிபர் சோஹம் நாயக், கடந்த மூன்று ஆண்டுகளாக தெற்கு கோவா பகுதியில் பல இளம்பெண்களை குறிவைத்து திட்டமிட்டு செயல்பட்டது பெரும் அதிர்ச்சியை ஏற்படுத்தியுள்ளது. காதல் பெயரில் அணுகி, 25 முதல் 30 பெண்களை தனது வலையில் சிக்கவைத்து, பின்னர் அவர்களிடம் பாலியல் துன்புறுத்தலில் ஈடுபட்டதாக காவல் விசாரணையில் வெளிச்சத்துக்கு வந்துள்ளது.

இதில் மட்டும் நின்றுவிடாமல், அந்த கொடூர செயல்களை வீடியோவாக பதிவு செய்து வைத்துக் கொண்டு, “வெளியே வெளியிடுவேன்” என மிரட்டியதன் மூலம் பெண்களை மவுனமாக வைத்திருந்ததாகத் தெரிவிக்கப்படுகிறது. பயம் காரணமாக பாதிக்கப்பட்டவர்கள் இதுவரை புகார் அளிக்காதது சம்பவத்தின் தீவிரத்தை வெளிப்படுத்துகிறது.

இந்நிலையில், சமீபத்தில் நண்பர்களுடன் மதுபானம் அருந்தியபோது, பாதிக்கப்பட்ட பெண்களின் வீடியோக்களை அவர்களிடம் காட்டியதாக தகவல் வெளியாகியுள்ளது. இதை பார்த்தவர்கள் அதிர்ச்சி அடைந்து, சம்பவத்தை வெளிக்கொணர்ந்தனர். இந்த தகவல் அப்பகுதியில் வேகமாக பரவி, பொதுமக்களிடையே கடும் அதிருப்தியை ஏற்படுத்தியது.

இதனால் கோபமடைந்த மக்கள் காவல் நிலையத்தை முற்றுகையிட்டு, குற்றவாளிக்கு கடும் நடவடிக்கை எடுக்க வேண்டும் என வலியுறுத்தினர். சூழ்நிலை பதற்றமாக மாறியதை தொடர்ந்து காவலர்கள் விரைந்து செயல்பட்டு சோஹம் நாயக்கை கைது செய்தனர்.அவரிடமிருந்து கைப்பற்றப்பட்ட வீடியோக்களை காவலர்கள் தீவிரமாக ஆய்வு செய்து வருகின்றனர்.

மேலும் பாதிக்கப்பட்டவர்களை அடையாளம் காணும் பணியும், அவர்களிடம் இருந்து வாக்குமூலம் பெறும் செயல்முறையும் நடைபெற்று வருகிறது.இந்த வழக்கில் சட்டப்படி கடுமையான நடவடிக்கை எடுக்கப்படும் என அதிகாரிகள் உறுதியளித்துள்ளனர். குறிப்பிடத்தக்கது என்னவெனில், சோஹம் நாயக், பா.ஜ.க.வை சேர்ந்த தொழிலதிபர் சுஷாந்த் நாயக்கின் மகன் என்பது மேலும் பரபரப்பை கிளப்பியுள்ளது.

மூன்று ஆண்டுகளாக இப்படியான சம்பவங்கள் நடந்தும், எந்த தகவலும் அதிகாரிகளிடம் சென்றடையாதது சமூகத்தில் கடும் எதிர்ப்பை எழுப்பியுள்ளது. பெண்களின் பாதுகாப்பை உறுதி செய்ய கடுமையான சட்ட அமலாக்கமும் விழிப்புணர்வும் அவசியம் என்பதை இந்த சம்பவம் மீண்டும் உணர்த்தியுள்ளது.மேலும், காவலர்கள்  இந்த வழக்கில் தொடர்ந்து தீவிர விசாரணை நடத்தி வருகின்றனர்.