தெலுங்கு திரையுலகில் முன்னணி நடிகர்களில் ஒருவர் பாலையா. தெலுங்கு திரையுலகில் இதுவரை 100-க்கும் மேற்பட்ட படங்களில் நடித்துள்ளார்.கடந்த 2021-ஆம் ஆண்டு போயபதி சீனு இயக்கத்தில் 'அகண்டா' என்ற படம் பாலையா நடிப்பில் வெளியானது. 2021-ஆம் ஆண்டு வெளியான தெலுங்குப் படங்களில் அதிக வசூல் செய்த படமாக 'அகண்டா' அமைந்தது. 

இந்த படத்தில், பிரக்யா ஜெய்ஸ்வால், ஜகபதி பாபு, பூர்ணா, அவினாஷ், விஜி சந்திரசேகர் உள்ளிட்டோர் நடித்திருந்தனர்.இந்த படத்தின் மாபெரும் வரவேற்பினைத் தொடர்ந்து 02-ஆம் பாகத்திற்கான அறிவிப்பு வெளியாகி முதல்கட்ட படப்பிடிப்பு நடைபெற்று முடிந்துள்ளது.

இந்த படத்திற்கு தமன் இசையமைக்கிறார். இரண்டாம் பாகத்திலும், முதல் பாகத்தில் பணி புரிந்த தொழில்நுட்பக் குழுவினரே பணி புரிகின்றனர். 

இப்படம் செப்டம்பர் மாதம் 25-ந் தேதி வெளியாக உள்ளது. இந்நிலையில், கும்பமேளாவை முன்னிட்டு உத்தர பிரதேசத்தில் உள்ள பிரயாக்ராஜில் இதன் அடுத்தக்கட்ட படப்பிடிப்பு  தொடங்கியுள்ளது. 'அகண்டா' பாகம் 02 இல், நடிகை சம்யுக்தா மேனன் கதாநாயகியாக நடிக்க உள்ளதாக கூறப்படுகிறது.

இவர் மலையாளத்தில் பல படங்களில் நடித்திருந்தாலும் தமிழில் வாத்தி மற்றும் தெலுங்கில் டெவில், விஷ்வாம்பர பிம்பிசாரா உள்ளிட்ட படங்களில் நடித்துள்ளமை குறிப்பிடத்தக்கது.