தமிழ் சினிமாவில் 5 தசாப்தங்களுக்கும் மேலாக தனது தனித்துவமான ஸ்டைல் மற்றும் நடிப்பால் ரசிகர்களை கட்டிப்போட்டு வரும் சூப்பர் ஸ்டார் ரஜினிகாந்த், திரையுலகில் 51 ஆண்டுகளை நிறைவு செய்துள்ளார். இதனை முன்னிட்டு அவர் நடித்து வரும் ‘தர்மன்’ படப்பிடிப்பு தளத்தில் படக்குழுவினர் கேக் வெட்டி கொண்டாடியுள்ளனர்.

1975-ம் ஆண்டு ஆகஸ்ட் 15-ம் தேதி வெளியான ‘அபூர்வ ராகங்கள்’ திரைப்படத்தின் மூலம் தமிழ் சினிமாவில் அறிமுகமானார் ரஜினிகாந்த். கோட் அணிந்து, ஸ்டைலாக சிகரெட் பிடித்தபடி கேட்டைத் திறந்து கொண்டு வரும் அந்த சிறிய காட்சியே அன்றைய ரசிகர்களின் கவனத்தை ஈர்த்தது. இயக்குநர் கே. பாலசந்தரின் பார்வையில் அறிமுகமான ரஜினி, ஆரம்பகாலங்களில் வில்லன் மற்றும் குணச்சித்திர கதாபாத்திரங்களில் நடித்து தனது திறமையை நிரூபித்தார்.

அதன்பின்னர் படிப்படியாக கதாநாயகனாக உயர்ந்த அவர், தனது தனித்துவமான நடிப்பு, ஸ்டைல், வசன உச்சரிப்பு என அனைத்திலும் தனக்கென ஒரு முத்திரையை பதித்தார். இதன் மூலம் இந்திய சினிமாவின் முன்னணி நட்சத்திரமாகவும், ரசிகர்களால் ‘சூப்பர் ஸ்டார்’ என்று கொண்டாடப்படும் நடிகராகவும் உயர்ந்தார்.

தற்போது இயக்குநர் அஸ்வத் மாரிமுத்து இயக்கத்தில் உருவாகி வரும் ‘தர்மன்’ திரைப்படத்தில் ரஜினிகாந்த் நடித்து வருகிறார். ‘ஓ மை கடவுளே’, ‘டிராகன்’ உள்ளிட்ட படங்களை இயக்கிய அஸ்வத் மாரிமுத்துவின் இயக்கத்தில் ரஜினி நடிப்பது ரசிகர்கள் மத்தியில் எதிர்பார்ப்பை ஏற்படுத்தியுள்ளது.

இந்தப் படத்தை கமல்ஹாசனின் ராஜ் கமல் ஃபிலிம்ஸ் இன்டர்நேஷனல் மற்றும் டர்மரிக் மீடியா நிறுவனங்கள் இணைந்து தயாரித்து வருகின்றன. இதன் மூலம் ‘அல்லாவுதீனும் அற்புத விளக்கும்’ திரைப்படத்திற்குப் பிறகு சுமார் 46 ஆண்டுகள் கழித்து ரஜினிகாந்த் மற்றும் கமல்ஹாசன் மீண்டும் ஒரு திரைப்படத்தில் இணைந்து பணியாற்றுகின்றனர்.

‘தர்மன்’ படத்தில் ரஜினிகாந்துடன் சிம்ரன், ராஷி கண்ணா, யோகிபாபு உள்ளிட்டோர் முக்கிய கதாபாத்திரங்களில் நடித்து வருகின்றனர். படப்பிடிப்பு தற்போது விறுவிறுப்பாக நடைபெற்று வரும் நிலையில், ரஜினிகாந்தின் 51 ஆண்டுகால திரைப்பயணத்தை கொண்டாடும் வகையில் படக்குழுவினர் கேக் வெட்டி மகிழ்ச்சியை பகிர்ந்துள்ளனர்.

‘அபூர்வ ராகங்கள்’ படத்தில் தொடங்கிய பயணம்… 51 ஆண்டுகளுக்குப் பிறகும் அதே சூப்பர் ஸ்டார் மாஸ்!ரஜினிகாந்தின் இந்த சாதனை அவரது ரசிகர்களையும் ‘தர்மன்’ படக்குழுவினரையும் உற்சாகத்தில் ஆழ்த்தியுள்ளது.