2026 புத்தாண்டை தொடர்ந்து வரும் முதல் பெரும் பண்டிகையான பொங்கலுக்கு, தமிழ்த் திரையுலகின் இரண்டு பெரிய படங்கள் விஜய் நடித்த ‘ஜனநாயகன்’ மற்றும் சிவகார்த்திகேயன் நடித்த ‘பராசக்தி’ திரைக்கு வரவுள்ளதாக அறிவிக்கப்பட்டது. இதனால் பொங்கல் பாக்ஸ் ஆபிஸில் பெரும் மோதல் உருவாகும் என எதிர்பார்ப்பு நிலவியது.

அரசியலில் கால்பதித்துள்ள நடிகர் விஜய்க்கு ‘ஜனநாயகன்’ கடைசி திரைப்படம் என்பதால், ரசிகர்கள் மத்தியில் அந்த படம் மீது அபார எதிர்பார்ப்பு உள்ளது. மறுபுறம், ‘பராசக்தி’ படத்தில் சிவகார்த்திகேயன் நாயகனாக இருந்தாலும், ஜெயம் ரவி, அதர்வா போன்ற முன்னணி நடிகர்களும் முக்கிய கதாபாத்திரங்களில் நடித்திருப்பதால், அந்த படமும் ரசிகர்களின் கவனத்தை ஈர்த்துள்ளது.

இதனால், ‘ஜனநாயகன்’ vs ‘பராசக்தி’ – பொங்கல் வெற்றியை யார் கைப்பற்றப் போகிறார்கள்? என்ற விவாதம் ரசிகர்கள் மத்தியில் தீவிரமடைந்துள்ளது.இந்த நிலையில், 1965 ஆம் ஆண்டு நடைபெற்ற இந்தி எதிர்ப்பு போராட்டத்தை மையமாகக் கொண்ட கதையுடன் உருவான ‘பராசக்தி’, நாளை மறுநாள் வெளியாகும் என கூறப்பட்டாலும், இதுவரை படத்திற்கு தணிக்கை சான்றிதழ் வழங்கப்படவில்லை.

படத்திற்கு யூ/ஏ சான்றிதழ் வழங்கப்பட்டதாக தகவல்கள் வெளியானபோதும், அதனை உறுதிப்படுத்தும் அதிகாரப்பூர்வ அறிவிப்பு இன்னும் வெளியாகவில்லை. இதனால், திட்டமிட்ட தேதியில் படம் வெளியாகுமா என்ற கேள்வி எழுந்துள்ளது.

‘ஜனநாயகன்’ படத்தைப் போலவே, ‘பராசக்தி’ படமும் தணிக்கைச் சிக்கலில் சிக்கியுள்ளது. இந்த படம் மறு ஆய்வு குழுவிற்கு அனுப்பப்பட்டு, உறுப்பினர்கள் பார்வையிட்ட பின் யூ/ஏ சான்றிதழ் வழங்கப்படும் என கூறப்பட்ட நிலையில், இதுவரை சான்றிதழ் கிடைக்காதது ரசிகர்கள் மத்தியில் ஏமாற்றத்தையும் சோகத்தையும் ஏற்படுத்தியுள்ளது.

பொங்கல் திருவிழாவில் ரசிகர்களுக்கான திரை விருந்தா, அல்லது தணிக்கை தடையால் கனவு முறிவா? – இரு படங்களின் எதிர்காலம் கேள்விக்குறியாகியுள்ளது.