தமிழகத்தில் நடைபெறவுள்ள இவ்வாண்டு ஆசிரியர் தகுதித் தேர்வுக்கான (டெட்) விண்ணப்பிக்கும் காலக்கெடு நீட்டிக்கப்பட்டுள்ளதாக ஆசிரியர் தேர்வு வாரியம் (டிஆர்பி) அறிவித்துள்ளது.

மத்திய அரசின் கட்டாயக் கல்வி உரிமை சட்டத்தின் அடிப்படையில், 1 முதல் 8ஆம் வகுப்பு வரை பணிபுரிய விரும்பும் ஆசிரியர்கள் டெட் தேர்வில் தேர்ச்சி பெற வேண்டும். இடைநிலை ஆசிரியர்களுக்கானது டெட் தாள்-1, பட்டதாரி ஆசிரியர்களுக்கானது டெட் தாள்-2 என இரு வகைத் தேர்வுகள் நடத்தப்படுகின்றன.

இவ்வாண்டு டெட் தேர்வு நவம்பர் 1, 2 ஆகிய தேதிகளில் நடைபெறும் என ஆகஸ்ட் 11 அன்று அறிவிக்கப்பட்டது. ஆனால் அத்தேதிகள் கிறிஸ்தவ மக்களின் கல்லறைத் திருநாளோடு பொருந்தியதால் எதிர்ப்பு எழுந்தது. இதையடுத்து தேர்வு தேதிகள் மாற்றப்பட்டு, டெட் தாள்-1 நவம்பர் 15-ஆம் தேதி, தாள்-2 நவம்பர் 16-ஆம் தேதி நடைபெறும் என திருத்திய அறிவிப்பு வெளியிடப்பட்டது.

விண்ணப்பிப்பதற்கான காலக்கெடு இன்று (செப்டம்பர் 8) மாலை 5 மணிக்கு முடிவடைய இருந்தது. ஆனால் கடைசி நாளில் பெருமளவில் விண்ணப்பதாரர்கள் ஒரே நேரத்தில் பதிவு செய்ததால் இணையதளம் சீர்குலைந்தது. இதனை முன்னிட்டு, விண்ணப்பிக்க கூடுதல் அவகாசம் வழங்கப்பட்டு, செப்டம்பர் 10 மாலை வரை நீட்டிக்கப்பட்டுள்ளது.